Ko ʻEtau Tafaʻakí
Ueʻi ʻe he Ngaahi Lea ʻa ha Palōfita Moʻui
Ngaahi tā fakatātā ʻa J. Beth Jepson
ʻI heʻeku kei taʻu 15, ne u fakatokangaʻi ha ongo faifekau ʻi muʻa ʻi ha fale koloa. Naʻe fakaafeʻi au ʻe ha taha ʻo kinaua ke u haʻu ki he lotú. Naʻe ʻikai ke u tokanga ki ai, ko ia ai ne u talaange kiate kinaua, “Mahalo pē ha ʻaho,” peá u ʻalu au.
ʻI he ʻaho hono hokó, naʻe telefoni mai hoku mehikitangá ʻo kole ki heʻeku fineʻeikí ke ʻaluange ki hono ʻapí ke fanongo ki ha pōpoaki makehe. Naʻá ku lele atu mo ʻeku fineʻeikí peá u sio ki he ongo faifekau naʻá ku sio ki ai ʻi he ʻaho kimuʻá ʻokú na tangutu ʻi he ʻapi hoku mehikitangá! Naʻe tokanga ʻeku fineʻeikí ki heʻena pōpoakí, pea kamata ke u fakafanongo mo au foki. Ka neongo iá, ʻi he taimi naʻe fehuʻi mai ai ʻe he ongo faifekaú pe ʻoku ou tui ki ha palōfita moʻuí, naʻá ku tali ʻikai ʻaupito. Naʻe puke hake ʻe ha taha ʻo e ongo ʻeletaá ha tā ʻo Tōmasi S. Monisoni peá ne fakamoʻoni ko Palesiteni Monisoní ko ha palōfita. Naʻá na fakaafeʻi au ke u haʻu ki he konifelenisi lahí he ʻaho hono hokó ke u fili pē maʻaku. Naʻá ku loto fiemālie pē ke ʻalu koeʻuhi ko ʻeku fieʻiló.
ʻI he ʻaho hono hokó, ne mau aʻu ki he falelotú ʻi he fakaʻosiʻosi e fua lotú. ʻI heʻeku lue atu ki he lokí, naʻá ku mamata kia Palesiteni Monisoni ʻoku ʻasi mai he ʻatá. Naʻá ne malimali mo pehē, “Siʻoku kāinga ʻofeina, ʻoku ou talitali lelei kimoutolu …”
ʻI he taimi ko ia ne lea mai ai ʻa Palesiteni Monisoní, naʻe haʻu ha ongo mālohi kiate au, ʻo fakapapauʻi mai ko ha palōfita ia ʻa e ʻOtuá. ʻI he fakaʻosinga ʻo e konifelenisi lahí, naʻá ku talaange ki he ongo faifekaú, “ʻOku ou fie papitaiso.” Talu mei ai, kuó u ʻosi ngāue fakafaifekau pea kuó u akoʻi ki ha niʻihi tokolahi ʻa e ngaahi moʻoni fakaʻofoʻofa ʻo e ongoongolelei kuo toe fakafoki maí.
ʻOku ou ʻilo kuo tāpuekina kitautolu ʻe he ʻOtuá ʻaki hono toe uiuiʻi ʻo ha kau palōfita. ʻOku ʻofa ʻa e ʻOtuá ʻiate kitautolu mo folofola mai ʻo fakafou ʻi he kau palōfita ʻi onopōní.
Maicon B., Sā Paulo, Palāsila
ʻOku ʻIkai Te u Mā
Lolotonga ʻeku ako ʻi ha ʻapiako nofomaʻú, naʻá ku nofo ai ʻi ha fale nofo totongi mo ha fānau ako kehe. Ne u feinga hoku lelei tahá ke moʻui ʻaki e ngaahi tefitoʻi moʻoni ʻo e ongoongoleleí ʻi he lotu mo hono faʻa ako e folofolá.
ʻI ha ʻaho ʻe taha naʻe fakatokangaʻi au ʻe haku kaungā ako ʻoku ou ako e Tohi ʻa Molomoná ʻi hoku funga mohengá. Naʻe kamata ke ne hiki fakaʻita e ngaahi founga kotoa pē naʻá ne pehē ai ʻoku loi ai ʻa hoku siasí. Naʻá ne fakahā leva ki he taha kotoa ʻi he fale nofo totongí fekauʻaki mo ʻeku tui “faikehé.” Naʻe kamata ke manukiʻi au mo ʻeku tui fakalotú ʻe he niʻihi ʻo hoku kaungā akó; pea fakaʻehiʻehi e niʻihi kehé meiate au. Faifai peá u fufuuʻi ʻeku Tohi ʻa Molomoná ʻi ha puha vala peá u ako pē ʻa e Tohi Tapú koeʻuhi ke taʻofi hono manukiʻi au ʻe hoku kaungā akó.
