Nakomai, Irirai—Ibukin te Bootaki n te Nakoanibonga ae te Merekitereka ao te Bootaki n Aine
E moanaki n Tianuare 2018
Kabwarabwaraan te atatai ae boou n te Tabati ibukiia ikawai
Inanon ririki, ti a tia ni kamatebwai rinanin aia reirei Beretitenti n te Ekaretia. Inanon 2018, ti na moana kamanenaakin rongorongo man te maungatabu ni kabuta ni kabotoi ara kamatebwai iaon aia reirei burabeti aika maiu, abotoro, ao taan kairiiri n te Ekaretia.
Kakaean Taian Kainnano
Kauntira ni Uoote
Beretitentii
Taan Reirei n te Mweenga ao Taan Reirei ni Kakawari
Kaai n Reirei ni Kabane ao n Reiakinaki man te Maungatabu ni Kabuta
Bootaki n te Tabati
Karaoa te Mwakuri ao Oki Ribooti
Te Atatai ae Boou n te Tabati
Inanon Tianuare 2018, bootaki n te Reirei n Tabati ibukin kooram n te Nakoanibonga ae te Merekitereka ao te Bootaki n Aine a na bitaki. Bitaki aikai a irekereke ma bwaai n reirei ake ti kabonganai—rinanin Aia Reirei Beretitenti n te Ekaretia a na oneaki mwiia ma katereterean te reiakinaki ae moan te korakora man rongorongo n te maungatabu ni kabuta, kaai n reirei ni kabane, ao ni kamatebwai atuun reirei aika onoti ake a rineaki mairouia ara mataniwi ni kabuta.
Ma te kabanea ni bitaki ae uaana e riai ni karaoaki bwa ti na kanga ni kamanenai bwaai n reirei aikai ni kakoroa nanon oin raoi te kantaninga n ara bootaki n te Tabati.
Oin Kaantaninga n Ara Bootaki
E a tia te Atua ni barongaia Natina mwaane ao aine ake a tia ni karaoi berita ma te Uea nakon kooram n nakoanibonga ao te Bootaki n Aine bwa aonga ni buoka kakoroan nanon Ana mwakuri. Iai te bwai ae korakora ae e na riki ngkana ti ikotaki iaan aia kairiiri naake a taui mwiin kiingin te nakoanibonga. Ngkai e kakawaki ana kaetieti te euangkerio, bootaki n te Tabati ibukin te nakoanibonga ao te Bootaki n Aine a raka riki nakon ae taian kiraati. A kamwakuri naba taian bootaki ake ti reiakinaki ni kabane man taian rongorongo n te maungatabu ni kabuta, reirei taekan te mwakuri ni kamaiu, ao ni baronga kakoroan nanon te mwakuri. Bitaki ake a na kaoti n 2018 a na buokiira ni kakoroa nanon kaantainga aikai.
Titiraki ma Kaekaaia
Te bitaki aei bon te karikiram ae boou—ke e raka riki nakon anne? Bwaai n reirei aika boou aikai a taraaki bwa kanga ai aron te karikiram, ma ngaia bon aanga ibukin karaoan kooram n te Nakoanibonga ae te Merekitereka ao Bootaki n Aine ni karikirakea aia kakamwakuri n ana mwakuri te Atua ao ni kakoroi bukin kainnanoia kaain te Ekaretia n te aba. Te bitaki aei e katauraoa te tabo ae tamaroa ibukin ataakin, reirei taekan, ao buokan kainnano akanne.
Tera ae ti na katurui ara taratara iaoia n tain bootaki n te Tabati? Ni moanaki n Nobembwa 2017, rongorongon te maungatabu ni kabuta man te Riaona ao Ensign e na kairaki inanona bwaai n reirei ake a na kamanenaaki inanon bootaki n te Nakoanibonga ae te Merekitereka ao te Bootaki n Aine. Uoua namwakaina ni bootaki a na katuruturuaki iaon rongorongo n te maungatabu, ao taan kairiiri ao taan reirei a na anganaki iango ibukin buokaia kaain te aro ni maroroakin ao ni maiuakin rongorongo akanne. Moan Tabati a na kabonganaki ni kaai n reirei ni kabane ni buoki kainnanoia kaain te Ekaretia n te aba ao kaaua n Tabati ni kamatebwai atuun rongorongo ake a rineaki irouia ara tia kairiiri ni kabuta. Tarai tain te bootaki n te namwakaina n te iteraniba are te iterana.
