Aoao e Faalogo: O Uluai Paranesi Faaleaganuu ua Tuufaatasia i Aferika i Saute
Na faaputuputu loimata i fofoga o Frans Lekqwati, e 56 tausaga le matua, a o ia saofai e faasaga atu ia Olev Taim, lana peresitene o le siteki. Sa faatoa talosagaina o ia e Peresitene Taim i sona manatu e uiga i le fatuina o se paranesi a le Ekalesia i le nuu o Frans i Soweto, Aferika i Saute.
“Aisea ua e tutulu ai?” Pe ua i ai so’u sese ia te oe?” na fesili ai Peresitene Taim.
“Leai,” o le tali lea a Frans. “O se taimi muamua lea ua fesili mai ai se alii paepae ia te a’u i so’u manatu a o lei faia se faaiuga.”
Olaga i lalo o le Faailogalanu
Luga: Ua atofaina se matafaga o se eria mo na o tagata papae i lalo o faiga faailogalanu malosi i Aferika i Saute.
Agavale i lalo: ata na pueina mai le Keystone/Getty Images
O le tausaga o le 1981. I lea taimi, sa fevaevaeai ai tagata uli ma tagata papae i Aferika i Saute i lalo o se faatulagaga o tulafono e ta’ua o le faailogalanu. O lenei vaevaega faaletulafono, faatasi ai ma le faatapulaa a le Ekalesia e taofia ai alii uli Aferika mai le faauuina i le perisitua, na leva ona iloa ai sa le mafai e le Ekalesia ona uluola i tagata uli o Aferika i Saute. Na suia le tulaga i le 1978, ina ua maua e Peresitene Spencer W. Kimball le faaaliga lea na aveesea ai le tapulaa o le perisitua, ae sa tumau ai luitau o le fevaevaeaiga ma se aganuu o le masalosalo i le va o tagata nuu.
O le toatele o tagata uli o Aferika i Saute sa nonofo i taulaga, e masani lava o tausiusiuga o aai e toatele ai tagata papae e pei o Johannesburg. O Soweto, faapuupuu mo Taulaga i Saute i Sisifo, sa aupito i telē. Sa seasea ona o atu tagata papae i taulaga, ma o tagata uli sa o atu i aai sa seasea lava ona taulimaina tutusa ma tagata papae.
O Frans ma lona aiga sa avea ma vaega o se vaega toalaiti mai Soweto o e na taliaina le talalelei toefuataiina i le taimi o le vaitau o le 1970. I le taimi muamua sa latou auai ai i le uarota a Johannesburg. Sa manatua e atalii o Frans le feala a’e i luga i le 4:00 i le vaveao o Aso Sa ina ia mafai e le aiga ona pue le nofoaafi muamua i Johannesburg ona faia lea o se savaliga umi i le falelotu a o lei amata sauniga i le 9:00 i le taeao. Na vave i taimi uma le aiga—e ui sa faigata i nisi taimi mo tamaiti le feala i le taimi o le Peraimeri!
O le avea ai ma se paionia o le tuufaatasia o le faailogalanu e mafai foi ona avea o se luitau faalelagona. Na manatuaina e Josiah Mohapi lona faalogo atu i se tamaitiiti paepae e ono tausaga o faia se tala faatiga e uiga i tagata uli sa ia feiloai i ai i le Lotu. “I le faamaoni, sa ou ita,” na manatuaina e Josiah. Ae sa ia faalogo atu o faapea atu le tina i lana tama, “O le Ekalesia e mo tagata uma.” O le mafanafana ai e ala i le faamanatu, sa toafilemu ai Josiah.
Se Paranesi i Soweto?
O le uluai peresitene uliuli o le Aualofa i Aferika i Saute, o Julia Mavimbela, ua auai atu i le suatiaina o le eleele mo le fale fou o le Paranesi o Soweto i le 1991. (Tagai i lana tala i le tusiga lenei.)
