Te Wewete ni Kaokakiia Moan Abotoro

Ni Beberuare 8, 1835, Iotebwa Timiti e butiia tarina ake Brigham ao Joseph Young bwa a a na anene nakoina. Imwiina te Burabeti e karekea te kaotioti bwa aio te tai are a na weteki iai Abotoro ake Tengaun ma Uoman.¹

Iotebwa Timiti e tuanga Brigham bwa e na kanakoa te kaetieti bwa e na karaoaki te maungatabu n te Kaonobong are imwiina. E tuanga Brigham bwa ngaia temanna ibuakoia Tengaun ma Uoman.²

Onoua te bong imwiina, a ikotaki kain te Ekaretia. Iotebwa Timiti e taekinna bwa teuana oin te kantaninga n te boowi bon ibukiia Taan Kakoaua ake Teniman n Ana Boki Moomon—Oliver Cowdery, David Whitmer, ao Martin Harris—“bwa a na rineia tengaun ma uoman mwaane man te ekaretia bwa a na riki bwa Abotoro.”³ Oliver ao David a tia ni kaman karekea te tibwanga anne inanon Tuun 1829, ma e ngae ngke a tia n “ukoukora te Uea n te aki mamatam ao n te tataro” bwa a na kona n rineia Tengaun ma uoman, e tuai n roko raoi taina.⁴ N te tai aei, Iotebwa e taekinna bwa e a rokoraoi te tai anne.

Te Tengaun ma Uoman (n teina are e atongaki n tain te boowi) bon Lyman Johnson, ana ririki ae 23; Brigham Young, 33; Heber C. Kimball, 33; Orson Hyde, 30; David W. Patten, 35; Luke Johnson, 27; William E. McLellin, 29; John F. Boynton, 23; Orson Pratt, 23; William Smith, 23; Thomas B. Marsh, 34; ao Parley P. Pratt, 27. Ni kabane a tia ni karaoa aia mwakuri ni mitinare. Waniman a tia n raona Iotebwa Timiti n ana mwananga ni Kaembwa i Tion n te tiamwa ae nako.⁵

Imwiin rineaia, Abotoro n tatabemaniia a katabuaki.⁶ Aia kakabwaia ni katabuakiia e kakoroaki bukin berita imwiin aia tokanikai n aia mwakuri ni mitinare. Heber C. Kimball e ururing imwiin te kakabwaia “bwaai aika a mwaiti ake a kaman taekinaki ake a na koro bukiia, bwa ti na riai ni karekea te mwaaka ni katoki aoraki, kanakoia taimonio, kautiia mate, ni kanorabaia mataki, … kamwaingi maunga, ao bwaai ni kabane a reke nakoira rinanon aran Iesu Kristo.”⁷

Oliver Cowdery e kabwarabwarai naba kaangaanga ake a na kaitarai: Tatauraoi n tainako ni karaoi anganano [sic] inanon maiumi, ngkana e kainnanoia te Atua ni karakaan ao katean ana kantaninga.” Oliver e kaungaia Abotoro bwa a na ukoukora te atatai mai iroun Iesu Kristo bwa aaonga ni kona ni kakoaua ni koauan Maiuna: “Tai toki ni kataakina ni karokoa ko a tia n noora te Atua, n itaramata ma ngaia.”⁸

E moanaki man Meei 1835, Abotoro a waakinii tabeua mwakuri n anganano n te mition ibukin te Ekaretia, ao aia kairiiri ni kabuta e kakabwaiaiia naba aika mwaiti.

Bwaai aika a na taraaki

1. Taraa History, 1838–1856 (Manuscript History of the Church), volume B-1 [1 September 1834–2 November 1838],” addenda, note A, page 1, josephsmithpapers.org.

2. Taraa Joseph Young, History of the Organization of the Seventies (1878), 1.

3. “Minutes, Discourses, and Blessings, 14–15 February 1835,” in Joseph Smith Papers, Documents, Volume 4: April 1834–September 1835, 224–28.

4. “Minutes and Blessings, 21 February 1835,” in Joseph Smith Papers, Documents, Volume 4: April 1834–September 1835, 242, 243.

5. Naake aman bon tiaki kain te kaembwa aika David W. Patten, Thomas B. Marsh, William E. McLellin, ao John F. Boynton.

6. Ti ruaman mairouia Tengaun ma Uoman ake a roko n te boowi ni Beberuare 14, 1835. Parley P. Pratt e kamatoaki ni Beberuare 21, 1835, ngke Thomas B. Marsh ao Orson Pratt a uaia ni kamatoaki n Eberi 26, 1835.

7. “Extracts from H. C. Kimball’s Journal,” Times and Seasons, Apr. 15, 1845, 868.

8. “Minutes and Blessings, 21 February 1835,” in Joseph Smith Papers, Documents, Volume 4: April 1834–September 1835, 244.