Mei he Malaʻe Ngāue Fakafaifekaú
Tokoni Makehé
ʻOku nofo ʻa e tokotaha naʻá ne faʻú ʻi ʻAiouā, USA.
ʻI hoʻo ngāue fakafaifekaú, mahalo te ke fetaulaki mo ha kau fiefanongo ʻoku nau fie maʻu ha taha ʻi honau tafaʻakí, ʻa ia ʻoku loto fiemālie ke uku fakataha mo kinautolu ʻi he ngāué.
Laʻitā ʻo e tokotaha uku lolotó mei he Getty Images
Naʻá ku ʻalu hifo ki heʻeku fiemālié. Fute ʻe nima (mita ʻe 1.5) … Ne u ongoʻi hono tekeʻi au he ʻaú. Ko e fute ʻeni ʻe hongofulú. Fakafokifā pē kuo fakapoʻuli. Ne u ongoʻi e fakaʻau ke nounou ʻeku mānavá. Naʻe ʻikai hangē e tahi mokoʻīʻī mo fakapoʻuli ko ʻení ko e vai kaukau naʻa mau akoako aí. ʻI he ilifia mo e loto-manavaheé, ne u fakavave hake ki he fukahi vaí.
Naʻe ʻeke mai ʻe he taha tokoni ki he faiakó, “Ko e hā e meʻa naʻe hokó?” Ne u fakatē loʻimata. Naʻá ku lolotonga fakahoko ʻeku sivi fakamoʻoni ako uku-lolotó, ʻou feingaʻi ha uku fute ‘e 30 (mita ʻe 9), ʻa ia ko e taha ia e ngaahi pōtoʻi ngāue ʻoku fie maʻu ki he siví. Naʻe sio mai e tokoní ki heʻeku loto-hohaʻá peá ne fakapapauʻi mai te u sai pē. Naʻá ne fakalotolahi pē, kae ʻikai ke ne fakaʻaiʻai. Naʻá ne pehē he taimi ʻe taha, “ʻOku ʻikai fie maʻu ke ke fai ʻeni.” Ko e taimi ia naʻá ku ʻiloʻi ai naʻá ku fie maʻu ke u fakahoko iá.
Ne u fakatokangaʻi neongo naʻe faingataʻa kiate au, ka naʻe fie maʻu ke u fakahoko ia; naʻá ku fie maʻu ʻeku tohi fakamoʻoni akó. Ko ia ai naʻá ku mapuleʻi ʻeku ilifiá peá u fakakakato ‘a e toenga ʻo e ngaahi taukeí fakataha mo e kalasí ke lava he siví. Naʻe faingataʻa, ka naʻe lava ke u fai ia koeʻuhi ko e fakalotolahí.
ʻI ha ngaahi māhina mei ai ʻi heʻeku ngāue fakafaifekau ʻi Peluú, ne u manatuʻi ʻeku aʻusia faingataʻa ʻi he uku-lolotó ʻi heʻeku fakaafeʻi ‘a e kakaí ke fakamālohia ʻenau tuí pea liliu ʻenau moʻuí. Ko ha fāmili ʻe taha ne u manako mo hoku hoá ke ʻaʻahi ki ai, ko e kau Lameí. Naʻe faʻa talitali lelei kimaua ʻe Kalina mo ʻEniliki mo hona ongo ʻofefine taʻu hongofulu tupú, ko Kēleni mo Nīkola, pea vave ʻemau mahení. Naʻe ʻikai fuoloa mei ai kuo tali ʻe Kalina, Kēleni, mo Nīkola e ongoongoleleí mo kau ki he siasí.
Kae kehe, ne fie maʻu ʻe ʻEniliki ha kiʻi tokoni makehe. Ne kehe ʻema pōpoakí mei he meʻa naʻá ne ʻiloʻi ʻi heʻene tupu haké, pea ko ia ai ne fie maʻu ha kiʻi taimi lōloa ange ke ma maʻu ʻene falalá. Naʻe ʻi ai ha ngaahi hohaʻa kehekehe ʻa ʻEniliki. Ko e meʻa lahi naʻá ne hohaʻa ki ai ʻi he ongoongoleleí ko e Tohi ʻa Molomoná. Naʻe teʻeki ke ne fanongo ʻi he tohí ni pea naʻe faingataʻa ke ne lau ia mo maʻu e mahinó. Naʻe ongoʻi veiveiua ʻa ʻEniliki koeʻuhi ko e ʻikai ke ne feangai mo iá.