Ata mai le faaaloaloga a le Potutusi o Talafaasolopito o le Ekalesia
Sa silafia e Peresitene Taim le feagai ai o tagata uli ma luitau faalelagona ma faaletino. Sa ia mafaufau e amata se paranesi i Soweto ina ia faafaigofie femalagaiga mo i latou ae na te le o manao latou te lagona e le o taliaina i latou i Johannesburg. Sa ia filifili e faatalanoaina tagata o le ekalesia i Soweto e pei o Frans e iloa ai o latou lagona a o lei faia se faatinoga. Sa latou tuuina atu ia te ia se tali manino: “O le a matou fiafia e faatu le Ekalesia i Soweto.”
Na iloa e Peresitene Taim taitai lelei o e mafai ona fesoasoani e aoaoina tagata faatoa liliu mai. Sa ia faatalanoaina le silia ma le 200 tagata o le Ekalesia i Johannesburg ma valaauina mulimuli ane le toa 40 e auai i le paranesi fou mo se taimi umi e fesoasoani e aoao se vaega paionia o taitai i le lotoifale iina.
E pei lava ona sopoia e tagata uli se isi vaega o le taulaga ma se isi aganuu e auai atu ai i le Uarota a Johannesburg, e tatau foi i tagata papae ona fetuunai i se siosiomaga ma le aganuu fou a o latou auauna atu i Soweto. Sa lei lelei mea uma i taimi uma. O Maureen van Zyl, o se palagi, o le sa valaauina e auauna atu o se peresitene o le Peraimeri, sa lei mafaufau e uiga i ai ina ua filifilia le vii faalemalo a Aferika i Saute e fai ma pese amata i le sauniga a le Aualofa i se tasi o vaiaso. Ae peitai, sa vave ona ia iloaina, sa vaai i ai tagata uli o Aferika i Saute i le vii o se faailoga o le faailogalanu ma sa toatele uso o le Aualofa sa le fiafia i le filifilia o le pese.
Sa faigofie ona mafai ona lotovaivai tagata uli ma tagata papae i lea feeseeseaiga, ae nai lo lena, sa latou filifili e tagai i ai o se avanoa mo talanoaga ma le faaleleiga. “Sa matou faasoaina soo se mea,” na manatuaina e Maureen. “I le avea ai ma tagata uli, o a mea sa faatiga ma i le avea ai ma tagata papae, o a mea ia sa matou iloa e faatiga. O auala sa latou faia ai ni mea faapitoa ma le auala na matou faia ai ni mea faapitoa. Ma o lea sa na o se taimi matagofie lea e aoao faatasi ai.”
A o tuputupu ae malosi ma toatele le paranesi i Soweto, sa amatalia paranesi i isi nuu laiti e faaaoga ai le auala lea e tasi. O Khumbulani Mdletshe o se alii talavou e nofo i le nuu laitiiti o KwaMashu e latalata i Durban. Ina ua ia auai i le Ekalesia i le 1980, sa ia aumaia ni talitonuga a tagata papae e taatele i le toetoe lava o alii talavou uli i Aferika i Saute i lena taimi. Ae o ona aafiaga i le tapuai ai i se paranesi e tuufaatasia na suia ai lana vaaiga.
O Mea e Noatia Faatasi ai Tagata
I le 1982, sa valaaulia ai Khumbulani ma nisi o alii talavou i lana paranesi e auai i se konafesi a le autalavou nofofua matutua. Sa manao lona peresitene o le paranesi, o se uso paepae e suafa ia John Mountford, ina ia foliga aulelei `ia alii talavou, e ui e toalaiti i latou e i ai ni ofu lelei. Sa ia aumaia uma i fafo mai lana kapoti ona lavalava, ma tufa atu suti i alii talavou, o e na laeiina ia suti i le konafesi. O le Aso Sa na sosoo ai, sa laeiina e Peresitene Mountford le suti sa ia nono atu ia Khumbulani. “Ou te le mafai ona vaai faalemafaufau atu i se tagata paepae o laeiina ni lavalava e tasi sa ou ofuina,” na toe manatua ai e Khumbulani, “ae o ia lava lena. Sa amata ona ia fesoasoani ia te a’u ia vaai atu i tagata papae i se tulaga ese nai lo le mea sa ou vaaia ai i latou i le taimi muamua.”
