“‘Oku ou toutou fakafehoanaki au ki he niʻihi kehé, tautautefito kiate kinautolu ‘oku ngali haohaoa ʻenau moʻuí. ʻE anga fēfē haʻaku toe ongoʻi loto-falala ange?”
Laʻitā mei he Getty Images
Lotua Ke Ke ʻIlo Hoʻo Ngaahi Meʻafoakí
ʻOku lahi e ngaahi talēniti mo e ngaahi meʻafoaki fakalaumālie kuo foaki fakatāutaha kiate koe ʻe he Tamai Hēvaní. ʻOku ʻi ai ha ngaahi founga ʻa ia ko koe pē te ke lava ʻo tāpuekina e moʻui ʻa e niʻihi kehé. Ko e palani ʻeni ʻa e Tamai Hēvaní. Lotua ke ke ʻiloʻi e ngaahi meʻafoaki kuo foaki kiate koé, pea kapau te ke fie maʻu ha fakahinohino lahi ange, kole kiate kinautolu ʻoku ofi atu kiate koé. ʻI hoʻo fakafanongo ki he Laumālié pea feinga ke ʻiloʻi mo fakatupulaki ho ngaahi talēnití mo e ngaahi ʻulungaanga faka-ʻOtuá, te ke maʻu ha loto-falala kiate koe ne teʻeki ke ke ʻilo ki ai.
Amy P., taʻu 17, Kenitaki, USA
ʻAi Ke Ke Maheni Ange mo Kinautolu
Ko e taimi ko ia ʻoku ou fakafehoanaki ai au ki ha taha kehé, ʻoku ou feinga ke ʻiloʻi lelei ange e tokotaha ko iá. ʻI he taimi ʻoku ou maheni ai mo ʻeku “heló”, ʻoku hā mahino ai ʻa e fehangahangai ʻa e taha kotoa pē he funga ʻo e māmaní mo ha ngaahi faingataʻa ʻi heʻenau moʻuí. Ko e lahi ange ʻeku talanoa ki he tokotaha ko iá, ko e lahi ange ia ʻeku kamata ke mamata kiate kinautolu ko ha kaungāmeʻa kae ʻikai ko ha taha ʻoku ngali haohaoa.
Amelia C., taʻu 15, ʻAitahō, USA
Ko e Fakakaukau Pē ʻa e Tamai Hēvaní ʻoku ʻAongá
ʻI heʻene malanga he konifelenisi lahi ʻo ʻOkatopa 2016, “ʻOku ou Lelei Feʻunga Nai? Te u Lava Nai?” ʻOku pehē ʻe ʻEletā J. Tēvini Kōnisi ‘o e Kau Fitungofulú, “Ko e lau pē ʻoku mahuʻinga kiate kitautolú, ʻa e fakakaukau mai ko ia ʻa ʻetau Tamai Hēvaní kiate kitautolú. Kātaki ʻo kolea fakamātoato ʻa ʻEne fakakaukau kiate koé. Te Ne ʻofa mo fakatonutonu kitautolu ka heʻikai ke fakatupu lotosiʻi.” ʻI heʻeku fakakaukau he ʻikai ke u teitei lelei feʻunga ʻo hangē ko e kakai ʻoku ou feohi mo iá, ʻoku ou tafoki ki heʻeku Tamai Hevaní pea feinga ke manatuʻi ko e ʻofefine au ʻo ha ʻOtua ʻofa ʻokú Ne hoifua ke tokoniʻi au ke u aʻu ki hoku tuʻunga malava kakató pea hoko ʻo hangē ko e tokotaha ʻokú Ne ʻafioʻí te u aʻusiá, ʻo kapau te u fekumi kiate Ia.
Amanda M., taʻu 19, Palaná, Palāsila
Lotua ha Loto-falala
Naʻá ku faʻa fakahoa au ki he niʻihi kehe ʻa ia ne u pehē ʻoku ʻi muʻa ʻiate aú, tautautefito ki he kakai naʻe faingamālie fakapaʻangá. ʻI he taimi naʻá ku lotu ai ki he Tamai Hēvaní, naʻá Ne ‘omi kiate au ha loto-falala. Naʻá ku ʻilo neongo e faingataʻá, ʻe tokoniʻi au ʻe he ʻOtuá koeʻuhi he ʻikai te Ne ʻomi ha fatongia taʻe te Ne teuteu ‘a e founga ke tau lava ʻo fakahoko ai iá (vakai, 1 Nīfai 3:7; 17:3).
Joshua O., taʻu 19, Lakosi, Naisīlia