Kakaean te Buoka imwiin Maten Nancy
E maeka te tia korokaraki i Georgia, USA.
Tera ae I kainnanoia ni karaoia bwa e aonga ni kakorakoraki mwaakan ana kamaiu Iesu Kristo inanon maiu?
Kamataata n te tamnei iroun Iker Ayerstaran
Ni Beberuare 2016, buu ae Nancy e mate imwiin 11 te ririki ni ikakorakora ma te kaentia ni mammana. Rawawatan korakoran te nanokawaki are I namakinna ni moan te namwakaina are e mate iai e kaangaanga aron kabwarabwarakina nakon te aomata are e tuai n rinanon te aekaki ni bua aei. Te nanokawaki, te iango n rawawata, te kainnano ae korakora, te maraki—akea mai buakon taeka aikai ae tau ni kabwarabwara au namakin n te tai anne. E kaangaanga keiakinana.
Mwaakan ana Kamaiu te Tia Kamaiu
N te tai ae maan I mataata raoi bwa Iesu Kristo e ruo ni kamangoria iaan bwaai ni kabane (taraa D&C 88:6) bwa E aonga ni ko na “ni buokiia [anga te buoka ke ibuobuoki nakoia ana aomata ni kaineti ma mamaaraia” (Aramwa 7:12). Nanon aei bwa mwaakan ana Mwakuri ni Kamaiu te Tia Kamaiu e korakora riki nakon katauraoan te Mangauti ao ibukin te kabooaki man te bure. Rinanon te mwaaka aei, E kona naba ni kamaiuira inanon ara tai ni korakai ao ni kainnanora. Inanon nanokawakiu, I waekoa—n raraoma—ni kataia n reiakinna tera ae I kainnanoia ni karaoia ni kakorakora aekakin mwaakan te Tia Kamaiu aei inanon maiu. Inanon wiiki I ukoukori booki aika tabu ao aia taeka Mataniwi ni Kabuta n te Ekaretia. I kakoaua raoi bwa, rinanon te korakai ao te maraki n anga karea Ibukina, te Tia Kamaiu e ataa te te maraki are I rinanona. Ma e kanga Ana atatai ni buokai? Ngkai e korakai n aei i bukiu, tera ae I kainnanoia ni karaoia ni karekea ana buoka are E ataia bwa rinanon korakaina e kanga ni katauraoia?
Imwiin te kakae ae bati, te kamatebwai, te tataro, ao te nebonebo n te tembora, I a moanna n oota. Te moan bwai, I moanna ni mataata riki n au taratara bwa te Uea e a kaman tia n ibuobuoki, karaunano, ao ni boutokaia ara utu, ai moararariki inanon wiiki imwaain maten Nancy. Iai atatai n tamnei aika kamiimi ake I kinai ngkai n te tai aei ake a riki bwa kakabwaia ake a roko man te mwaaka ni kamaiu ao te kakorakoraki are e tauraoi nakoira ibukin ana Mwakuri ni Kamaiu te Tia Kamaiu. Ao n tii ataakina bwa e a kaman tararuaira raoi te Tia Kamaiu ni kawai aika onoti, mai iai, e korakora te karaunano. N aron Tiateraka, Metiaka, ao Abeteneko ake ngkoa, E raoniira inanon te “nenikanaiai ae e uramwaaka te ai iai” (Taniera 3:17) ibukin karawawatakira.
Onimakina te Uea
I reiakinna naba bwa iai bwaai aika kainnanoaki mairoura bwa ti aonga ni karekea ana karaunano te Uea ma ana kamaiu. Ae kakawaki riki, ti riai n onimakinna. Anne e kona n riki bwa te bwai ae kaangaanga karaoana. Bukin tera I riai n onimakina te Atua ngke E kona n totokoa maten Nancy n te moan tai? Ni kaekaan te titiraki aei, I reitinako n iangoa te bwai are e tuangaki te Burabeti ae Iotebwa Timiti iroun te Uea:
E (te Uea) e taku bwa ti aki kona n noori ni matara n te tai aei ana babaire Atuara ni kaineti ma bwaai ake a na riki n taai aika a na roko, ao te mimitong are e na rimwiin karawawata aika mwaiti” (taraa D&C 58:3).
Ti kakabwaiaki ma kanikina aika mwaiti bwa n aron ao ana tai ni mate Nancy a bon kaineti ma ana kantaninga te Uea. I oota raoi bwa n ataakin ni kabane ao tangiran te Tama e kariaira bwa ti na korakai ni bwaai aikai ibukina, inanon Ana babaire ae kororaoi ibukin karietatakiia ara utu, te karawawataki aei bon te aro ae riai. N ataakin anne, I oota bwa tabeu n Ana babaire n aki tii teimatoa ma n teimatoa ni koaua (taraa D&C 121:8). N te mwaiti are I kona ni katabua te kataaki aei Nakoina, N na aki tii buokaki ma N na katabuaki naba. I a tia n rinanon te taneiai aei ni kawai aika mwaiti.