I le avea ai ma se Fitugafulu Eria i le taimi nei, sa matauina e Elder Mdletshe, “Tatou te manaomia uma nei aafiaga o le olaga lea e mafua ai ona tatou suia.”
Sa taliaina le fua o Aferika i Saute i le 1994 o se faatusa o le lotogatasi pe a mavae le faailogalanu. O le lanu uliuli, lanu samasama, ma le lanu meamata o faatusa o le Konekaresi Faavaomalo o Aferika, ma o le lanu mumu, lanu paepae, ma le lanu moana, o faatusa o le Ripapelika Boer.
Sa faaiuina le faailogalanu i le 1994 i Aferika i Saute. E ui e toatele faalapotopotoga o loo i ai nei i le tele o eria o tagata uli po o tagata papae, o le saolotoga sili atu o lona uiga o se faateleina o le fuainumera o eria e faafefiloi ai. E pei o le au paionia o uluai paranesi i nuu laiti, sa tapuai ma galulue faatasi tagata e eseese o latou talaaga e fausia le malo o le Atua.
O le peresitene o le siteki a Soweto i le taimi nei, o Thabo Lebethoa, sa faamatalaina le talalelei e pei o se kelu e tuufaatasia tagata i taimi o fevaevaeaiga. “Atonu matou te le malilie i mea o loo tutupu i fafo o le ekalesia, i faiga faaupufai ma isi mea,” sa ia matauina, “ae matou te ioeina ia aoaoga faavae.” O le galulue ai mai i lena faavae ua faasoaina, e mafai e tagata ona aoao mai i eseesega o le tasi ma le isi a o latou fefautuaai ma le faaeteete ma faalogo ma lagona faaleagaga. “O se tasi o mea aupito sili ona taua e uiga i le avea ai ma taitai o le faalogo i tagata,” na fautua mai ai Peresitene Lebethoa. “Faalogo ina ia mafai ona e malamalama. Faalogo ina ia mafai ona e lagonaina. Faalogo ina ia mafai ona e maua musumusuga.”
Na ioe Thoba Karl-Halla, le tama teine a le uluai tagata o le Paranesi a Soweto o Julia Mavimbela, o le faalogo e fesoasoani e tausia ai ni tulaga o feeseeseaiga mai le liliu i ni vaega tiga. “E tatau ona ou faalogo i se auala o le a ou malamalama ai i mea e le fiafia ai le tagata atonu e foliga mai o se ua faatiga ia te a’u,” o lana tala lea.
Ua uunaia e Elder Mdletshe le Au Paia o Aferika i Saute i le taimi nei ina ia maua le malosi i o latou eseesega, ae maise lava i se faatulagaga o se fonotaga. “E finagalo i ai le Alii i lena mea,” na ia matauina, “ina ia nonofo faataamilomilo tagata o aganuu eseese o soo se ituaiga ma talatalanoa e uiga i faafitauli.” O lana valaau i taitai i le lotoifale i le Ekalesia atoa o le faaauau lea ona atiina ae ni taitai mai i talaaga eseese, e pei ona lagolagoina ai o ia e augatupulaga ua mavae. A e taumafai e aapa atu i eria fou ma vaega fou, na ia taua, “e te le maua ai ni tagata e lava le tomai. Ae e te atinaeina ni aafiaga i le Ekalesia. E te atinaeina ni aafiaga e ala i le tuu atu i tagata e faatumuina avanoa taua e tusa pe leai se poto masani ma tuu atu ia i latou e galulue faatasi.”