Mai Paris nakon Sapporo
Ti maeka n iteran te aonaaba aika kakaokoro, ma ti tebo ara namakin ngkana a kateaki tembora irarikira!
Arau bon Rachel. I maeka irarikin te Paris France Tembora.
E bon rangin ni kakawaki te tembora nakoia au utu. Imwain katean te Paris Tembora, ti na mwananga n utu nakon te Frankfurt Germany Tembora tabeua te tai n te ririki. E anaa tebwina te aoa ni buti n nako ikekei ao n oki!
Ti tangiria n tarataraa te tembora ae boou n kateakina. Ni katoa wiiki imwiin te taromauri, a buti ara karo irarikina bwa ti aonga n noora aron karaoan te kateitei. Te moan a urua te kateitei are e a maan ao ni kena te bwangabwanga ae bubura. Imwiina a moanna ni katea te tembora ni karietataa ieta. N te tai ae waekoa e a tei ikekei ana auti te Uea!
Au utu ao ngai a ingainga nanora ni kan nakon te tembora n te bong teuana. E ikawai riki tariu Esther, ngaia are e a karaoa moa te bwabetito. Ti bane n tataninga ma nanora aika ingainga ibukin ara tai n nako naba. Ti tangira te tembora ao ti bane ni kukurei ni kateakin teuana n ara kaawa!
Arau bon Koshi. I maeka irarikin te Sapporo Japan Tembora. I tangiria n tekateka irarikin wiintoon au auti ao n tarataraa te tembora ngke e kateaki.
N tain te kaukuuki, I kaoa raoraou ae tamaroa bwa e na iriira. E taku bwa a tikiraoi bwaai ni kabane.
I tangiria n iangoa katabuan te tembora bwa ana rekenibong. Te bong anne bon au bongi ni bung naba. Ao Beretitenti Monson naba! Ngai ma au karo ti bane n rin n te tembora ngke e moan katabuaki.
I rangin ni kukurei ni maeka irarikin te tembora. Ngkana iai au kaangaanga n te reirei, I kona n nakonako rinanon tanona iaon kawaiu nakon mweengau. I namakina ana tangira te Tama are i Karawa ibukiu ngkana I a roko ikekei. E ingainga nanou nakon te tai ae n na rin ni karaoi bwabetito ao ni mare imwiina ikekei.