O Leo o Le Au Paia o Aso e Gata Ai
O Le Tietie ma le Faasoaina Atu o le Talalelei
Ata na tusia e Alan Baker
O le tietie atu i nuu maotua o Peretania sa filemu ma toafilemu i lo’u agai atu i le lotu i se tasi taeao o le Aso Sa. I luga o le ala, sa ou vaaia ai se tamaitai matua i autafa o le auala. Sa ao ona ou filifili vave pe tu ma vaai pe na te manaomia se taavale.
Sa ou lagonaina e tatau ona ou tu. Sa ia tau mai ia te a’u o lona igoa o Maria ma fai mai faatoa ia taunuu lava i lena nofoaga. Sa ou iloaina o ni nai sekone mulimuli ane mo ia po o ni nai sekone muamua atu mo a’u semanu ma te misia le tasi ma le isi. Na fetaui lelei lava le taimi!
Sa ia tau mai ia te a’u le nofoaga e fia malaga i ai, ma na latalata i le falesa. Sa ou ta’ua o loo o’u agai atu i le lotu ma fesili pe sa ia faalogo e uiga i le Ekalesia. Sa ia fai mai e i ai lona faatuatua ae laitiiti lava se mea na te silafia e uiga i le Au Paia o Aso e Gata Ai. Ao ma malaga atu sa ou faasoa atu le talalelei ia te ia.
Ina ua ou tuua Maria, sa ou fai i ai e mafai ona ou toe avea o ia i le taimi e maea ai le lotu. Sa ia taliaina, ma sa ma faatulagaina le taimi e feiloai ai i le falesa. Ina ua ou savali atu i totonu o le lotu, sa ou maua ai faifeautalai ma talosaga atu mo se kopi o le Tusi a Mamona e tuu atu i la’u uo fou. Mulimuli ane, ina ua ia taunuu mai i le falesa, sa agalelei tagata o le Ekalesia ma faasoa atu a latou molimau ia te ia.
I le toe foi ai sa ou tau ia Maria e mafai ona ia aoao atili e uiga ia Iesu Keriso e ala i le faitauina o le Tusi a Mamona. Sa ou tau atu foi ia te ia le mea e maua ai le tala e uiga i le faaali atu o le Faaola i sa Nifae. E ui ina itiiti sona aafiaga ma le Au Paia o Aso e Gata Ai, sa ou iloaina sa ia lagonaina se mea. Sa ou tuua Maria i le nofoaga sa ma feiloai ai. Ou te lei faamoemoe ou te toe vaai ia te ia.
Ina ua ou agai atu i le fale mai le galuega i le aso na sosoo ai, o se auala ‘alo na mafua ai ona ou aveina atu le taavale i lalo o se auala e le masani ona ou alu ai. I lou tei, sa ou toe vaai ia Maria! Ina ua ia vaai mai ia te a’u, sa ataata o ia. Sa ou fiafia e ofo atu se isi avanoa ia te ia e tietie ai i le taavale.
Ou te lei toe vaai lava ia Maria talu mai lena taimi, ae a o ou manatuaina lenei aafiaga, ou te faafetai ua saunia e le Alii se avanoa mo a’u e faasoa atu ai le talalelei. Ou te iloa e faamanuia i tatou e le Alii i Lona taimi talafeagai.