Naʻe hoko atu ʻa ʻeku ako e Tohi Tapú ʻou aʻu ki he Loma 1:16, ʻa ia ʻoku fakahā mai ai: “He ʻoku ʻikai te u mā ʻi he ongoongolelei ʻo Kalaisí: he ko e mālohi ia ʻo e ʻOtuá ki he fakamoʻui kiate kinautolu kotoa pē ʻoku tuí.” Naʻá ku fakatokangaʻi ʻi heʻeku fufuuʻi e Tohi ʻa Molomoná, naʻá ku fakahā ki hoku kaungā akó ʻa ʻeku mā ʻi heʻeku ngaahi tui fakalotú. Ne u toʻo mai ʻeku Tohi ʻa Molomoná mo kole ki he Tamai Hēvaní ha fakamolemole. Ne u ʻalu leva ki hoku ngaahi kaungāmeʻá ʻou fai ʻeku fakamoʻoni ki he ongoongolelei kuo toe fakafoki maí. Ne tuku hono fakamataliliʻi au ʻe he tokolahi ʻo kinautolu pea nau toe hoko ai ko hoku ngaahi kaungāmeʻa.
ʻOku ou ʻilo ʻoku mahino ki he ʻOtuá ʻa e ngaahi faingataʻa ʻoku tau fouá. ʻI he taimi ʻoku tau taukaveʻi ai ʻetau tuí mo fakahā ʻoku “ʻikai te u mā ʻi he ongoongolelei ʻo Kalaisí,” te Ne ʻomi kiate kitautolu Hono mālohí, ʻEne maluʻí, mo e fakahinohinó.
Pamela O., Abuja, Naisīlia
Ngāue Tokoni ʻo Fakafou ʻi he Fakaʻilonga Nimá
ʻI hoku māhina onó, ko ʻeku ʻuluaki fakaʻilongá ko e “huʻakau” pea, hili ha ngaahi uike mei aí, naʻá ku lea ʻaki e “panda.” ʻOku ou lava ʻo fanongo, ka ko ʻeku fuofua leá ko e Talanoa Fakaʻilonga Nima Faka-ʻAmeliká (ASL). Naʻe ngāue fakafaifekau ʻeku fineʻeikí ʻi ha misiona ASL peá ne hoko atu leva ke ako e talanoa fakaʻilonga nimá ʻi he ʻapiakó, peá ne fie maʻu ke u ʻiloʻi ia foki.
Kuo hoko e talanoa fakaʻilonga nimá ko ha tāpuaki fakaofo ia ʻi heʻeku moʻuí. Kuó ne fakangofua au ke u sio mo ako lahi ange ka ne taʻeʻoua ia. ʻOkú ne fakatahaʻi ‘a e kakaí. ʻOku ou manako ke u akoʻi e meʻa ʻoku ou ʻiloʻí ki he kakaí ʻo fakafou ʻi he ngaahi akoʻi fakatāutahá mo e ngaahi fakamatala ʻi he akó mo e siasí. ʻOku toe fuʻu fakafiefia ʻeku mamata ʻi he konifelenisi lahí mo e ngaahi vitiō ‘a e Siasí ki he talanoa fakaʻilonga nimá fakataha mo ʻeku fineʻeikí.
Kuo hanga ʻe he talanoa fakaʻilonga nimá ʻo langa hake ʻeku fakamoʻoní. ʻOku lava ke u ʻiloʻi ha fānau tokolahi ange ʻa e ʻOtuá ka ne taʻeʻoua ia, pea ko ha meʻangāue lelei ia ke fakaʻaongaʻi ʻi he ngāue tokoni ki he niʻihi kehé foki. ʻOku ou fakamālō koeʻuhi ko e tāpuaki ko ʻeni ʻi heʻeku moʻuí pea mo e kakai fakaofo kuó u lava ke feʻiloaki mo ia mo ako mei aí.
Israel H., Oregon, USA