Kauka Karawa rinanon karaoan Mwakuri n te Tembora ao n Rongorongon te Utu
Iroun Beretitenti Russell M. Nelson
Beretitenti n te Kooram n Abotoro n te Tengaun ma Uoman
Ao iroun Wendy W. Nelson
Man te kaongora are e karaoaki n te RootsTech 2017 Maungatabu ibukin Rongorongon te Utu i Salt Lake City, Utah, USA, ni Beberuare 11, 2017. Ni mataku n te rawerawe iaon te kaongora n te English, Portuguese, ke Spanish, nakon lds.org/go/1017Nelson.
Ni karaoan aia angareirei n te 2017 RootsTech, Beretitenti Russell M. Nelson ma kainabana, Wendy, e kaoiia aika Itiaki bwa a na tataro mwaaka n iangoia bwa te anganano raa ae a kona ni karaoia bwa a aonga ni karaoi riki aika a mwaiti n te tembora ao te mwakuri n rongorongon te utu.
Beretitenti Nelson: Ngke e kairake tibuu te unimwaane ae A. C. Nelson bwa te karo ao te kainnaba, ai tibwa 27 ana ririki, e mate tamana. Tao bon teniua te namwakaina imwiina, tamana are e tia ni mate, are tibuu, e roko ni kawaria. Te bong are e roko iai bon tairikin Eberi 6, 1891. Tibu Nelson e rang kukurei n rokon tamana anne n te aro are e a koreia inanon ana tienero ibukiia ana utu ao raoraona.
“I mena n au kainiwene ngke e rin Tamau n te ruu,” e koroboki Tibu Nelson. “E roko ao e tekateka n iteran au kainiwene. E taku, ‘Eng, natiu, ngkai iai tabeua au miniti, I karekea te kariaiakaki n roko n nooriko. I rang marurung, natiu, ao e rang mwaiti te bwai ae I karaoia man te tai are ngke I mate iai.’”
Ngke e titirakinna Tibuu Nelson bwa tera ae e a bon kakaraoia, e kaeka tamana n taekinna bwa e rang n tabetabe n reirei ana euangkerio Iesu Kristo n te aonaaba n tamnei.
“Ko aki kona n iangoia, natiu, bwa mwaitira tamnei aika a mena n te aonaaba n tamnei ake a tuai ni karekea te euangkerio,” e taku. “Ma a mwaiti aika a karekea, ao e rang korakora te mwakuri ae e a tia ni karaoaki. A mwaiti aika a ingainga n taratara nakoia raraoia aika a bon maiu bwa a na buokiia n te tembora.”
Tibu Nelson e tuanga tamana, “Ti kan nakon te tembora bwa tina kabaeaki ma ngkoe, Tamau, ni waekoa n reken ara tai.”
E kaeka taman tibuu: “Anne, natiu, bon mwakoron naba bukin rokou n nooriko. Ti na bon katea ara utu ao ni maiu ni karokoa akea tokina.”
Imwiin Tibu Nelson e titiraki, “Tamau, e koaua te euangkerio ae reirei iai te Ekaretia aei?”
Tamana e kotea tamnein te Moan Beretitentii ae tine iaon te oo n te ruu ni matu.
“Natiu, bon aron koauan ae ko noora te tamnei arei, ai aron naba koauan te euangkerio. Ana euangkerio Iesu Kristo iai inanona te mwaaka ni kamaiuia mwane ao aine ake a ongotaeka nako iai, ao akea riki te kawai ae a na kona ni karekea te kamaiuaki n abanuean te Atua. Natiu, teimatoa n tainako n te euangkerio. Bwaina te nanorinano, tataro, ongotaeka nakon te nakoanibonga, kokoaua, kakaonimaki nakon berita aika a tabu ake ko a tia ni karaoi ma te Atua. Ko na tai karaoi bwaai ake e aki kukurei iai te Atua. O, bon te kakabwaia te euangkerio. Natiu, ko na riki bwa te ataenimwane ae ko raoiroi.”