Tera ae nanonaki ni kaai n reirei ni kabane ibukin taekan kainnano n te aba? Kooram n te Nakoanibonga ae te Merekitereka ao Bootaki n Aine a “tekateka ni kauntira” (D&C 107:89) n te moan Tabati ni katoa namwakaina. Iaan aia kairiiri te nakoanibonga ke te Bootaki n Aine, bootaki n te moanTabati a kamanenaaki n atai kainnano ao ni kaai n reirei ni kabane bwa ti na kanga ni butimwaai kainnano akanne. Atuun rongorongo aika a kona n reke ibukin reirei n te moan Tabati e kaairaki inanona aron katamaroaan te reitaki ma kaain te utu, ni beku n te kaawa, ao ni kairiia kairake inanon te uoote ao n te mwaanga. Inanon bootaki ake imwiina, te kooram, kurubu n ibonga ae rietaata, ke te Bootaki n aine a na taorimwiiaki ma wirikiriki mai iroun te tamnei ae raoiroi ao mwakuri.
Te karikiram aei ti te arona ma are Nakomai, Irirai ibukiia kairake? E ngae ngke atuun rongorongo ao bwaai n reirei ibukin Nakomai, Irirai—Ibukin Bootaki n te Nakoanibonga ae te Merekitereka ao te Bootaki n Aine a kaokoro ma ake n Nakomai, Irirai ibukiia kairake, te anga n angareirei ao n reiakinaki bon ti te arona. Ibukin rongorongon riki taekan te reiakinaki n te euangkerio ao te angareirei, taraa Angareirei n Ana Kawai te Tia Kamaiu n teaching.lds.org.
Tiaki ngai te tia reirei n te kiraati n te taromauri. E riai bwa N na kabwakamwane nakon te Riaona ke Ensign? E na kakorakoraaki riki am atatai ngkana ko wareki rongorongo n te maungatabu ni kabuta ao n uoti nakon am bootaki n te Tabati. Ko kona n noori rongorongo i aonraain n te conference.lds.org ao n te Gospel Library app ke man te kabwakamwane nakon te Riaona ke Ensign (taraa store.lds.org).
Tera ngkana arona bwa e aki tauraoi te maekatiin ibukin te maungatabu ni kabuta n au taetae? Rongorongo n te maungatabu ni kabuta a tauraoi n taetae aika mwaiti n conference.lds.org ao n te Gospel Library app, ao karikiram ibukin bwaai n reirei a tauraoi n ComeFollowMe.lds.org. Ngkana n am taetae e aki karekei karikiram ibukin bwaai n reirei n te aonraain ke n te maekatiin, taraa Kaetieti ibukin Karikiram, 2018 ibukin rakan rongorongo.
N ningai ae ti na moana kamatebwaian rongorongo aika boou n te maungatabu ni kabuta? Ko na moana kamatebwaian rongorongo n te maungatabu ibukin Okitobwa 2017 n Tianuare 2018. Imwiin anne, am tia kairiiri n te aba a na bairea tain kamanenaan rongorongo man te maungatabu are imwiina—tao ni Meei ao n Nobembwa ni katoa ririki.
Antai ae rinei rongorongo n te maungatabu ni kabuta ake ti na kamatebwai? Am tia kairiiri n te aba a na kaai n reirei ni kabane bwa baikara rongorongo n te maungatabu ake ana buoka kainnanoia kaain am kooram, kurubu, ke te Bootaki n Aine. Te kurubu n ibonga ae rietaata, kooram n unimwaane, ao te Bootaki n Aine n te uoote ke mwaanga ae titebo a na bae ni kamatebwai rongorongo aika kakaokoro ni buoki kainnano aika kakaokoro.
Taai n Reirei n te Tabati ibukin Te Nakoanibonga ae te Merekitereka ao te Bootaki n Aine
E moanaki n Tianuare 2018
|
Atuun Reirei |
E kairaki man | |
|
Moan Tabati |
Kaai n reirei ni kabane ibukin kainnanoia kaain te Ekaretia n te aba |
Te Beretitentii ke taan kairiiri irouia ibonga aika rietaata |
|
Te Kauoua ao te Katenua n Tabati |
Te rongorongo n te maungatabu ni kabuta ae e a tibwa nako |
Te Beretitentii ke taan kairiiri irouia ibonga aika rietaata ke te tia reirei ae e a tia ni weteaki |
|
Kaaua n Tabati |
Atuun te reirei ae onoti ae rineaki irouia taan kairiiri n te Ekaretia ni kabuta |
Te Beretitentii ke taan kairiiri irouia ibonga aika rietaata ke te tia reirei ae e a tia ni weteaki |
|
Kanimaua n Tabati |
Atuun te reirei ae rineaki irouia bitiobiriki |
Bitiobiriki ke temanna ae a mwiokoia |
Kaetieti ibukin bootaki aikai a na kuneaki n te rongorongo n Nobembwa man te Riaona ao Ensign, n te Gospel Library app, ao n ComeFollowMe.lds.org.