Karikirakea Au Bitineti iaon te Raiti Keeke

Lordita Yagomyom

Misamis Occidental, Philippines

I tangira natiu te mwaane bwa e na mitinare, ma kaboakoan teuana te kiro (2 te rawawata.) te bibingka (raiti keeke) n te wiiki e aki tau ni boutokaia iaon ana mition.

Natiu te mwaane e buoka ana kareke mwane te utu ao e raraoma ibukin ara kareke mwane n namakina te aki rau ngkana e nako. Bon te ikakorakora ae reitinako ibukin au utu ni kareke mwane. I rang kamoamoa iroun natiu te mwaane ae 25 ana ririki n ana eti n tangiria ni beku ibukin te Uea, ma I ataia bwa ti kainanoa tabeua kakai ni kakoroa bukin miina ni beku n te mition.

I kaaina te kurubu n te riki n toroni-bwai. Man arou ni mwakuri ni karika te bitaki ao ni kamwakura au onimaki, I ataia bwa au utu a na kakabwaiaaki. N tain teuana te boowi, I kanamakin bwa N na nakon te maakete. Ikekei, I nooria aine aika mwaiti ni kabooi tinaeki ae a bon karaoi. I karaoa te boraraoi ma temanna te aine. I tuangnga N na katukui au bwai ni boobai n te ingabong ni kabooinako ao n rikoa rakaia n tokin te ngaina. Te babaire e reke te ibuobuoki nakoira. I manga kuneia riki taan kaboobwai. Au bitineti e rikirake nakon 10 taan kaboobwai inanon au tai ma te kurubu n te riki n toroni-bwai.

I reiakinna ni kaokoroa oin au mwane man au mwane ni bitineti ao karaoan boou mai iai. I reiakinna ni katoka kabanean au tai ni karaoi bwai ni boobwai are I aki kaboinako ao oneamwiina taraan bwa tera ae raka. I reiakina naba taekan te maakete ma bobotaki ni kanakobwana. Au bwatena ni kakamwakuri man te kurubu n te riki n toroni-bwai e buokai ni karaoa au Beeitiboki akaaunti. Mai ikanne, ti reiakina taekan katean tamaroan ara bitineti ao ninirakin bwaai. Au bitineti e a rikirake nakon taekana are kaainabau e kona ni kitana ana mwkauri ae kairoro ni kakuaa rabwatana ao ni mwakuri ma ngai.

Temanna e a tibwa titirakinai bwa e uara nakoraoin au kareke mwane. I tuangnga ni kamoaai bwa I a kabooinako ngkai au 12 kiro (26 te rawawata) te raiti keeke.

“12 te kiro n te wiiki e rang tamaroa!” e taku.

“Tiaki, mwaneu,” I taku. “I kabooinako 12 te kiro n te bongina.”

Natiu temwaane e tuangai imwina e rang kukurei bwa au bitineti e kona ni karekei kainnanora.

“E taraa n ae I a kona ni karaoa au mwakuri ni mitinare ae bwanin ngkai,” e taku.

E mwakuri ni mitinare i Biribin San Pablo Mition. I rang kakaitau ibukin ana waaki te riki n toroni-bwai ni ibuobuoki ni katoki kaangaanga. Te Uea e nanonna ngke E taku, Bon aio bukina are N na karekea ibukiia aomata aika itiaki (taraa D&C 104:15).