ʻI he taimi ko iá, ne hangē ʻa ʻEniliki ko aú ʻi he taimi naʻá ku kakau hake ai ki he fukahi vaí: ne hangē ne ʻalu lelei hifo pē e taha kotoa, kau mate au he ilifiá. Hangē foki ko aú, ne fie maʻu ʻe ʻEniliki ha tokoni makehe kae lava ke ne ikuna.
Naʻe aʻutaki mai ki ai e tokoni ko ʻení ʻi he ngaahi founga kehekehe. Naʻá ne maʻu e kau faifekaú ke tokoniʻi ʻene loto hohaʻá mo ongoʻi ʻa e Laumālié. Naʻa ne toe maʻu foki mo e kāingalotu he uōtí ke fakafeohi kiate ia mo akoʻi ia fekauʻaki mo hono fatongia ko e tamaí. Ka neongo iá, ko e tokoni lahi tahá ko e fāmili pē ʻo ʻEnilikí.
Naʻa mo e ʻamanaki ke papitaiso kinautolú, naʻe angamaheni ʻaki ʻe he kau Lameí ʻa ʻenau fakahoko e lotu fakafāmilí mo e ako folofolá. Ne nau kumi moʻo ʻEniliki ha ngaahi folofola ʻoku mata lalahi pea mo ha tatau hikitepi koeʻuhí ke faingofua ange ʻene ako e Tohi ʻa Molomoná. Naʻe tokoni lahi ʻeni kia ʻEniliki. Ne ʻikai ai ha taimi ne fakamālohiʻi ai ia ʻe ha taha; ne nau poupouʻi pē ia. ʻI heʻenau ngaahi tōʻongá, naʻa nau talaange, “ʻOku mau ʻilo te ke lava ʻo fai ʻeni.”
Naʻe tokoni ʻeni kia ʻEniliki ke ne ʻiloʻi ʻiate ia pē ʻa e mālohi ʻo e Tohi ʻa Molomoná. ʻI ha ʻaho ʻe taha, naʻá ne fakahā ai kuó ne fanongo ki he kotoa e tohí peá ne ʻiloʻi ko e folofola ia ʻa e ʻOtuá. Hili ha māhina ʻe fā nai mei he papitaiso hono uaifí mo e ongo ʻofefiné, naʻe fakahoko ai ʻe ʻEniliki ʻa e fili tatau pea papitaiso mo ia foki.
ʻOku pehē ʻe ʻEniliki ʻokú ne fakamālō he tokoni mo e kātaki ne fai ange ki aí ʻo fakaʻatā ai ia ke ne aʻusia e tuʻunga ʻokú ne ʻi ai he ʻaho ní. ʻI heʻeku hoko ko ha faifekaú, ne u ongoʻi ko ha tāpuaki ia ke u mamata ki he tā sīpinga ʻa e fāmili ko ʻení ʻi he ʻofa, ʻi heʻenau tokoniʻi honau husepānití mo e tamaí ke ne ikunaʻi ʻene ngaahi loto veiveiuá. Ne u houngaʻia foki ʻi heʻeku aʻusia ko ia e uku-lolotó ke ne fakafaingamālieʻi au ke ʻi ai haʻaku kiʻi ʻilo ki he faʻahinga ongo ne maʻu ʻe ʻEniliki mo e kau fiefanongo kehé lolotonga honau fakauluí.
ʻI hoʻo fakaafeʻi ‘a e kakaí ke nau fakatomala pea liliu lolotonga hoʻo ngāue fakafaifekaú, manatuʻi ko e meʻa ʻe fie maʻu ʻe he kakaí ko ha kiʻi fakalotolahi makehe. Mahalo naʻa nau fie maʻu ha taha falalaʻanga mo taukei ʻi honau tafaʻakí ʻokú ne pehē atu, “ʻE sai pē. ʻOku ou ʻilo te ke lava pē ʻo fai ia. ʻOku ou tui moʻoni kiate koe.” Mahalo te nau fakaʻamua ko e tokotaha koe ʻe loto lelei ke uku he ngāué fakataha mo kinautolu, tokoni ke fakataukeiʻi kinautolu ʻi he ngaahi tōʻongá mo e pōtoʻi ngāué, pea tokoniʻi kinautolu ke nau maʻu ʻenau fakamoʻoni akó, ʻa ia ʻoku iku ki he finangalo ʻo e ʻEikí.