I a tia n reireniia natira bwa a na karaoa te bwai are I reiakin ni waakinan aei i bon irou.
-
Kariaia te maraki imwiin taneiai aika kaangaanga a na kaunagako n riki bwa ana reirei ae moan te korakora.
-
Kabanea nanom n tataro.
-
Ngkana ko un iroun te Atua ibukin kariaiakan kaangaanga bwa a na riki, onnon Nakoina n oneamwiin te un anne n te onimaki ao te kai ongo.
-
Karaoa te berita ae tabu bwa ko na tangiria ao ni kakaonimaki ni uaa te toki.
-
Kabatiaa kamwatebwaian ana taeka te Atua n reitinako—man booki aika tabu ao aia taeka ao aia koroboki burabeti ngkai ao taan reirei aika kaunga te nano.
-
Bwaruan te nako n te tembora ni kan reiakinaki bwaai ake a kaineti ma te maiu ae akea tokina.
-
Kakaeia aomata ake a rinanon te kaangaanga ae onoti are a kananououaaki n aia onimaki, ao kakorakoraia n aia koaua ibukin reirei aikai.
Ana Kakoaua te Abotoro
Tao teuana te namwakaina imwiin maten Nancy, e kaoti te tairiki are I a namakina te nanokawaki ae moan te korakora. I namakina te maraki ao te karawawataki ni kabwanina te bong anne. I uringa Unimwaane Jeffrey R. Holland man te Kooram n Abotoro n te Tengaun ma Uoman ngke e reirei bwa “kawain te kamaiuaki e kairiiraki raoi … rinanon Ketetemwane.”1 E ngae ngke e aki kona ni kabotauaki korakaiu ma te Tia Kamaiu, te tairiki anne I mena ibuakon oin au “tai ae kaangaanga ma namakinan te nanokawaki.”2
Imwiin rinanoan aei ibukin teutana te tai ao n tataro ibukin buokau, e kaoti te bwai teuana n au iango are I a tia ni warekia ao ni kawakinna n au kaombiuta tabeua te ririki n nako mai imwaaina. I kakaea te tabo are e mena iai te taokumente ao ni karuoarikaaki nakon te bwai are I kakaea. Bon te intawiu ma Unimwaane Richard G. Scott man te Kooram n Abotoro n te Tengaun ma Uoman (1928–2015) ike e titirakinaki iai taekan buan buna, ae Jeanene, n te kaentia n 1995. E kaeka Unimwaane Scott, “Te moan, … I aki kabua neiei. E mena n iteran te roki are te iterana. Ti a tia ni kabaeaki n rinanon te otenanti ae tabu inanon te tembora, ao ti na manga ikotaki n aki toki.”3
Kamataatan tamnein Atlanta Georgia Tembora
Te tairiki anne a kaoti taeka akanne ma te mwaaka are I bon tuai n namakinna mai imwaaina. Kanga ai aron te auti ni kaotaota ae te biikan ae e kauraaki n te tairiki ae rootongitong. I bon tuai man wareka te bwai ae aron aei ae iai korakoran mwiina iaou. E bua te rootongitong ao te maraki. Kanga ai aron Aramwa ngke e kona n “aki manga uring marakina” (Aramwa 36:19). Ana kakoaua te abotoro aei e ninianako kabin nanou. I miimi bwa te reirei are I mataata iai inanon uarerekeu e kona n taraa n rangin ni kamiimi. I kunea ni miimi bwa e kanga n riki ae Unimwaane Scott e ataa te bwai ae aekakin aei. Ao n te tai anne, I kunea bwa I ataia naba. Ngkana I kakaonimaki, I kona ni karekea te kantaninga ni kabane are e karekea Scott. E ngae ngke e a tia n riki te nanokawaki ao te tanginiwenei man te tai anne, I aikoa mang namakina te maraki ao te rawawata ae korakora are I rinanona n te tairiki anne.
Aei te mwaaka ae e anganiira te Tia Kamaiu ni buokiira inanon kataakira. I ataia bwa rawawataia ara utu e na aki mauna ni bwanin, ma e na ongaki n te bwai are ti aranna bwa kakabwaia man ana Mwakuri ni Kamaiu te Tia Kamaiu n te kakorakoraki ao te kakororaoaki.4 Ti kaniiaki riki nakon te Tia Kamaiu, n tia n namakina Ana kakoaua, ao n tia ni kamatoaki man matoan aan ara berita aika tabu.