Misiona ʻe Ua, Monūʻia ha Ongo Fāmili ʻe Ua

Juan Manuel Gomez, Losalio, ʻĀsenitina

Lolotonga ʻeku ngāue ʻi he Misiona ʻAlesona Mesá, ne u faʻa maʻu ʻīmeili mei hoku tuofefine lahi ʻi ʻĀsenitiná. Naʻe ʻikai hoko ʻa Natāliá ko ha mēmipa ʻo e Siasí. ʻI he ngaahi taʻu ki muʻá, ʻi he taimi ne siʻi mālōlō ai ʻene tama fefiné, ne feinga homau fāmilí ke vahevahe e ongoongoleleí mo ia, ka naʻe ʻikai pē ke ne tali.

Naʻá ku hokohoko atu hono vahevahe ʻeku fakamoʻoní mo ia ʻi heʻeku ngāue fakafaifekaú. ʻI ha ʻī-meili ʻe taha, naʻá ku fakamatala ki ai ʻa ʻeku fetaulaki mo hoku hoá pea mo ha fefine. Kuo ʻosi mālōlō atu foki ʻa ʻene tama fefiné. Ne ma fakamoʻoni ki he ngaahi fāmili taʻengatá, pea naʻá ne ongoʻi e ʻamanaki lelei ʻi he meʻa naʻá ma vahevahé. Naʻá ku talaange kia Natālia ʻe lava ke ne ongoʻi ʻa e meʻa tatau. Naʻá ne tohi mai, ʻo fakahā kiate au ʻa ʻene fie maʻu ke ongoʻi e ʻamanaki lelei ko iá ka naʻá ne pehē ne ʻikai mālohi feʻunga ʻa ʻene tuí.

Ne u fakakaukau ke ʻave kia Natālia ha tohi kuo ʻosi hiki tohinima ke fakaafeʻi ia ke ne lotua ha tokoni ke ne tui. Naʻá ku toe ongoʻi ke u hiki ha palakalafi ʻe taha ʻi he lea faka-Pilitāniá pea fakatuʻasila ia ki ha faifekau. Ko e lea faka-Sipeiní pē ne ʻiloʻi ʻe Natāliá, ka naʻá ku talaange ki ai ke kumi ʻa e ongo faifekaú pea kole ange ke na liliu maʻana. Ne u ʻilo kuo pau pē ke ʻiloʻi ʻe ha faifekau ʻa e lea faka-Pilitāniá.

Ne taimi siʻi pē mei ai, ne u maʻu ha ʻī-meili meia Natālia. Naʻá ne maʻu e ongo faifekaú peá ne kole ange ke liliu ʻa ʻeku tohí. Ne na lau fakalongolongo ia mo malimali. ʻI he taimi ne ʻeke atu ai ʻe Natālia ʻa e meʻa kuó u tohí, naʻá na talaange, “Tuku muʻa ke tau talanoa ki ai!” Naʻá ku tohi ʻo fakahā ange ʻa e fefaʻuhi ʻa Natālia mo e mālōlō ʻa ʻene tama fefiné, peá u kole ki he ongo faifekaú ke akoʻi ia fekauʻaki mo e palani ʻo e fakamoʻuí.

Naʻe vahevahe ʻe he ongo faifekaú ha kiʻi pōpoaki nounou, pea naʻe saiʻia ʻa Natālia ʻi he meʻa ne na akoʻí. Ne toki fakahā ange ʻe Natālia ʻa ʻeku ngāue fakafaifekau ʻi Mesa, ʻAlesoná, USA. Naʻe pehē ʻe ha ʻeletā ʻe taha, ko ʻEletā Lāsoni, ko e feituʻu ia naʻá ne haʻu mei aí.

Hili ha taʻu ʻe taha, naʻá ku hiki ki he feituʻu naʻe nofo ai ʻa e fāmili ʻo ʻEletā Lāsoní. Naʻá ku maheni mo hono fāmilí ʻo hangē ko ʻene maheni mo hoku fāmilí, pea naʻe tāpuekina ai e ongo fāmilí. Ne lotua ʻe ʻEletā Lāsoni ʻa hono tehiná, ʻa ia naʻá ne fefaʻuhi mo ʻene fakamoʻoní. Naʻá ku lava ʻo vilo hoa mo hono tehiná mo tokoni ke ne fakamālohia ʻa ʻene fakamoʻoní. Naʻe hoko atu hono akoʻi ʻa Natālia ʻe ʻEletā Lāsoni mo hono hoá pea faifai pē peá ne papitaiso. ʻOku ou ʻiloʻi naʻe ʻave ʻe he ʻEikí kimaua ʻi ha hala ʻe ua, ko au ki ʻAlesona, pea ko ʻEletā Lāsoni ki ʻĀsenitina, koeʻuhi ke ma lava fakatouʻosi ʻo tokoniʻi Ia ke fakamālohia homa ongo fāmilí ʻi he ongoongoleleí.