A. C. Nelson, tibun Beretitenti Russell M. Nelson.
Kamataata n te tamnei iroun Bjorn Thorkelson; tamnein te baekuraun, tareboon, ao taeburete mairoun Getty Images
Titita Nelson: I rang tangirii taian B akanne. “Bwaina te nanorinano, bwaina te tatataro, bwaina te ongotaeka nakon te nakoanibonga, bwaina te kokoaua, bwaina te kakaonimaki nakon berita aika a tabu ake ko a tia ni karaoi ma te Atua. … Ko na riki bwa te ataeinimwane ae ko raoiroi Onoua taian B aika a uotaki nakoim iroun taman tibum are e a tia ni mate. Bon titebo are e taekinna ma are iroun Bereitenti Gordon B. Hinckley (1910–2008) ma ana B ake onoua.1
Beretitenti Nelson: Bon aekakina raoi, ke tiaki? E bon rangi ni kakaawaki irou bwa tibuu te unimwane e na kona ni katikui rekooti aikai ibukira. Ti ongora bwa e bane ni kabaeaki ma natina n tokin te tai. Ngaia are e kakoroaki raoi bukin te kantaninga are e roko ibukina.
Tamnein Eria
Beretitenti Nelson: Te ara ae moan te kakaawaki ni koroboki aika a tabu e kabwarabwara bukina ngkai e rang kakaawaki te utu. Te ara anne bon Eria. ER-I-A n te Taetae n Ebera nanona “Iehova ae Atuau.”2 Iangoa aron anne! Are e toka iaon aran Eria bon taetae n Ebera n aran te Tama ao te Nati.
Titita Nelson: Eria bon te kabanea ni burabeti are e taua te mwaaka ni kabaebae n te Nakoanibonga ae te Merekitereka imwain ana tai Iesu Kristo. Tibwangan Eria bwa e na rairi nanoia nati nakoia kaaro, ao nanoia kaaro nakoia naati, bwa a onga ni kabaeaki, ke ngkana aki ao “te aonaaba ae bwanin e na kamaunaaki n rokona” (Joseph Smith—History 1:39; e kairaki ma katuruturuana). Anne bon te taetae ae korakora.
Beretitenti Nelson: I tangiria n iangoa tamnein Eria bwa “e kaota te Tamnei ae Raoiroi ni kaota koauan te utu i karawa.”3 Ni kaineti ma ana Rikitionari te Baibara, “Mwaakan Eria bon te mwaaka ni kabaebae n te nakoanibonga are bwaai ake a kabaraaki iaon te aba a na kabaraaki naba i karawa.” (“Eria”).
Titita Nelson: Ngaia are ngkana ti taekinna bwa tamnein Eria e mwamwakuri irouia aomata ni kaungaia ni ukeukeriia aia koraki ake a tia ni mate, ti taekinna raoi bwa te Tamnei ae Raoiroi e wirikiriki nakoira bwa ti na karaoi bwaai akanne bwa aonga ara utu ni kabaeaki n akea tokina.
Beretitenti Nelson: E kamimi rairakin nanoia naati nakoia kaaro man karakinan rongorongon te utu ae kakaawaki ni kawai ake a kakai reke ao n ururingaki. Tao karekean rongorongon te utu, karaki, tamnei, ao kanuringa n taainako n noorakina i matara e kona ni kakorakorai ara koaua (taraa Motiaea 1:5). Ngkai ti katekei iaon ara oo, ara taibora, ara kaombiuta, ara iPads, ao ni bon iaon ara tareboon, tao ti na kona riki ni karaoi rinerine aika tamaroa ao ni kaniira riki nakon te Uea ao nakoia ara utu.
Ngkana ti katikua n arona anne, ngkanne, ti bon tuai ni karaoa ae tau. Ngkai ti kaina te Ekaretia, nanora ni mwakuria rongorongon te utu e a tia ni kaungaaki man ana kaetieti te Uea bwa ara bakatibu a bon aki kona ni kakororaoaki ngkana akea ngaira (taraa D&C 128:15). Are nanona bwa ti na kabaeaki n te otenanti ae tabu ni kabaebae n ikotaki n te tembora. Ti na riki bwa te reitaki ae matoatoa n te tiein mairouia ara bakatibu nakoia ara kariki ake imwiira. Inanon bobotakin ara karaki ao tamnei e na riki bwa te tia—ngkana ti ataia bwa antai ara bakatibu akanne ao n atai kamimiin rongorongoia, ma ti katikui n te itera are teuana n aki karaoi otenanti ibukiia—te maenako anne e na bon aki ibuobuoki nakoia ara bakatibu ake a teimatoa ni kabaeaki n te o ni kaikain n tamnei.
