Riiki Bwa Ana Reirei Iesu ni Koaua

Iroun Beretitenti Henry B. Eyring

Moan ni Kauntira n te Moan Beretitentii

Ni katoa bootaki n toa, e reke ara tai ni berita nakon te Tama are i Karawa bwa ti na ururingnga n tainako te Tia Kamaiu ao ni kawakin Ana tua bwa e aonga ni memena Tamneina iroura (taraa Moronaai 4:3; 5:2; D&C 20:77, 79). Ururingakina e na aki toki n roroko nakoira ngkana ti katoka Arana iaora. Ti katoka Arana iaora ni kawai aika mwaiti ma ti ngkana ti beku ibukiia tabeman n Arana, wareki Ana taeka aika tabu, ao n tataro bwa ti na ataa te bwai ae E na tuangiira bwa ti na karaoia.

E riki aio nakoiu ngke I karaoa te bwabetito iroun te ataeinimwaane. I ataia bwa I a tia ni weteaki iroun ana toro te Tia Kamaiu ae a tia ni katabuaki bwa te mitinare ae na reirei Ana euangkerio ao ni kakoaua Ibukina ao n Ana Ekaretia ae koaua. Toau ni mitianre ao ngai ti a tia ni berita nakon te ataeinimwaane bwa e na kaitiakaki rinanon mwaakan Ana Mwakuri ni Kamaiu Iesu Kristo ngkana e rairananona ma te onimaki inanon te Tia Kamaiu ao ni bwabetitoaki iroun temanna Ana toro ae a tia n anganaki te kariaiakaki.

Ngke I tabekaa rake te ataeinimwaane mai inanon te nei ni bwabetito, e wirikiriki nakon taningau, “I a itiaki, I a itiaki.” N te tai anne, I uringa ana bwabetito te Tia Kamaiu iroun Ioane are te Tia Bwabetito n te karaanga are Ioretan. Ae raka riki, I uringnga bwa I karaoa Ana mwakuri ni kamaiu te Tia Kamaiu ae mangauti ao ni maiu—ae raonaki iroun te Tamnei ae Raoiroi, n aron ae karaoia Ioane.

Ibukiu ao ibukira n tatabemaniira nako, urungakin te Tia Kamaiu e kona n raka riki nakon onimakinan ara ururing n ara atatai ao ara taneiai ma ngaia. Ti kona ni karaoi rinerine ni katoa bong are e na kaniira riki nako Ina ngkai naba.

Te kabanea ni bebete n rinerine bon warekan booki aika tabu. Man karaoan aei, ti kona ni karekea te namakin ni kaan nako Ina. Ibukiu, e roko ni kaan n angiin te tai ngkana I wareware inanon Ana Boki Moomon. N te moan ni miniti ngke I wareware ni mwakoro te 2 Nibwaai, I ongo n au iango bwanaan Nibwaai ao Riaai ni kabwarabwara te Atua n ae kanga a Kinaa raoi. Te namakin ni kaan e roko.

Ibukim, taabo tabeua inanon booki aika tabu e kona n ae onoti ni kaniiko riki nako Ina. Ma ia ao n te tabo raa ae ko wareka iai ana taeka te Atua, ma te nanon ae nanorinano ao ni koaua n uringa te Tia Kamaiu, ko na karikirakea nanom ni katoka Arana iaom ni maium ni katoabong.

Te nano anne e na bita arom n ibuobuoki n ana Ekaretia te Uea. Ko na tataro nakon te Tama are i Karawa ibukin te ibuobuoki ni kakorakora riki te bwai ae ko iangoia bwa te mwakuri ae aki kakawaki. Te ibuobuoki ae ko na bubuti ibukina bon te konabwai n tabeakiniia riki tabeman ao n iangoa riki te bwai ae tangiria te Tia Kamaiu ibukiia naake ko weteia bwa ana beku.

I a tia n namakina Ana kairoro ao Kaanna riki n au mwakuri ma au ataei ngkana I tataro ibukin buokaia ni kakaea te rau are e ti reke n te euangkerio. N te tai anne, I aki rangin n tabe n noorakiu bwa te karo ngai ae nakoraoi, ma te bai ae I tabe riki iai bon aron aia kekeiaki ao maiuraoia natiu.

Te nano ni kan anga nakoia naake ti beku ibukiia te bwai ae na anganiia te Tia Kamaiu are e kairiia nakon taian tataro ni koaua nakon te Tama are i Karawa, ni koaua n aran Iesu Kristo. Ngkana ti tataro n te kawai anne—n aran te Tia Kamaiu, ma te onimaki Irouna—e na kaeka te Tama. E kanakoa te Tamnei ae Raoiroi bwa e na kairiira, karau nanora, ao ni kaungaira. Bukina bwa e aki toki te Tamnei ni kaota koauan te Tia Kamaiu (taraa 3 Nibwaai 11:32, 36; 28:11; Ita 12:41), arora n tangira te Uea ma nanora ni kabanea, ara iango ni kabanea, ao ni korakorara ni kabanea a na rikirake (taraa Mareko 12:30; Ruka 10:27; D&C 59:5).

Kakabwaia ni katoabong ao ururing aika teimatoa a na roko ni karaurau ao n teimatoa ngkana ti beku Ibukina, kawakin Ana taeka, ao n tataro ma te onimaki n Arana. Ao te ururing aei e na kakorakoraira n riki bwa ana reirei ni koaua te Uea Iesu Kristo n Abanueana iaon te aba aei—ao imwiina ma Tamana n te aonaaba ae kakimwareirei ae na roko.