ʻIloʻi Hoʻo Ngaahi Meʻafoakí

Fai ʻe Justina Lichner

ʻOku nofo ʻa e tokotaha naʻá ne faʻú ʻi Lainileni-Palatineti, Siamane.

Hangē ʻoku pehē maʻu pē ʻe he taha kotoa, “Kapau pē naʻá ke ʻiloʻi hoʻo fisifisimuʻá.” Sai, ko hono moʻoní, ʻi he taimi ʻe niʻihi ʻoku ʻikai ke ke ʻiloʻi ʻa hoʻo fisifisimuʻá. ʻI he taimi ʻoku ʻikai ke tau ongoʻi ko kitautolu ʻoku poto tahá, lelei tahá, fakaʻofoʻofa tahá, fakaoli tahá, mo e talēnitiʻia tahá, ʻoku mole atu ʻetau loto-fakapapau fakaekitá.

Ka mou fakakaukau ki he meʻá ni: ko e ngaahi foha mo e ngaahi ʻofefine kotoa pē kitautolu ʻo e Tamai Hēvaní. ʻI heʻene peheé, kuó Ne foaki mai kiate kitautolu ha ngaahi meʻafoaki mo e talēniti makehe ke tokoniʻi kitautolu ke fakakakato hotau tufakanga fakalangí. ʻI heʻetau ʻiloʻi ʻa e ngaahi meʻafoaki ko ʻení, ʻoku tau manatu ai ki hotau mahuʻinga fakalangi ko ʻEne fānaú, pea ʻoku tau lava ke ofi ange kiate Ia mo tokoniʻi e niʻihi kehé ke fai pehē.

ʻIloʻi Hoʻo Ngaahi Meʻafoakí

Ko e ngaahi fakakaukau ʻeni ʻe hiva ke tokoniʻi koe ke ke ʻiloʻi ha niʻihi ʻo e ngaahi meʻafoaki ʻoku ʻikai-fuʻu-mahinó.

1. Kole ki he niʻihi kehé ke fakahā atu ke ke ʻiloʻi.

   ʻI he taimi ʻe niʻihi ʻoku ʻikai ke tau mamata ki he meʻa ʻoku mamata mai ki ai e niʻihi kehé ʻiate kitautolú. Kole ki ha kaungāmeʻa, kāinga, pe taki ʻo e Siasí ke ne fai atu ha kiʻi tohi fekauʻaki mo ha meʻafoaki pe talēniti ʻoku nau fakatokangaʻi ʻiate koe.

2. Fekumi ki he ngaahi meʻafoaki ʻi he taimi faingataʻá.

   Lolotonga e ngaahi taimi faingataʻá te tau lava ʻo fili ke fisikituʻa hotau ngaahi ʻulungaanga lelei tahá pe ko hotau ngaahi ʻulungaanga kovi tahá. ʻI he taimi faingataʻá, tokanga taha ki hono ʻiloʻi mo fakaʻaongaʻi ho ngaahi ʻulungaanga mo e meʻafoaki lelei tahá.

3. Lotua ki ha tokoni ke ʻiloʻi hoʻo ngaahi meʻafoakí.

   ʻOku ʻafioʻi ʻe he Tamai Hēvaní hotau tufakanga fakalangí. Kapau ʻoku faingataʻa ke tau vakai ki ai ʻiate kitautolu, te Ne lava ʻo tokoni mai. ʻE lava ke ke lotua ha tokoni ke ʻiloʻi hoʻo ngaahi meʻafoakí.

4. ʻOua naʻá ke manavasiʻi ke mafao atu.

   ʻOku tau fakatupulaki nai pē ʻa e ngaahi meʻafoaki kuo tau ʻosi ʻilo ʻoku tau maʻú koeʻuhi he ʻoku tau fuʻu manavasiʻi ke fai ha meʻa kuo teʻeki ai ke tau fai ki muʻa? Ko e taimi ʻeni ke fai ai ha meʻa foʻou mo kumi e ngaahi meʻafoaki taʻe ʻiloá.

5. Fekumi ʻi he folofola ʻa e ʻOtuá.

   ʻOku tokoniʻi kitautolu ʻe he Tamai Hēvaní ke tau ʻiloʻi mo fakatupulaki ʻetau ngaahi meʻafoakí ʻo fakafou ʻi ha fanga kiʻi tokoni ʻoku maʻu ʻi he folofolá—ʻoku meimei ke fakafou ia ʻi he ngaahi fakaafe ke ngāué. Hangē ko e potufolofola ko ʻení: “Tuku ʻa e fefakakikihiʻakí; tuku ʻa e felauʻikoviʻaki ʻiate kimoutolú” (T&F 136: 23). Ko e hā ha ngaahi meʻafoaki te ke lava ʻo fakatupulaki mei he fakaafe ko ʻení? Ko e meʻafoaki ʻo e lea ʻaki e ngaahi lea ʻofá, ko e meʻafoaki ke fakanonga e niʻihi kehé, ko e meʻafoaki ʻo e fakamaʻumaʻú, pea toe lahi ange ai. Pea ko e haʻu ia mei he veesi pē ʻe taha! ʻE lava ʻe he lau ʻo e folofolá mo fakafanongo ki he ngaahi ueʻi ʻa e Laumālié ʻo tokoniʻi koe ke ke ʻiloʻi hoʻo ngaahi meʻafoakí.

