ʻOku ʻAfioʻi Koe ʻe he Tamai Hēvaní
Fai ʻe Sisitā Cristina B. Franco
Tokoni Ua ʻi he Kau Palesitenisī Lahi ʻa e Palaimelí
ʻI he Sāpate kotoa pē ʻi ha kiʻi kolo ʻi ʻĀsenitina, naʻe fetaulaki ha falukunga kakai ʻi ha lalo ʻakau ke lau e folofolá mo ako fekauʻaki mo e ongoongoleleí. Ko e niʻihi ʻo e kakaí ko e kau mēmipa ʻo e Siasí. Ka ko hanau tokolahi kuo teʻeki ai ke nau papitaiso, pea naʻa nau fie maʻu moʻoni ke fakahoko ia!
Ka naʻe ʻi ai haʻanau palopalema. Naʻa nau nofo mamaʻo mei he ngaahi kolo kehé. Naʻe fuoloa e taʻe haʻu ha kau taki ʻo e Siasí ke ʻaʻahi ki honau koló.
Pea naʻa nau fanongo ʻoku ʻi ai ha kau faifekau naʻe nofo ʻi ha kolo meimei houa ʻe fā mei ai. Ne nau ʻoange kotoa ha paʻanga kae lava ʻe ha tangata ʻe taha ʻo fakatau mai ha tikite pasi ki he kolo ne ʻi ai e kau faifekaú. ʻI he taimi naʻá ne aʻu ai ki aí, naʻá ne tatali ʻi he tauʻanga pasí. Naʻá ne fakakaukau ko e feituʻu lelei taha ia ke maʻu ai ʻa e kau faifekaú.
Hili ha ngaahi houa siʻi, naʻá ne sio ki ha ongo talavou. Ko kinaua e ongo faifekaú! Naʻá ne fakahā kiate kinaua ʻo kau ki he kakai ʻi hono koló. Ko ia ai naʻe palani ʻa e kau faifekaú mo e palesiteni fakamisioná ha fononga ke feʻiloaki mo e kakai ko ʻení.
ʻI he ʻaho ko ia naʻe haʻu ai ʻa e palesiteni fakamisioná mo e kau faifekaú, naʻe tokolahi e kakai ne nau fakataha mai ke feʻiloaki mo kinautolú. Naʻe lava leva heni ke papitaiso ʻa kinautolu ne teʻeki ai ke papitaisó. Hili hono akoʻi kiate kinautolu ʻa e ngaahi lēsoní, naʻa nau mateuteu!
Naʻe fuʻu mamaʻo ʻaupito ʻa e vaitafe ofi tahá, ko ia ai ne nau pamu ha vai mei ha vaikeli pea fakafonu ha kaukauʻanga fakataimi. Naʻe houa ʻe tolu hono fakafonu e vai kaukau ko iá! Ko hono fakakātoá, naʻe papitaiso ha kakai fefine, tangata mo e fānau ʻe toko 27 ʻi he ʻaho ko iá. Naʻa nau fonu ʻi he fiefiá!
Ne ʻafioʻi ʻe he Tamai Hēvaní ʻa e fie maʻu ʻe he kakai ko ʻení ke nau papitaisó, pea naʻá Ne tokoniʻi kinautolu ke nau kumi ʻa e kau faifekaú. ʻOku toe ʻafioʻi foki koe ʻe he Tamai Hēvaní. ʻOkú Ne ʻafioʻi e feituʻu ʻokú ke ʻi aí pea ko hai koe mo e meʻa ʻokú ke fie maʻú. ʻOkú Ne fanongo mo tali hoʻo ngaahi lotú. Tatau ai pē pe ko e hā hoʻo ongoʻi taʻelatá, ʻokú Ne ʻi ai maʻu pē. ʻOku ʻikai te ke teitei tuenoa. ʻE lava ke ke tafoki maʻu ai pē kiate Ia.