O Lau Malaga Faapaionia—o se Mea Moni, e Le o se Mea Faafoliga
O le avea ma se Au Paia o Aso e Gata Ai o le avea lea ma se paionia.
Ata na tusia e Brooke Smart
Ata o le savaliga sopo mai faaaloaloga a Aaron West
A o o’u laitiiti, sa ou faafoliga i nisi taimi e avea ma se tagata lauiloa i taaloga. Sa ou faafoliga e mafai ona ou lele. Sa ou faafoliga o a’u o se sauai. Sa ou fiafia i lo’u olaga, e ui lava ina ou puupuu, le mafai ona lele, ma e le tele se tomai i afeleti. Ae sa manaia le faafoliga. Sa ou fiafia e oo i se mea e ese atu, e tusa lava pe sa na o lou mafaufau i ai. Ou te matea o le mafuaaga lena e toatele ai tagata e fiafia e faafoliga.
O le talanoa ai e uiga i le faafoliga, o i tatou o le Au Paia o Aso e Gata Ai e fiafia e o i savaliga sopo faapaionia. Tatou te ofuina ni lavalava paionia (e tai pei lava). Tatou te tosoina ni taavale tosolima paionia (e tai pei lava). Tatou te taumamafa i meaai paionia (ia, e le tutusa lava). Tatou te faia se taumafaiga tele e faafoliga o ni paionia. O le mea e maofa ai e tau le manaomia ona tatou faafoliga. O i tatou lava o ni paionia.
Na saunoa mai Peresitene Thomas S. Monson, “O le avea ma se Au Paia o Aso e Gata Ai o le avea ma se paionia, aua o le faauigaga o se paionia o le ‘o se tasi e alu muamua e saunia pe tatala le ala mo isi e mulimuli ai.’”1 Na aoao mai i tatou e Peresitene Monson, e ala i ana saunoaga ma ana gaoioiga, i le auala e avea ai ma ni paionia moni:
“Tatou te mulimuli i tulagaaao o le Paionia tupito—e oo lava i le Faaola—o le na muamua atu, o loo faaali mai ia i tatou le ala e mulimuli ai.
“‘Sau, mulimuli mai ia te au,’ sa Ia valaaulia.”2
Sau … mulimuli mai … ia te a’u. O nei upu faigofie e mafai ona fesoasoani ia i tatou ia avea ma ni paionia moni.
Sei o tatou tagai i upu nei mai le vaaiga a paionia o aso nei o e sa malaga talu ai nei i se savaliga sopo faapaionia faalesiteki.
“Mulimuli Mai ia te Au”
E oo mai le upu o se valaaulia. O loo fautua mai ai le faatinoga mai le tasi nofoaga i le isi. E iloa lelei lava e Taylor A. le uiga o lenei upu.
O Taylor e atamai, fiafia, ma tumu i le Agaga, ae e vave ona ia tau atu ia te oe e le mafai ona faamatalaina e na upu lana lua tausaga ua mavae. Ua ia siitia atu i se isi nofoaga i le taimi nei, faaleagaga ma le faaletino. O ia o se paionia.
“O a’u o se paionia i lo’u olaga,” o lana tala lea, “ona o au o se tagata faatoa liliu mai. Ma o la’u faigamalaga e matuai maoae lava. Ou te lagona le pei o se olaga fou atoa. Ma o le taimi lava tatou te faia ai lena laasaga muamua i la tatou faigamalaga, e tutupu vavega.”
E le gata ina malamalama Taylor i le valaaulia e sau—na te iloa le mafuaaga o le valaaulia. Na ia faapea mai, “I lo tatou lalolagi, tatou te le o taulai atu i mea ua ala ai ona tatou i ai iinei, e sa’o? Ua matele ina tatou taulai atu i a tatou galuega ma tekinolosi, ma o se savali na matua taia ai a’u talu ai nei o le faamuamua lea o Keriso. A tatou mulimuli i mea na faia moni lava e paionia—[sa latou] taulai atu ia Keriso.”
