Anapogi mo se Perofeta
E alala le tusitala i Hawaii, ISA
E alofa Silioti ia Peresitene Kimball. Sa manao o ia ia te ia ina ia toe malosi.
“Feed thou our souls, fill thou our hearts, and bless our fast, we pray” (Hymns, no. 138).
Na savali atu Silioti i le fale mai le aoga e pasia laau o esi lanu samasama ma mago pula veavea. Ina ua ia vaaia le fua, na ia manatua lona fiaai lea o loo i ai. Sa ia manatuaina foi o le asō o se aso faapitoa. O le asō o loo anapopogi tagata uma i lana siteki i Toga mo le perofeta, o Peresitene Spencer W. Kimball. O loo gasegase le perofeta ma e manaomia se taotoga. O le po nei o le a feiloai ai tagata i le siteki e tatalo ma faauma faatasi la latou anapogi.
Ina ua taunuu Silioti i le fale, sa ia sosogiina le manogi o le meaai o loo kukaina i le ‘umu, o le ogaumu lua. Sa gogolo lona manava. Na fiafia Silioti ua lava lona matua e anapogi ai i le taimi nei, peitai o le anapogi i se aso aoga e sili atu ona faigata nai lo le anapogi i se Aso Sa.
Sa taumafai Silioti e faagalo lona fiaai lea ua i ai. Sa ia maua fafie ma faamamaina lau laau ia na pauu mai laau uumi o ulu ia na faapaologiaina lona fanua.
“E malamalama le Tama Faalelagi pe afai ou te mitia sina vai itiiti,” na mafaufau ai Silioti ao fufuluina ona lima i le maea ai o ana feau. Ona ia mafaufau lea i le tele o lona alofa ia Peresitene Kimball. Sa manao o ia ia te ia ia toe malosi. Sa ia filifili o le a ia faatali.
Na nofo i lalo Silioti i le faapaologa ma tuu lona ulu i luga o vae o lona tina. Sa matuai vaivai lava o ia.
“E mafai ona faamaea lau anapogi pe a e manao ai,” o le tala lea a Tina.
“Ae ou te fia anapogi,” na fai atu ai Silioti. “E mafai ona ou faia.”
Ina ua taunuu mai Tama mai le galuega, na fu’e e tagata uma o le aiga le ‘umu. Na latou aveesea mai le puaa lea na afifiina i lau laau, o le ‘ia, ma ulu ia na taoina i le peepee. Ona latou auiina lea o meaai i ‘ie ma aveina atu i le auala e faatali ai le pasi.
Sa latou fetaui ma isi aiga i le auala, ma a latou foi ipu meaai. Sa ataata uma i latou ma talatalanoa ao latou feaei faatasi i luga o le pasi. Na maua e Silioti sina avanoa i autafa o Tina. Sa ia sosogiina le manaia o meaai ao agai atu le pasi i auala lauleaga.
Ina ua taunuu atu le pasi i le falesa ua pogisa. I totonu, na tootutuli Silioti ma ona matua, ona tuagane ma ona uso, ma le fia selau o isi tagata o Le Ekalesia a Iesu Keriso o le Au Paia o Aso e Gata Ai.
I le taimi o le tatalo, na tatalo Silioti i lona loto, “Faamolemole ia toe faamalosi mai Peresitene Kimball.” Na ia iloa o tagata uma sa i le potu na tatalo mo le mea lava lea e tasi. Sa tau atu e se lagona malu i totonu o le a toe malosi Peresitene Kimball.
Ina ua pupula ona mata sa ia iloa atu loimata o loo i foliga o tagata na siomiaina o ia. O nei tagata uma sa anapopogi, ma sa ia anapogi faatasi ma i latou. Sa faigata, ae sa ia faia!