ʻOku ʻI Heni ʻa e Siasí?

Jon Evans, Kalefōnia, USA

Tā fakatātā ʻa Allen Garns

Naʻá ku kau ki he Siasí ʻi hoku taʻu 36, pea ʻi he taimi ʻe niʻihi naʻá ku ongoʻi mālohi fakalaumālie. ʻI he ngaahi taimi kehé naʻá ku fai pē ha meʻa angamaheni. Naʻe kamata ke u faingataʻaʻia fakalaumālie tuʻunga ʻi ha taimi-tēpile femoʻuekina he ngāué, kamata ngāue hoku uaifí ʻi ha ngāue foʻou, mahamahakí, pea mo e ngaahi faingataʻa kehe, Naʻá ku ʻalu ki he lotú mo tokoni ke akoʻi e kōlomu ʻo e kau tīkoní, ka ko e meʻa pē ia naʻá ku ongoʻi te u lava ʻo faí. Naʻe ʻikai ke u maʻu ʻa e mālohi ke fakaava hake ʻeku folofolá pe tūʻulutui ke lotu.

Naʻá ku kei faingataʻaʻia pē ʻi heʻeku mavahe ʻi ha folau fakapisinisi ki he fakatokelau ʻo Sileí. Mei he malaʻe vakapuna ʻi Kopiapó, ne mau fakaʻuli houa ʻe ua ki he feituʻu ʻe fokotuʻu ai ha naunau sola ʻi he Toafa ʻAtakama ʻo Sileí. Naʻá ku ʻohovale ʻi he mamaʻo pehē ʻa e potu ko ʻení, pea naʻe laulau maile ʻa e toafa lanu kulokulá. Naʻe fakaʻohovale e tuenoa ʻa e funga fonuá.

Hili haʻamau nofo ʻi he feituʻu ko iá ʻi ha uike ʻe taha, ne mau fakaʻuli ki he kolo ofi tahá ke ʻomi ha ngaahi naunau. Ne u sio ai ki ha fale naʻá ne maʻu ʻeku tokangá. Naʻá ku kole ki he fakaʻulí ke ne afe ki he kauhalá. Naʻe fakaʻofoʻofa e ngaahi konga kelekele ʻo e falé ʻa ia ne ʻā takaiʻi kinautolu ʻaki ha ngaahi ʻā ukamea ʻuliʻuli. ʻI he tafaʻaki ki muʻa ʻo e falé naʻe tuʻu ai ha fakaʻilonga angamaheni, “La Iglesia de Jesucristo de los Santos de los Últimos Días” pe “Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.”

“ʻOku ʻi heni ʻa e Siasí?” Ko ʻeku fakakaukaú ia. Naʻá ku ofo ʻi he aʻu mai e Siasí ki he potu mamaʻo ko ʻeni ʻo e māmaní. Ne u faitaaʻi ʻa e falelotú ʻo ʻave ia ʻi ha pōpoaki telefoni ki hoku uaifí. Naʻe ongo mālohi kiate au ʻa ʻene talí: “ʻOku tokanga ʻa e Tamai Hēvaní ki Hono kakaí he feituʻu kotoa pē.”

Ko ha pōpoaki fakahangatonu ʻeni kiate au mei heʻeku Tamai Hēvaní. ʻI he loto-hohaʻa ʻo e moʻui fakaʻahó, ne ngalo ʻiate au, pea fie maʻu ke fakamanatuʻi mai, ʻoku ʻofa ʻa e Tamai Hēvaní ʻi Heʻene fānaú kotoa pē. ʻOkú Ne ʻofa ʻi he Kāingalotu ko ia ʻi he kiʻi kolo siʻisiʻi mo mamaʻo ʻi he lotolotonga ʻo e toafá, pea ʻokú Ne ʻofa foki ʻiate au.

ʻI he pō ko iá naʻá ku tūʻulutui ʻo fakamālō ki he Tamai Hēvaní koeʻuhi ko e ngaahi tāpuaki naʻá Ne ʻomi kiate au he ʻaho ko iá. ʻI heʻeku ʻiloʻi ʻokú Ne ʻofa ʻiate aú, kuo tokoniʻi ai au ke toe langa hake ʻeku tuʻunga fakalaumālié, pea ʻoku hokohoko atu ʻa ʻene fakamālohia aú ʻi he ʻaho takitaha.