Mwanangan Jane
E maeka te tia korokaraki i Texas, USA.
New York, USA, 1843
E matakuakina te booti ae e beibeti Jane Manning man te uaabu n otinako nakon te Nei ae Erie. E namakinna bwa miina e a beibetitinako ma ngaia.
Teuana te ririki n nako, e a kaaina ana Ekaretia Iesu Kristo ibukiia aika Itiaki ni Boong aika Kaitira ao ni baireia ni mwaing n raoniia Aika Itiaki i Nauvoo. Tinana ma itiman riki utu tabeua a tia ni mwananga rinanon te Kanare ae Erie nako Buffalo, New york. Ma i Buffalo, a aki kariaiakaki iaon te booti ibukin karan kuniia.
“Tera ae ti na karaoia ngkai?” mwaanena, ae Isaac, e karaurau n titiraki.
E okioki te titiraki n te ang ae mwaitorotoro. Nauvoo e teimatoa ni 800 te maaire (1,287 kiromiita) raroana. A kona ni kabwarai nanoia ao n okira mweengaia, ke ni kataia ni mwananga rimwi. …
Ma Jane e aki kona n tataninga! E ataia ae e koaua ana Boki Moomon. Te Atua e a manga taetae riki rinanoia burabeti. E kainnanoia bwa e na nako Nauvoo ma ana utu.
Jane e tauraoi ni kaaitara te waaki ao e taraa maeao. “Ti a nakonako.”
Ao a bon nakonako. Ni karokoa are a rootaki aia kau. Ni karokoa are a raewaewa waeia ao n raraa ao a tataro bwa a na kamarurungaki. N tabetai a matu itinaniku, ao e rang korakora te kamwaitoro n ai aron ae kanga e a bwaka te tinoo. A kakamaakaki irouia tabeman bwa a na karinaki n te karabuuti, a taku n aia iango bwa taian toro aika a birinako. A aki ataia bwa te utu ae Manning bon ibwabwata aika a kainaomataaki. Ao a bon teimatoa n nakonako, n anenei kuuna n taromauri ni kakaboo tai.
A kaan ma Nauvoo ngke a roko n te karaanga.
“Akea te buriiti,” e taku Isaac.
E katoua atuuna Jane. “Ti na tii nakonako n rinanona, imwiina.” Ngke e a toua nanon te karaanga, e rokoroko ieta te ran ni mwanokunwaena. Ni karaurau, e mwaing ni waakinako. E katobibiaki n te ran nakon bubuan waena ao imwiina nakon koreana. N te tai are e roko iai inuukan te karaanga, ao e a roko te ran iroroana!. N te tekeraoi, e aki rangin nano, ao te utu ae Manning a rinanona ma te kamanoaki!
N tokin te tai ao a roko i Nauvoo. E a kona Jane n noora oon te Tembora ae Nauvoo ma oona ae te atibu te raim ae koro tamaroana iaon te tabuki ae kaitaraa te mwarua. E ngae ngke e bon tuai raoi n tia, e kubanako iai. Iai temanna ae kairiia nakon te auti ike e maeka iai te Burabeti ae Iotebwa Timiti.
Te aine ae abwabwaki, ae mangurooro irana ae e tei n te mataroa. “Nako mai riin, nakomai riin!” e wewete. “Ngai Emma Smith.”
Tabeua te miniti imwiina e aki nooraki raoi. E kaitibo Jane ma te Burabeti, ao e katauraoi taian kaintekateka ibukin te utu ae Manning. E tekateka iaon te kaintekateka Jane ma te kakaitau ao n ongora ngkai e kabwarabwaraiia Iotebwa nakoia aomata ikekei, n raonaki ma raoraona ae Taokita. Bernhisel. Imwiina e rairaki Iotebwa n taraa Jane, “Ko a tia n riki bwa atuun te kurubu ae uarereke aei, ngaia anne?” e titiraki.
“Eng, te mataniwi!” e kaeka Jane.
E moangare Iotebwa. “E na kakabwaiai ngkami te Atua! Ngkai I kan ongora mwanangami.”
Jane e karakina ikoakin waeiia ao matuuia n te tinoo ao n rianna inanon te karaanga. A bane n ongora aomata. “Ma e aki rangin kangaanga,” e motikia. “Ti touanako kawaira ma te kimwareirei, n anenei kuuna n taromauri ao ni karabwa te Atua ibukin tamaroana ae akea tiana ao ana nanoanga nakoira ni kakabwaiaira, ni kawakiniira, ao ni kamarururungi waera.”
Akea te karongoa n te tai anne. “Tera am iango n anne, te Taokita?” N te kabane ao e taetae Iotebwa, ao e orea bubuanwaen te mwaane. “Tiaki anne te onimaki?”
“Ngke arona bwa ngai, N na bon maaku ao ni bwarananou ao n okira mweengau!” E kariaia Taokita Bernhisel.
E katoutoua atuuna Iotebwa ao n rairaki n taraa Jane ao ana utu: “E na kakabwaiaingkami te Atua. Kam mena ibuakoia raoraomi.”