2017
E Tabeaianga te Tama are i Karawa n Au Bitineti ibukin Maiura
October 2017

E Tabeaianga te Tama are i Karawa n Au Bitineti ibukin Maiura

Buyisile Zuma

KwaZulu-Natal, Aberika Maiaki

woman sewing

Kamataata n te tamnei iroun Allen Garns

Bukina bwa te tina ngai ae akea buu ao niiman natiu, I namakina te tabe ae korakora ibukin maiuia au utu. I ibuobuoki ni kaitiaki, ke n tararuai mwengaia aomata ibukin karekean ara mwane ma e aki tau au mwane n au mwakuri ibukiia au utu. I karin n te kurubu n toronibwai bwa I aonga n ataia bwa n na kanga ni kanakoraoa au kaangaanga.

E karekei iango n ibuobuoki aika mwaiti man te kurubu n toronibwai aei “Moanakin ao Karikirakean Au Bitineti” ao n iangoia bwa I kona n itui ao ni kaboinakoi baeki ni kuuka ibukin te aeka ni bwaata (ae kabueaki n te iti) ae kabonganaaki ni kuukana te amwarake ni karaurau inanon tabeua te aoa. (Ibukin au bitineti) n na waei baeki ni bwakanako n tai n te tairiki imwiin okiu nakon mweengau man au mwakuri n te ngaina.

I mwakuri ni bwakanako n tai ni katia te oota ae bubura are e na tia n te moaningabong are imwiina ngke e a uruaki naba au mitiin n itutu. Bon te nukanibong, ngaia ae akea te mwakaeneke ae tauraoi n ibuobuoki. E roko te mitiin ma ana bwai ni mwakuri ae uarereke, ma I tuai kakaraoa te mitiin n itutu mai imwaina. Akea au iango bwa n na waeki mai ia.

Ngkanne te reirei inanon te boki n reirei Aau ae atunaki “Exercise Faith in Jesus Christ (Kamwakura te Onimaki iroun Iesu Kristo)” e roko n au iango. N te tai anne, I ataia bwa I kainnanoia n rinea te Uea ae Iehova bwa neu ni kamaiu. I katorobubua ao n tataro: “Tamau are i Karawa, taiaoka buokai ni katia te mitiin aei bwa I aonga ni karaoa te oota ibukin au katitamwa ae na anaia n te moaningabong. Te Tama are i Karawa, e buokai!”

Ngkanne I karekea te wirikiriki ae itiaki bwa n na anaa te tukuruu turaiwa man te bwaoki ni bwai ni mwakuri ao ni kabongana ni butua bwain te mitiin n itutu ae onoti. I karaoia, ni kabanea iaona au onimaki. I taua ikeu ngke I kamaiua te mitiin. E mwakuri!

I a kona ni katia te oota n taina are e kaantaningaaki iai. I kunea aron karekean te Tama are i Karawa ao Iesu Kristo bwa raom ni bitineti. I ataia bwa n na teimatoa ni kakabwaiaaki ngkana I ukoukori taai ni karaoa te bwai ae I a tia n reiakinna n te kurubu n toronibwai.