6. Fakakaukau ki he niʻihi kehé.

   ʻI he taimi ʻe niʻihi ʻoku ʻikai maʻu hotau ngaahi ʻulungaanga lelei tahá mei heʻetau tokanga taha pē kiate kitautolú, ka ʻi heʻetau tokanga taha ki he founga ʻe lava ke tau ngāue fakataha mo tokoniʻi ai e niʻihi kehé. ʻI he taimi te tau fai ai iá, te tau vakai ai ki he ngaahi meʻafoaki faka-Kalaisi lahi ʻoku tau maʻú.

7. Fakakaukau ki he kakai ʻokú ke fakaʻapaʻapaʻí.

   Ko hai ha niʻihi ʻo hoʻo kau faʻifaʻitakiʻanga leleí? Te ke lava ʻo ʻai ha lisi ʻo e ngaahi meʻafoaki kotoa pē ʻoku maʻu ʻe hoʻo kau faʻifaʻitakiʻanga leleí pea, fakamanatua hono ʻiloʻi ʻo e ngaahi meʻa ʻoku mou faitatau aí, kae ʻoua naʻá ke tokanga taha ki homou faikehekehé.

8. Fakakaukau ki ho fāmilí.

   Ko e hā ha ngaahi meʻafoaki ʻokú ke maʻu ʻa ia ʻoku toe maʻu foki ia ʻe hoʻo ngaahi tokouá, mātuʻá, pe ngaahi kuí? Hoko atu! Fakatotolo e hisitōlia fakafāmilí, ʻilo e ngaahi talanoá, pea fakaʻilongaʻi ha ngaahi meʻafoaki lahi ange ʻokú ke vahevahe mo ho fāmilí.

9. Maʻu pe lau ho tāpuaki fakapēteliaké.

   ʻE lava ke fakamatala ho tāpuakí fekauʻaki mo e ngaahi meʻafoaki ʻokú ke maʻu mo totonu ke fakatupulakí, pea ʻe toe lava foki ke fakamahinoʻi kiate koe ʻa e hala te ne tataki ai koe ki ha ngaahi meʻafoaki mo e talēniti foʻoú.

Hoko ʻo Haohaoa ʻIate Ia

ʻOku ʻikai fie maʻu ke tau lelei taha ʻi he meʻa kotoa pē ke ʻiloʻi ʻoku tau ʻaonga ko e fānau ʻa e ʻÓtuá. ʻOku fie maʻu pē ke fakatapui kitautolu ke tau ʻiloʻi mo fakatupulaki ʻetau ngaahi meʻafoakí mo e talēnití—pea ʻo ka hili ia, ʻi he Fakalelei ʻa Sīsū Kalaisí ʻe lava ke tau haohaoa ai iate Ia (vakai, Molonai 10:32).

Ko e Holi ke ʻIló

“ʻOku ou ʻilo kuo lahi e ngaahi meʻafoaki mo e talēniti ʻoku fakaʻamu ʻetau Tamai Hēvaní ke Ne foaki maʻatautolú, ka ‘ʻoku makatuʻunga ia ʻi heʻetau kole ke maʻu kinautolú. ʻOku fie maʻu ke ngāue pe fāifeinga ʻi heʻetau tafaʻakí ke maʻu e ngaahi tāpuakí’ (Bible Dictionary, ‘Prayer’).”

ʻEleta Mervyn B. Arnold ʻo e Kau Fitungofulú, “ʻOku Ou ʻi Fē? Founga ke ʻIloʻi mo Fakatupulaki ai Hoʻo Ngaahi Meʻafoaki Fakalaumālié mo e Ngaahi Talēnití,” Liahona, Tīsema 2014, 61.

Tokoniʻi e Niʻihi Kehé ke nau ʻIlo e Ngaahi Meʻafoakí

ʻOku tau vakai ki ha ngaahi meʻa ʻi he niʻihi kehé ʻa ia ʻoku ʻikai ke nau lava ʻo ʻiloʻi ʻiate kinautolu. Vahevahe ‘i he uiké ni ʻa e ngaahi meʻa ko iá mo ha kaungāmeʻa pe mēmipa ʻo e fāmilí. Ko ha ngaahi fehuʻi ʻeni ke ke fai pē kiate koe, ʻa ia te ne lava ke tokoniʻi koe ke ke ‘iloʻi ʻa e ngaahi meʻafoaki ʻa e niʻihi kehé.

1. Ko e hā ha meʻa kuo nau fai ke tokoni atú?

2. Ko e hā ha meʻa ʻokú ke saiʻia ai ʻiate kinautolú?

3. Ko e hā e meʻa ʻoku nau poto aí?

4. Ko e hā e meʻa ʻoku nau feinga ke ke lelei ange aí?