Fakaakeake ʻa e Kāingalotú Mei he Saikoloné
Naʻe maumauʻi lahi ʻe Saikolone Kita ʻa Tonga ʻi he pehē ʻe he tokolahi ko e fakatamaki kovi taha ʻeni ʻi he taʻu ʻe 60 kuohilí.
Naʻe pehē ʻe ha taha ʻo e kau mēmipá, Lima Finau, “ko e taha ia ʻo e ngaahi matangi fakamanavahē taha kuó u fehangahangai mo iá.”
Naʻe ʻi ʻapi ʻa Sisitā Finau mo hono husepāniti ko Tuaí mo e fānau ʻe toko tolu ʻi he tō mai e saikoloné.
Naʻá ne pehē, “Naʻe matuʻaki fakailifia ʻaupito.
Naʻe fuʻu mālohi, pea naʻe lahi ʻa e maumaú. Naʻe fakaʻauha homau falefakatoló ʻo lī ki he tafaʻaki ki mui ʻa e kaungāʻapí. Naʻe haea mo e ʻato e palepale meʻalele ʻa e kaungāʻapí.
“Naʻá ku houngaʻia pē naʻá ku fakataha mo hoku fāmilí ʻi he taimi naʻe hoko aí.”
Naʻe feʻunga mo e 50% ʻa e ngaahi ʻapi ne fakaʻauha pe maumaú pea fakaʻauha foki mo e ngaahi fale ‘kehe’ lolotonga e saikoloné. Naʻe fesi pea taʻaki mo e aka e ʻuluʻakaú pea ʻoku maumau e ngaahi laine ʻuhila ʻi he kotoa e motú. ʻOku fakafuofuá ʻe lau uike pea toki fakaulo mai e ʻuhilá.
Kuo tokoni mo e kau faifekau ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ki hono fakaʻataʻatā ʻo e ngaahi halá. ʻOku nau tokoni foki ki he fakamaʻá, tā e ʻuluʻakaú, mo e ngaahi ngāue fakamaʻa kehe pē.
ʻOku fai foki ʻe he kāingalotú honau lelei tahá ke tokoni, ʻo hangē ko Sisitā Vaʻenukú, ʻa ia naʻá ne teuteu e meʻatokoni maʻá e koló ʻi ha ngaahi houa siʻi pē hili e mavahe e saikoloné mei Tongá.
Ka naʻe ʻikai ofo ai ʻa Lina Taufa, ʻa ia naʻá ne pehē, “ʻOku ou manatuʻi ʻi hoku taʻu 15 naʻe feimeʻatokoni maʻu pē ʻa Sisitā Vaʻenuku maʻá e siasí pe ko hono makapuna ʻe toko 100 nai. Kuo teʻeki ai ha liliu ʻo aʻu mai ki he ʻahó ni! Ko kinautolu ʻoku nau ʻiloʻi iá ʻoku nau ʻiloʻi te ne foaki ʻene sēniti fakaʻosí ki ha muli”.
Naʻe fakaava e ngaahi ʻapisiasi ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ki ha kakai ʻe toko 9,000 ʻa ia ne nau kumi hūfanga ki he ngaahi falé ke hao mei he saikoloné.
Hili e pō ne tō mai ai e matangí, ne kau fakataha e kau ngāue tokoni e Ngaahi Nima Fietokoní mo honau kaungāʻapí ke kamata ʻa e ngāue fakamaʻá mo e toe langa haké.
Naʻe pehē ʻa Tāniela Utalafi, ko e tangata lea maʻá e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ‘ʻOku kumi hūfanga ʻa e kau faifekau ʻi Tongá ʻi he ngaahi ʻapisiasi mamaʻo mei he matāfangá pea kuo fai e ngaahi teuteu ke tokoni ki hono tauhi malu kinautolú. ʻOku tau lotua ʻa kinautolu kotoa pē ʻi he Pasifiki Sauté, ʻa ia ʻoku uesia ʻe he matangi mālohi ko ʻení.’
Kuo kakato mo malu ʻa e kau faifekau kotoa pē mo e kāingalotu kehe ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.