Pau Lea o Le Mea na Faasaoina ai A’u
E alala le tusitala i Tokyo, Iapani.
O se faauoga sa lei mafaufauina sa fesoasoani ia te a’u e suia lo’u olaga mai le pogisa i le malamalama.
Ata na tusia e Pat Kinsella
O le taaga polo o se taaloga lauiloa i Iapani, o lea, sa ou amata taalo ai ina ua 14 ou tausaga e avea ma auala e faaalu ai le taimi faatasi ai ma lo’u tama. Sa malie lava mai le amataga, ma na iu lava ina amata ona ou faataitaia na o a’u ma taalo ai i ‘au ta polo i la’u aoga maualuga. Sa ou faauo atu i a’u uo taaalo ma faiaoga, o e sa faamalosiau mai ia te a’u e faaauau la’u miti o le avea ma se ta polo faapolofesa.
Sa ou galue malosi, e le na o le faaleleia o lo’u taalo ae i a’u meaaoga, faauu ai e latalata i le pito i luga o la’u vasega o le aoga.
Ina ua ou faatoa ulufale atu i le kolisi, sa ia te a’u se sootaga maoae ma lo’u faiaoga o le ta polo ma le ‘au taaalo. Sa sili atu ona lelei i latou nai lo a’u, o lea sa ou faia ai mea uma ou te mafaia ina ia ou lelei foi e pei o i latou. Sa tuuina mai e nisi o le ‘au taaalo ni manatu lelei i le tulagaese o lo’u igoa muamua, o Shuho. Sa ou tau atu ia te i latou, o lo’u tinamatua Korea sa tuuina mai ia te a’u ma i le faakorea o lona uiga o le “mauga matagofie.” Mai i lena lava taimi sa ou lagonaina e pei ua sui o latou uiga ia te a’u, o le aafia le lelei ai i feteenaiga sa i ai lava iina mo le fia augatupulaga i le va o nisi o i Iapani ma Korea.
Sa amata ona latou valaauina a’u “o le tamaitiiti Korea” ma faapea mai o le a ou faaleagaina le igoa lelei o le iunivesite. Nai lo le faatagaina o a’u e taaalo faataitai faatasi ma i latou i le taaga polo, sa latou aveina a’u e faamama ia faleletaua.
Sa oo ina faateteleina le faigata o le faatasi ai ma le ‘au. O le mamao ese mai le aiga, sa ou lagona ai ua pei ua tuua na o a’u. Sa ou taumafai e uumau pea i la’u miti ma toe taumafai ia fiafia mai la’u faiaoga ma le ‘au ia te a’u, peitai ina ua mavae le lua tausaga, sa le mafai ona ou toe tatalia o latou uiga faasaua, o lea sa ou toe foi ai i le fale.
Sa avea ma se taimi pogisa lea mo a’u. Sa i ai i faanoanoaga ni aafiaga faalemafaufau ma faaletino. Sa tuuitiitia lou tulaga faaletagata mo le lua tausaga. O la’u miti e avea o se tagata ta polo faapolofesa ua i ai lea i le faamutaina. Ou te lei iloa po o le a le mea e fai i lo’u olaga. Ma sa ou ita. Sa ou ita i tagata uma: o le faiaoga, o la’u ‘au ma o’u matua. Sa matuai ou ita lava, ma sa ou fefe i o’u mafaufauga. Sa leai ni a’u uo, ma sa ou lagona sa le mafai ona ou faatuatuaina pe fegalegaleai ma isi tagata. Mo le ono masina, sa na o le taimi e faamalositino ai i le faletaalo na ou tuua ai le fale.
I le taimi o lenei vaega pogisa o lo’u olaga, sa ou faia ai se faauoga ma Justin Christy, o le sa ou feiloai i ai i le faletaalo. Ina ua ou faatoa vaai ia te ia, sa ou faapea o ia o se tagata aoga mai fafo. Sa ou tau musu e talanoa atu ia te ia seia oo ina ou vaai atu o loo ia talanoa i se tagata i le faletaalo ma sa maofa e faalogo atu sa ia tautala faasapani. Sa ou lagonaina pea le le mafai ona faatuatuaina nisi tagata, ae sa ia fautua mai ma te toleni faatasi. Sa i ai se mea sa ese e uiga ia te ia ou te lei malamalama ai i lena taimi. Sa ou lagona le toafimalie pe a ou i ai faatasi ma ia. Sa amata ona ou tulimatai atu i le taimi ma te toleni faatasi ai. Sa ou mauaina se tasi sa ou lagona e mafai ona ou talitonuina e avea o se uo.