Mulimuli o se isi lea valaaulia. I le savaliga a paionia, na maua ai e Etana G. se malamalamaaga sili atu o lenei upu. “O nisi taimi ou te lei mauaina se faalogona lelei i le savaliga, pe sa ou tau lagonaina le tau faavaivai,” sa ia tauina mai. “Ae na ou iloaina ai na faapena foi lagona a le au paionia.”
Na masani ona mafaufau Etana pe aisea na naunau ai le au paionia e faia le mea na latou faia. Sa ia fai mai, “Sa ou lagona sa sili ai lava lo’u faavaivai. Ae a o o’u mafaufau i ai, sa ou iloa ai ona sa latou alolofa i le Faaola, ma sa i ai so latou faamoemoe e mafai ona latou lelei atili e ala ia te Ia. Ou te fia faataitai foi i ai.”
Ao lei alu Etana i le savaliga, sa ia faitau e uiga i paionia mai le taimi ua tuanai, lagona se fesootaiga ma i latou, ma sa musuia lo latou faatuatua e mulimuli ia Iesu Keriso. Ma o le a le mea o loo faia nei e Etana? O loo ia sauniuni ia maua se valaauga e auauna atu o se faifeautalai faamisiona. O le usiusitai i le fautuaga a Peresitene Monson, o loo ia sauni e faaali atu i isi le ala e mulimuli ai.
O fea e tatau ona tatou i ai? O ai e tatau ona tatou mulimuli i ai? Sa fetalai mai le Faaola ia i tatou: “Sau, mulimuli mai, ia te a’u” (Luka 18:22; faaopoopo le faamamafa). Ina ua tuua e Haramoni lona aiga mo le savaliga, sa ia vaaia aao o le Alii i lona aafiaga. Sa ia iloaina o loo ia mulimuli ia te Ia.
O le auala a Haramoni i le savaliga a lana siteki sa ese mai isi auala. I le 15 o ona tausaga sa ia iloaina ai sa maua o ia i le kanesa o le pau e le taatele. Sa le mafai ona ia auai i le savaliga a lana siteki. “Sa ou lotovaivai,” sa ia manatuaina.
I le fa tausaga mulimuli ane, ina ua fofogaina mai e lana siteki se isi savaliga, ua le o toe maua Haramoni i le kanesa. Peitai ona ua 19 o ia, sa ia faapea e le mafai ona ia alu. Ona ia mauaina lea o se valaauga e auai o se taitai. Sa ia fai mai, “O se molimau ia te au ua silafia e le Alii i tatou, ma na te silafia manaoga o o tatou loto, ma afai e amiotonu ma lelei, o le a Ia faamanuiaina i tatou.”
Na ofoina mai e Haramoni se fautuaga e fesoasoani ia i tatou pe a tatou fetaiai ma tofotofoga: “Mo soo se tasi o loo tauivi, ou te fai atu tau lava o le faalagolago i le Alii. E i ai lava pea o Ia iina mo oe. E alofa o Ia ia i tatou, ma Na te le tuua i tatou ia pauu. Tau lava o le aapa atu o otatou lima ia te Ia, ma o le a Ia fesoasoani ia i tatou i la tatou malaga faapaionia.”
E Mafai ona Avea Oe o se Paionia
Afai e te lei alu lava i se savaliga sopo faapaionia, e mafai lava ona avea oe o se paionia. E le manaomia lou faia o se pulou po o le tosoina o se taavaletosolima. Tau lava o lou mulimuli ia Iesu Keriso, e pei ona faia e le au paionia anamua. O le faia o lena mea, o le a e avea ai, e pei ona saunoa mai Peresitene Monson, “o se tasi e alu muamua e saunia pe tatala le ala mo isi e mulimuli ai.”
Afai e te maua se avanoa e alu ai i se savaliga sopo faapaionia, fiafia i ai! Ma pe a uma, ma e tuua lau taavaletosolima, aua nei tuua ai i totonu lau molimau faapaionia. Sau ma aumai lena molimau ma oe.
O oe o se paionia moni o le olaga, o nei ona po. Faatasi ai ma le Paionia Tupito—le Faaola—e avea ma ou taiala, e mautinoa lava le faamanuiaina o oe!