Titita Nelson: Kawakinan rongorongoia ara ikawai e rang kakaawaki, ma e na bon aki bobuaka katiaan mwakuri n te otenanti ibukiia ara bakatibu. Ti riai ni karekea tain aia otenanti ara bakatibu-rongorongoia aika a tau.
Beretitenti Nelson: Ao anne nanon te tai n anganano are ti tataneiai ni kabanea iaon waaki ni kakukurei ake tabeua. Ti riai ni kabanea riki te tai ae mwaiti n te tembora ni karaoan kakaei n rongorongon te utu, are e raonaki n te intekiting.
Titita Nelson: Anganano a uoti kakabwaia mai karawa.4 I a tia ni kakabwaiaki ni karekeaia au bakatibu aika a mwaiti ake I namakiniia bwa a bon tauraoi ni karaoi aia berita ma te Atua ao ni karekea aia otenanti ae kakaawaki ibukiia. Imwiin te tai, I ataia bwa ngkana I mwakuri iaon te karikirake ae bubura ao e aki tau au tai, korakorau, ao au iango, ngkana tao I karaoa te anganano n te tai ni kakaei otenanti-rongorongo aika a tau ibukiia tabeman au ikawai ke n nakon te tembora n tei ibukiia, karawa e uki ao te korakora ao iango a waaki n raanga. Ma e reke au tai ni katiai tabeu iaon taina. E bon rang ni kaanganga, ma e na bon riki ni katoa tai. Mwakuri n te Tembora ao rongorongon te utu e uota te kakukurei nakoiu are bon tiaki kakukurein te aonaaba aei.
Rongorongon te Utu ao te Mwakuri ni Mitinare
Beretitenti Nelson: Ngke arona bwa I mitinare n te bong aei, raoraou aika uoman n te uoote ke te mwaanga are I beku iai bon te tia kairiiri n te mition n te uoote ao te kantiaotante n te tembora ibukin te uoote ao n rongorongon te utu.
Aomata iai nanoia ni kan kinaia aia bakatibu ake a bungiaki inanona. Anne aia tai ae a mwaatai iai ara mitinare. Ngkai a reiakinna n tangiriia aomata mitinare ake a reireiniia, n taainako a na bon titirakiniia ibukiin aia utu. “A maiu am karo? A maiu tibum? Ko ataia tibum n te kaaua n atu?” E na marau ni waaki nako te maroro ngkai naake a katikaki nanoia n taetae ma mitinare a kaoaki bwa a na taetae ibukiia aomata aika a tangiriia.
N te tai anne e na nakoraoi ibukiia mitinare, n ikotaki ma kain te aro ake mitinare, n titiraki, “Iai ae ko kina irouia tibutorum? Ko atai araia?” Mwaitiia taan kakae a na bon aki atai araia aia ikawai ake n te kawaniua n atu.
Ngkanne mitinare a kona ni kaunga te iango aei: “Iai raoraou n te ekaretia ae e kona n ibuobuoki. Ngkana ko kona ni karekei araia tabeman ke tao bon ni kabane araia am bakatibu, e na rang manena uoua te aoa man ama tai ni kakaia bwa antai am ikawai akanne.?” Raoraou are n te ekaretia, bon te kantiaotante n te tembora ibukin te uoote ao ibukin rongorongon te utu.
Titita Nelson: I taku bwa a na rang mweengaraoi mitinare n ataia bwa tiaki tii ngaiia ngkana a kakaia ao n reireiniia naake a kan butimwaea koauan ana euangkerio Iesu Kristo are e a tia ni manga kaokaki. Beretitenti George Q. Cannon (1827–1901), are e beku bwa te kauntira irouia aman Beretitenti n te Ekaretia, e reirei bwa ni boong aika kaitira, a kaainna ibukina bwa aia bakatibu a tia n tatataro ibukin temanna aia kariki bwa e na kaina te Ekaretia bwa aonga ngaiia a kona ni karekea te otenanti ae tau n tei ibukiia.5
Te Karietataaki Ana: Bwai te Utu
Beretitenti Nelson: Te karietataaki bon ana bwai te utu. Tii rinanon te otenanti ni kamaiu n ana euangkerio Iesu Kristo a kona utu ni karietataaki. Nakon te tia are ti uaiakinna bwa ti na kukurei n utu—entau, kabaeaki, ao ni katauraoi ibukin te maiu ae akea tokina ni maeka ma te Atua.