Ina ua maea le toleni faatasi mo ni nai masina, sa valaaulia a’u e Justin i se ‘aiga o le afiafi faalevaega lea sa ia auai atu soo i ai. Sa ou tau musu, ae i le mavae ai o ni nai valaaulia sa ou filifili ou te alu i le mea na iu ina avea o se ‘aiga o le afiafi mo le autalavou nofofua matutua i le maota o Richard ma Corina Clark. Sa latou faafeiloai a’u ma le alofa ina ua ou ulu atu i lo latou fale, o Brother Clark i le faasapani ao Sister Clark i le Igilisi. Ou te lei malamalama i lana tala sa fai mai, ae sa ou taumafai e tali atu ia te ia. E ui lava o nisi o tagata sa i ai iina e lei tautatala faasapani, ao i latou o se vaega fiafia e alolofa o e sa agalelei ma fiafia. Sa tele le taliega.
Sa amata ona auai i isi gaoioiga a talavou nofofua matutua ma ou te lei maua lava se fiafiaga tele faapea ma nisi tagata i lo’u olaga. Sa ou mafaufau po o le a se mea e uiga i nei tagata ua mafua ai ona latou agalelei tele ma fiafia.
I lea taimi sa fesili mai ai Justin ia te a’u po o le a se mea ou te manao e fai i lo’u olaga. Sa ou ofo i le iloa ai ua amata ona sui a’u sini. Sa ou tau atu ia te ia sa ou manao e aoao e tautala i le gagana Peretania, ma sa ou manao e avea ma se uo i tagata uma, e pei o ia. Na ia tau mai ia te a’u e uiga i vasega Igilisi e le totogia i lana ekalesia. Sa ou alu i le vasega Igilisi ma feiloai ai i faifeautalai. E ui lava ou te lei mafaufau lava e uiga i le Atua, sa ou lagonaina e tatau ona ou faalogo i faifeautalai. Sa la aoao mai ia te a’u mataupu faavae autu o le talalelei ma valaau mai ia te a’u toetoe lava o aso uma. Sa avea i laua ma a’u uo lelei, lea sa ou matua fiafia ai lava aua sa le toatele tele ni a’u uo.
Sa amata ona ou feiloai i le toatele o tagata o le Ekalesia o e sa matou i ai faatasi ai i lesona a faifeautalai ma avea i latou ma ni uo lelei. Sa latou aoaoina a’u i le talalelei ma faia le faataitaiga mo a’u. Sa talanoa mai Justin ia te a’u e uiga i le Tusi a Mamona ma faamatala mai ia te a’u tala mai le Tusi a Mamona ina ia ou fia faitauina mo a’u lava ia. Na talanoaina e se isi uo, o Shingo, o le e silafia lelei, ia aoaoga faavae faatasi ma a’u i se auala sa faigofie mo a’u ona malamalama ai. E na te faasoa mai lava i taimi uma lana molimau i le faaiuga o a maua talatalanoaga.
Ua ou mauaina se mea ua ou talitonu i ai ma se nofoaga ua ou lagona ai le talileleia o a’u. Ina ua uma ona ou papatiso ma faamauina, sa amata ona ou mafaufau e uiga i le auauna atu i se misiona, ae sa ou popole e uiga i le tuuto atu o le lua tausaga i ai. Sa ou talanoa i le toatele o tagata e uiga i le auauna atu i se misiona, ae maise lava a’u uo ua maea a latou misiona. Sa ou mafaufau tele e uiga i ai, ma sa ou iloa o le talalelei e na o le pau lea o le mea e mafai ona faasaoina ai a’u.
Ou te iloa na tuuina mai e le Atua mea uma ia te a’u: o a’u miti, faamoemoega, o uo, ma aemaise lava le alofa. Sa fesoasoani le talalelei ia te a’u e alu ese mai le pouliuli i le malamalama.
O Le Auala na Ou Faasoa ai le Talalelei ia Shubo
Saunia e Justin Christy
Ina ua ou feiloai ia Shuho i le faletaalo, sa ia fai mai e manao e aoao le gagana Peretania ma alu i se polokalama faafesuiai o le ta polo. Sa ou tau atu ia te ia e uiga i vasega faaPeretania i le lotu, ae sa alu ni nai vaiaso faatoa mafai ona ma auai ai. I lea taimi, sa ma toleni faatasi, sa ma talatalanoa soo e uiga i autu o le talalelei, e uiga i le Tusi a Mamona, ma e uiga i le olaga i se tulaga faalauaitele.
O faauoga ma faataitaiga a tagata o le Ekalesia na ia feiloai i ai na tosina ai o ia ma fesoasoani ia te ia e aoao e uiga i le talalelei. O le Agaga lava e taitaiina atu ai i le liuaina: pau le mea tatou te faia o le tauina atu o le savali ma lagolago tagata a o latou filifili mo i latou lava.
Sa masani ona faigata ia te a’u le mafaufau e uiga i le faasoaina atu o le talalelei. Ae ua ou iloa afai e tau lava ina amata ona tatou talanoa atu i le taimi sa’o, o le a tatou maua ni avanoa faafaifeautalai. Pau le mea tatou te faia o le valaaulia o tagata i se gaoioiga a le lotu po o se fonotaga. Afai e sogasoga o tatou, o le a i ai pea avanoa e faasoa atu ai le talalelei.