Mea e Tolu ia Manatua

O le upu Manatua e tele taimi e maua ai i le Tusi a Mamona. Na uunaia e Nifae ona uso ia manatua le ala na laveaiina ai e le Atua o latou tama na muamua atu. Na poloai atu le Tupu o Peniamina i lona nuu ia manatua le silisili o le Atua. Ma na faatonuina e Moronae ana tagata faitau ia manatua le tele o le alofa mutimutivale o le Alii.

O le manatuaina o le Faaola e taua—tatou te osi feagaiga lava foi ia manatua o Ia i taimi uma tatou te tagofia ai le faamanatuga. Ua valaaulia i tatou e Peresitene Eyring ia manatua nei mea e tolu i le taimi o le faamanatuga:

Manatua Iesu Keriso: Faitau tusitusiga paia e uiga i le ala na auauna atu ai ma faaalia le alofa o le Faaola i isi. E faapefea ona e lagonaina Lona alofa? E faapefea ona e auauna atu ma faaalia le alofa i isi e faapei ona faia e le Faaola?
Manatua mea e te manaomia ona sili atu le faia: Mafaufau i lou vaiaso ua tuanai faatasi ma se loto salamo. Filifili se mea se tasi e mafai ona e suia, ma tusi i lalo le ala o le a e faaleleia ai lena mea. Tuu lau sini i se mea o le a e vaai soo i ai.
Manatua le alualu i luma o loo e faia: Ole atu i le Atua e fesoasoani ia te oe e vaai i le alualu i luma lelei o loo e faia. Faamaumau ou lagona.

Tatou te le atoatoa, ae e silafia e le Faaola lena mea. O le mafuaaga lena ua Ia fai mai ai ia i tatou ia manatua o Ia. O le manatuaina o Ia e tuuina mai ai ia i tatou le faamoemoe ma fesoasoani ia i tatou ia mananao ia faaleleia atili. E oo lava i taimi pe ua tatou le manatua ai o Ia, ua saunoa mai Peresitene Eyring, “Na te manatua pea oe.”