Rongorongo ni Kakawari n Reirei
Mwaneia ma te Tangira Naake a Bua
Tataromwaaka ni kamatebwaia te bwai n reirei aei ao n ukoria bwa ko aonga n ataia bwa tera ae ko na tibwaia. E kanga ataakin ana kantaninga te Bootaki n Aine ni katauraoiia natin te Atua aine ibukin kakabwaia n te maiu ae akea tokina?
“Te koaua e kangai bwa akea utu aika kororaoi … ,” e taku Beretitenti Dieter F. Uchtdorf, te Kauoman ni Kauntira n te Moan Beretitentii. “Baikara kaangaanga ake a kaitara ma ngaai am utu, baikara bwaai aika ko riai ni karaoi bwa a ana katoki, moan ao tokin te kaangaanga bon te tangira, ana tangira Kristo ae itiaki.”1
Ni kaineti ma naake aki bwanin aia onimaki n te euangkerio, Linda K. Burton, te Beretitenti ngkoa n te Bootaki n Aine, e taku: “Te Tama are i Karawa E tangiriia Natina ni kabane. … N aki tabe bwa a mena ia—a kakaonimaki n te euangkerio ke a bwaka man te aro—E tangiriia bwa a na oki nakon mwengana.”2
“E ngae ngke aekakira aron aki ongotaekaia [am ataei] tao, … ngkana ko taetae nakoia ke ni kaetiia, tai taetae nakoia n un, tai taetae nakoia n ae matoatoa ao n aki raoiroi,” e reirei Beretitenti Joseph F. Smith (1838–1918). “Taetae nakoia ma te akoi.”3
Unimwaane Brent H. Nielson man te Kaitingaun e kaokioka ana kaetieti te Tia Kamaiu nakoia naake iai irouia 10 mwakorokoron te tirewa ao e bua teuana: “Ukeria ni karokoa ko kunea. Ngkana ae bua natim te mwaane ke natim te aine, tarim ke mwanem, … imwiin bwaai ni kabane ake ti kona ni karaoi, ti tangira te aomata anne ma nanora ae moan te korakorara. …
“Au kaantaninga bwa ngkoe ao ngai ti karekea te kaotioti n ataia bwa ti na kanga ni buokiia naake a bua ni maiuia ao, ni karekea ana taotaonaki n nano ao ana tangira Tamara are i Karawa ao Natina Iesu Kristo, ngkana ti tangiria, tarataraia, ao n tataningaa te nati ae bakatae.”4
Beretitenti Henry B. Eyring, te Moan Kauntira n te Moan Beretitentii, e taku: “I a tia n tataro ma te onimaki bwa te aomata ae I tangiria e na ukeuke ao n namakina mwaakan te Mwakuri ni Kamaiu. I a tia n tataro ma te onimaki bwa anera aika aomata a na roko ni buokiia, ao a bon roko.
“Iai ana kawai te Atua ae a tia ni baireia ni kamaiuia Natina n tatabemaniia nako.”5
Rakan Booki aika Tabu ao Rongorongo
Onimaki Utu Buoka