Seia Tatou Toe Feiloai
O I Latou sa i ai i le Taavale Solofanua Mulimuli
Mai se saunoaga o le konafesi aoao ia Oketopa 1947, “To Them of the Last Wagon [Mo i Latou sa i ai i le Taavale Solofanua Mulimuli].”
I lena taavale solofanua mulimuli sa i ai le tuuto atu ma le faamaoni ma le amiosao ma, mai mea uma lava, o le faatuatua i le Usoga ma i le mana o le Atua.
Atapue mai le Getty Images
Ou te fia fai atu se tala e uiga i le taavale solofanua mulimuli i laina uumi taitasi o taavale solofanua ia na faimalaga ma le lemu ma le tigaina i luga o laufanua valevalenoa. …
… I tua i le taavale solofanua mulimuli, sa le gata ina sa latou le iloa atu uso taitai ua mamao atu i luma, ae sa masani foi ona latou le iloa atu le lagi lanumoana i la latou vaai ona o le mafiafia o le pefu o le fogaeleele. Ae ui i lea, i lea aso ma lea aso, sa agai pea i luma i latou sa i ai i le taavale solofanua mulimuli, ua vaivai ma lelavava, tiga o latou alofivae, o nisi taimi na toetoe lava a faavaivai, peitai na faamalosia i lo latou faatuatua e alofa le Atua ia i latou, ma e moni le Talalelei Toefuataiina, ma e sa taitaia ma faasino e le Alii Uso taitai sa i luma. O nisi taimi, o i latou sa i ai i le taavale solofanua mulimuli na tepa ae, mo sina taimi, i le taimi ua matua malosi ai lo latou faatuatua, mo mamalu o se lalolagi faalelagi, ae sa foliga matua mamao lava, ma sa vave ona mouese atu le vaaiga ona o le fetaomi mai pea o manaoga faaletino ma le vaivai ma le loto tiga ma o nisi taimi o le faavaivai.
Pe a mou atu le vaaiga, sa latou faanoanoa. Ae sa latou toe tatalo ma tulei atu pea i luma, faatasi ai ma ni nai faamalo, ma ni nai faamalosiauga, e aunoa ma ni upu faaviivii. … Ae i lena taavale solofanua mulimuli na i ai le tuuto atu ma le faamaoni ma le amiosao ma, mai mea uma lava, o le faatuatua i le Usoga ma i le mana o le Atua ma le agalelei. …
O lea la e ala atu i le pefu ma le palapala… sa latou agai atu ma le lemu i luma seia, latou pasia mauga ma oo atu ai i le vanu lea na taliaina i latou i le malologa ma le aiga. …
Ae o le faitau selau o nei agaga lototoa o le faatuatua e le faalotolotolua ma gafatia maoae e lei faaiuina lava la latou malaga.
Na toe valaauina i latou e Uso Polika [Iaga] ina ia mulimuli i lanu o le malo o le Atua ma auina atu i latou e nofoia ia vanu, latalata ma mamao, i eria tetele o mauga o le sulufaiga. O lea sa toe faamau ai a latou povi ma faapipii i le taavale, ma … saili atu lemu lo latou ala i vanu fou, ma toe faalagolago ma le faatuatua atoa i le atamai ma le taitaiga faalelagi a lo latou Mose. …
Ma e afe ma afe o nei fia sefulu afe o tagata, mai le taimi muamua seia oo i le taimi nei, le au filifilia a le Atua, ua talafeagai tonu lava ma lo latou valaauga loto maualalo ma lo latou taunuuga atoatoa e pei o le Uso o Polika, ma na faapena foi le talafeagai ai o isi ma o latou valaauga, ma o le a tauia i latou e le Atua. Sa avea i latou ma paionia i upu ma mafaufauga ma galuega ma le faatuatua, e pei o i latou sa sili atu ona faaeaina. O le fausiaina o lenei nofoaga i autafa o mauga e lei faia faalilolilo e ni nai vaega filifilia ae e se vaega toatele mai atunuu e tele, o e na o mai ma galulue ma fausia, ma mulimuli ma le faamaoni i o latou taitai ua tofia mai le lagi. …
O nei agaga lotomaualalalo ae maoae, … Ou te faailoa atu ai ma le agaga lotomaualalo lo’u alofa, ma lo’u faamamaluluga migao.