Fakahā Maʻa Hotau Kuongá
Ngaahi talanoa ʻa e kau palōfitá mo e kau ʻaposetoló fekauʻaki mo e fakahā ʻi he 1978
Tufa ʻe he kau tīkoni ʻi Manasi, Palāsilá, ʻa e sākalamēnití. Koeʻuhí ko e fakahā ʻi he 1978, ʻoku lava ai ʻe he kau maʻu lakanga fakataulaʻeiki moʻui taau ʻo ha faʻahinga matakali pē ʻo fakahoko e ngaahi ouau ʻo e lakanga fakataulaʻeikí.
Ko e Fekumí
Palesiteni Sipenisā W. Kimipolo (1895–1985)
Palesiteni fika 12 ʻo e Siasí
“Naʻá ku ʻalu toko taha pē ʻi he ʻaho ki he ʻaho ki he loki ʻi ʻolunga ʻi he temipalé he loto māluʻia mo fakamātoato ʻou ʻohake ai hoku lotó ki he ʻEikí mo u fakahā ange te u fai hoku tūkuingatá ke fakahoko ʻa e polokalamá. Naʻá ku fie maʻu ke fai e finangalo ʻo e [ʻOtuá]. …
“Ne mau aʻusia ha meʻa nāunauʻia ʻi hono fakahā mahino mai ʻe he ʻEikí kuo hokosia ʻa e taimi ʻe lava ke hoko ai ʻa e houʻeiki tangata mo e fefine moʻui taau ʻi he feituʻu kotoa pē ko e kaungā ʻea hoko mo kaungā maʻu e ngaahi tāpuaki kakato ʻo e ongoongoleleí. ʻI heʻeku hoko ko ha fakamoʻoni makehe ʻo e Fakamoʻuí, ʻoku ou loto ke mou ʻiloʻi ʻa ʻeku ongoʻi vāofi mo Ia pea mo ʻetau Tamai Hēvaní ʻi he ngaahi taimi lahi ne u ʻalu ai ki he loki ʻi ʻolunga ʻi he temipalé, pea mo e ngaahi ʻaho lahi ne u ʻalu toko taha ai pē ki aí. Naʻe hanga ʻe he ʻEikí ʻo fakamahinoʻi kiate au ʻa e meʻa ke fakahokó.
Ngaahi Akonaki ʻa e Kau Palesiteni ʻo e Siasí: Sipenisā W. Kimipolo (2006), 292-93.
Ko e Lotú
Palesiteni Tōmasi S. Monisoni (1927–2018)
Palesiteni hono 16 ʻo e Siasí
“ʻI he fakaʻosinga ʻo e fakataha mo e kau Palesitenisī ʻUluakí mo e Kōlomu ʻo e Toko Hongofulu Mā Uá, ne mau fakahoko ha lotu makehe ʻi he ʻōlitá [ʻi he temipalé] ʻa ia naʻe fakahoko ʻe Palesiteni Kimipolo. Naʻá ne tautapa ki he ʻEikí ki ha fakamaama mo ha ʻilo kau ki he meʻá ni ʻa ia naʻe taukakapa hono ngaahi olá. Naʻe hoko ia ko ha fakafiemālie lahi ki he Kau Taki Māʻolungá ʻenau fanongo ki heʻene ngaahi kole loto-fakatōkilaló ʻi heʻene kolea ha tataki ki hono uiuiʻi māʻolungá.
“Naʻe toki fakahaaʻi ʻe he Kau Palesitenisī ʻUluakí kimui ange ʻenau houngaʻia ʻi he ‘laumālie ʻo e melino mo e uouongataha naʻe nofoʻia ʻi he fakatahá … ko e lelei taha ia kuo nau ongoʻí pea [ko ha] fakamoʻoni ia naʻe finangalo lelei ʻa e ʻEikí ki heʻemau fealēleaʻakí.’ …
“… Ko ha mōmeniti fakafiefia ia, he ne mau fanongo ki hono fakahā ʻe he palōfita ʻa e ʻEikí e fakahā ʻa e ʻEikí ki he taimi ko iá.”
ʻI Heidi S. Swinton, To the Rescue: The Biography of Thomas S. Monson (2010), 393.
Ko e Fakahaá
ʻEletā Pulusi R. Makongikī (1915–85)
ʻO e Kōlomu ʻo e Kau ʻAposetolo ʻe Toko Hongofulu Mā Uá
“Naʻe lilingi hifo ʻe he ʻEikí e Laumālie Māʻoniʻoní ʻi Heʻene ʻaloʻofá ki he Kau Palesitenisī ʻUluakí mo e Toko Hongofulu Mā Uá. … Naʻe hoko mai ʻa e fakahaá ki he palesiteni ʻo e Siasí; naʻe hoko fakafoʻituitui ki he tokotaha kotoa pē naʻe ʻi aí. Naʻe ʻi ai ha kau mēmipa ʻe toko hongofulu ʻo e Fakataha Alēlea ʻa e Toko Hongofulu Mā Uá mo e toko tolu ʻo e Kau Palesitenisī ʻUluakí. Ko hono olá ne ʻiloʻi ʻe Palesiteni Kimipolo, pea ne mau ʻilo kotoa ʻiate kimautolu pē, ʻi ha fakahā fakahangatonu mo fakataautaha kiate kimautolú, kuo hokosia ʻa e taimí ke fakaaʻu e ongoongoleleí mo e kotoa hono ngaahi tāpuakí mo e ngaahi fatongiá, kau ai ʻa e lakanga fakataulaʻeikí mo e ngaahi tāpuaki ʻo e fale ʻa e ʻEikí, kiate kinautolu ʻi he ngaahi puleʻanga, anga fakafonua, mo e matakali kotoa pē, kau ai mo e matakali ʻuliʻulí. Naʻe ʻikai hano toe fakafehuʻia ʻo e meʻa naʻe hokó pe ko e folofola mo e pōpoaki he hoko maí.”
“All Are Alike unto God” (Brigham Young University devotional, Aug. 18, 1978), 4, speeches.byu.edu.
Ko e Fakapapaú
Palesiteni Kōtoni B. Hingikelī (1910–2008)
Palesiteni hono 15 ʻo e Siasí
“Ne ʻi ai ha ongo molumalu mo māʻoniʻoni ʻi he lokí. Ne u ongoʻi ne fakaava mai ha matapā mei he taloni ʻo e langí ʻi he tūʻulutui ʻa e palōfita ʻo e ʻOtuá mo hono ngaahi Tokouá ʻo fai ʻenau tāutapá. Ne ʻi ai e Laumālie ʻo e ʻOtuá. Pea ʻi he mālohi ʻo e Laumālie Māʻoniʻoní naʻe ʻomai ki he palōfita ko iá ha tala fakapapau ko e meʻa naʻá ne lotu ki aí ʻoku tonu ia, kuo hokosia e taimí pea ʻi he taimi ní, ke foaki atu e ngaahi tāpuaki fakaofo ʻo e lakanga fakataulaʻeikí ki he houʻeiki tangata moʻui taau he feituʻu kotoa pē ʻo tatau ai pē ko e hā honau tupuʻangá.
“Naʻe ʻiloʻi ʻe he tangata kotoa pē ʻi he siakale ko iá ʻa e meʻa tatau ʻi he mālohi ʻo e Laumālie Māʻoniʻoní. …
“… Ne liliu ʻaupito e moʻui ʻa kimautolu ne ʻi aí, hili e meʻa ko iá. Naʻa mo e Siasí, kuo ʻikai kei tatau.”
“Priesthood Restoration,” Ensign, Oct. 1988, 70.