Ko Hotau Hūfangaʻanga he Sāpaté

Fai ʻe Palesiteni M. Russell Ballard

Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá

Mei he “The Chapel: Our Sabbath Sanctuary” ʻi he prophets.lds.org.

Kapau te tau lava ʻo kamata e fakakaukau ko e falelotú ko ha hūfangaʻanga ʻo e tui mo e mateaki ki he houalotu sākalamēnití, ʻe tāpuekina kitautolu kotoa pē.

Ko e houalotu sākalamēnití ko ha taimi fakaʻofoʻofa mo nāunauʻia ia. ʻI he taimi ʻoku tau hū atu ai ki he falelotú pea teuteu ke maʻu e sākalamēnití, ʻoku totonu ke tau fakakaukau ko kitautolú ʻoku tau ʻi ha hūfangaʻanga, ko ha potu toputapu mo makehe ʻa ia te tau lava ʻo fakakaukau kia Kalaisi mo ʻEne ngāue fakafaifekau māʻongoʻonga mo nāunauʻiá. ʻOku tau liʻaki ‘a e ngaahi meʻa ʻo e māmaní kae fakakaukau ki he meʻa ʻoku taʻengatá. ʻOku fie maʻu ke tau kiʻi tukunoaʻi atu ʻetau telefoni toʻotoʻó kae fakalaulauloto kia Sīsū Kalaisi, ko e ʻAlo ʻo e ʻOtua Moʻuí.

ʻOku tau maʻu ha miniti pē ʻe 70 he uike takitaha ke tukutaha ʻetau tokangá ʻi heʻetau ʻofa ki he Fakamoʻuí. Kapau te tau lava ʻo kamata fakakaukau ko e falelotú ko ha hūfangaʻanga ia ʻo e tui mo e mateaki ki he houalotu sākalamēnití, ʻe tāpuekina kitautolu kotoa pē.

ʻI heʻetau langa e puleʻanga ʻo e ʻOtuá, he ʻikai lava ke u fakakaukau ki ha meʻa mahuʻinga ange ka ko e ʻi ai ha houalotu sākalamēniti kuo teuteuʻi lelei ʻa ia ʻoku lea e kau leá ʻia Kalaisi, fakamoʻoni kia Kalaisi, pea vahevahe ‘a e ngaahi fakamoʻoni mei he kau ʻaposetolo mo e kau palōfita ʻi he folofolá mo e ngaahi maʻuʻanga tokoni kehé.

ʻI he Siasí kuo tau tokanga taha pē ki he ʻaho Sāpaté. Kuo tau fai ha fakalakalaka, ka ʻoku teʻeki ai ke tau ʻi ai. ʻE hokohoko atu ʻetau ngaahi ngāué kae ʻoua kuo ueʻi fakalaumālie ʻa e mēmipa mo e faifekau kotoa pē lolotonga ʻenau moihū he ʻaho Sāpaté ʻo nau takitaha fakahā ki honau kaungāʻapí, kau fiefanongó, mo e kāingá, “Haʻu ʻo mamata. Haʻu ʻo lotu mo kimautolu.” Ko e feituʻu ʻeni ʻoku tau fie maʻu ke ʻi aí.

Kapau te tau lava kotoa pē ʻo fai ʻeni ko ha Siasi, ʻe ongoʻi ʻe kinautolu ne nau tali ʻetau fakaafe ke “haʻu ʻo mamatá” ʻa e mālohi ʻo e pōpoaki ʻo e Siasi ʻo Sīsū Kalaisi kuo toe fakafoki maí. ʻI heʻenau moihū mo kitautolu ʻi heʻetau ngaahi houalotu sākalamēnití, ʻe ongo ki honau lotó pea ʻe ulo e maama ʻo e ongoongoleleí ʻi honau lotó mo e ʻatamaí.