Karekean Onimakinam rinanon te Toronibwai

José Alberto Navas (n aron are tuangaki Miriam Sweeney)

San José, Costa Rica

I a tia n iein, iai teniman natiu, ao akea au mwakuri. Akean te mwakuri ae tauraoi ngaia are e a katukai ma te bwarannano. I raraoma ibukin maiuia au utu, ao I katoka onimakinau.

Kainabau, Carla, e kaungaai bwa n na ira te kurubu n te toronibwai. I maama ni kaotia bwa akea au mwakuri, ma e kaungaai bwa n na ira te kurubu bwa iaonga ni kona n tararuaia ara utu.

I aki kukurei ma I kataia. Ngke I ira te kurubu, I kunea bwa e kona au konabwai n te taetae n Ingiriti n riki bwa te aeka ni konabwai ae a ukoukoria taan kamwakuri ibukiia aia tia mwakuri. I a tia ni reiakina te Ingiriti n au mition, ma I ti ataia n taetae iaon taekan te aro. I kabaea arau n taian kiraati iaon te Ingiriti are e karaoaki man te Ekaretia ni kanakoraoa au taetae. Ngke I okira mweengau man te kiraati n te Ingiriti n te bong teuana, Carla e anganai te tareboon.

“Antai anne?” I titiraki.

“I aki ataia,” e kaeka. “A taetae n Ingiriti.”

Bon te tia mwakuri temanna man te kambwana ae te kabanea ni bubura i Costa Rica ae tuatua bwa e na intawiu ma ngai. I kubanako iai, ma e rangin n nakoraoi mwiin te intawiu. I reiakinna imwiina bwa e a tia Carla ni katauraoa te intawiu.

E a reke au mwakuri, ao I uringnga bwa a kanga n tia ni buokai kaain au kurubu. Ngkanne I iaongoia bwa n na kanga ni karaoa te bwai ae I reiakinna. I moanna n tarataraa te mwakuri ae raoiroi riki ao e reke irou. Ngknanne I mwakuri nakon moanakin au bitineti n te kateitei.

I aki kona n iangoia bwa a na mena ia au utu ao ngai n akea te moan ni waaki ae ti karekea man te toronibwai. I reiakinna bwa n na bwaina te taotaonaki n nano ao n tuanga te Uea ibukin te ibuobuoki. I reiakinna naba ni kariaia naake a tangiria ni buokai ni kakabwaia maiu. Iai ara kakabwaia aika mwaiti. I a karekea ngkai onimakinau bon irou, ao I kona ni kakabwaiaia au utu ma te mwane ae I karekea. I ataia bwa e kakabwaiara te Tamnei ngkana ti bwaina te nanorinano.