Ina Ia Tasi i Latou

Ia suesue ma le agaga tatalo lenei savali ma saili ia iloa mea e faasoa atu. E faapefea e le malamalama i le faamoemoega o le Aualofa ona saunia afafine o le Atua mo faamanuiaga o le ola e faavavau?

Ata

praying in Relief Society

Sa aoao mai Elder D. Todd Christofferson o le Korama a Aposetolo e Toasefululua, “Na maua e Iesu le faaatoatoaina ia tasi ma le Tama, ona o le gauai atu o Ia lava, i le tino ma le agaga, i le finagalo o le Tama.”

“O le mea moni lava o le a le mafai ona tatou tasi ma le Atua ma Keriso, sei iloga tatou te avea o Laua finagalo ma faamoemoe, e fai ma o tatou faanaunauga sili. O lea usiusitai e le mafai ona ausia i se aso se tasi, peitai e ala mai i le Agaga Paia, o le a aoaoina ma taitaiina i tatou e le Alii, pe afai tatou te naunau i ai, seia oo i le taimi tonu, e mafai ona faapea mai ai ma le faamaoni, o Ia ua i totonu ia i tatou, e pei o le Tama o i totonu ia te Ia.”¹

Ua aoao mai e Linda K. Burton, Peresitene Aoao o le Aualofa, le auala e galulue ai e agai atu i lenei lotogatasi: “O le osiaina ma le tausiaina o a tatou feagaiga o se faailoaga lea o la tatou tautinoga ia avea faapei o le Faaola. O le talitonuga o le taumafai lea mo uiga ia ua sili ona faailoa mai i nai fuaiupu o se pese e sili ona ou fiafia i ai: “Ou te alu i mea e te tofia. … Au afioga ou te alaga. … Avea a’u pei na e tofia.’”²

Na faamanatu mai foi ia i tatou e Elder Christofferson e faapea “ao tatou taumafai i aso taitasi ma vaiaso taitasi e mulimuli atu i ala o Keriso, e puipuia e o tatou agaga lona malosi ma le mafai e faatoilaloina ai o tatou tagata o le lalolagi, ma o le a faatoilaloina le taua o i totonu, ma o le a le toe faalavelave mai faaosoosoga.”³

Ua molimau mai Neill F. Marriott, Fesoasoani Lua i le Au Peresitene Aoao o Tamaitai Talavou i faamanuiaga o le taumafai ina ia ogatusa lo tatou loto ma le finagalo o le Atua: “Sa ou tauivi e lafoai le manao faaletino ia faia mea i la’u lava ala, ma iu ai ina ou iloa o a’u ala e matua le lava lava, e utiuti, ma e le taitai i le ala a Iesu Keriso. ‘[O Lona ala o le auala e tau atu i le fiafia i lenei olaga ma le ola e faavavau i le lalolagi a sau.’”⁴ Sei o tatou taumafai ma le lotomaualalo ina ia tasi ma lo tatou Tama Faalelagi ma Lona Alo, o Iesu Keriso.

Mau Faaopoopo ma Faamatalaga

Ioane 17:20–21; Efeso 4:13; Mataupu Faavae ma Feagaiga 38: 27; reliefsociety.lds.org