Titita Nelson: Ni katoai kiraati n te Ekaretia ake ti irii, ni katoatai are ti beku, ni katoai berita ake ti karaoi ma te Atua, ni katoai otenanti n te nakoanibonga ake ti karekei, ni bwaai ni kabane ake ti karaoi n te Ekaretia e kairira nakon te tembora ae mimitong, ana auti te Uea. E rang mwaiti te mwaaka are e tauraoi ibukiia taanga ao natiia rinanon otenanti ni kabaebae ngkana a kawakin aia berita.
Beretitenti Nelson: Ni katoabong ti rinea te tabo are ti tangiria ni maiu iai n aki toki man arora n iango, n namakin, n taetae, ao ni mwakuri. Tamara are i Karawa e a tia ni katanoata bwa Ana mwakuri ao Mimitongina bwa e na uota te aki mamate ao te maiu ae akea tokina nakoia Natina (taraa Moses 1:39). Ma E tangiri ira bwa ti na rineia n oki nakoIna. E na bon aki kairoroira n te aro teuana. Mwaitin are ti kawakina iai ara berita e kaotia nakoIna mwaitin are ti tangiria ni kan oki ni maeka ma Ngaia. Ni katoabong e uotiira ni kaniira nakoina ke raroara man mimitongira nakon te maiu are akea tokina. Ti riai ni kawakin ara berita n tatabemaniira, rairannano ni katoabong, ao n ukoukoria n riki n ai aron ara Tia Kamaiu. Ngkanne ao n ti ngaia a kona utu ni ikotaki n aki toki.
Titita Nelson: Bon au koaua bwa tamaroara aron maium n te tai aei, ke tao kabwarananora ao te uruaki n nano are e kona n reke, irekerekemi n te tembora ao te mwakuri n rongorongon te utu e na bon katamaroa. Tera ae ko kainnanoia ni maium n te tai aei? Te tangira ae mwaiti riki? Te kukurei ae mwaiti riki? Te konabwai ae mwaiti riki? Te rau ae mwaiti riki? Taai aika ururingaki ae mwaiti riki? Bitakin te namakin ae mwaiti riki? Te kakukurei ae mwaiti riki? Kaeka aika a mwaiti riki nakon titiraki aika a titiku inanom? Te reitaki n nano nakoia tabeman ae mwaiti riki? Te atatai riki ni bwaai ake ko wareki ni koroboki aika a tabu ae mwaiti riki? Te konabwai n tangira ao ni kabwarabure ae mwaiti riki? Te konabwai n tataro ma te mwaaka ae mwaiti riki? Te ungannano ao te kakauiango n am mwakuri ao karikirake riki tabeua ae mwaiti riki? Te tai ibukin bwaai aika kakaawaki riki ae mwaiti riki?
I kaungai ngkami bwa kam na anganano n ami tai nakon te Uea man karakaan riki ami tai are kam kabanea ni karaoan te mwakuri n te tembora ao n rongorongon te utu, ao imwiina noora te bwai ae e na riki. Bon au koaua bwa ngkana ti kaotia nakon te Uea bwa ti taua ma nanora ni buokiia ara bakatibu, e na uki karawa ao ti na karekei ni kabane baike ti kainnanoi.
Beretitenti Nelson: Ti kona ni kaungaaki ni bongi nako ibukin te tembora ao rongorongon te utu are a tia n rinanona tabeman. Ma ti riai ni karaoa te bwai teuana bwa ti na rinanon te kukurei anne i bon iroura. I kan kanakoa te kakaewenako nakoira n tatabemaniira bwa e aonga n reitinako te namakin ibukin te mwakuri aei ao ni karakaaki riki. I kaoi ngkami bwa kam na tataro mwaaka n iangoa te aekaki n anganano—are kam nano riki iai n ami tai n anganano—are kam kona ni karaoia bwa kam aonga ni karaoi mwakuri n te tembora ao rongorongoia ami utu ae mwaiti riki n te ririki aei.
Ti kabaeaki n ana mwakuri te Atua are Moan te Mwaaka. E maiu. Iesu bon te Kristo. Aio Ana Ekaretia. Boni ngaira Natina. E kona n onimakiniira.