Tortillas (Mā Faka-Mekisikoú) mo e Amigas (Kaungāmeʻa Fefeine)

Fai ʻe Lindsay Stevens Tanner mo Maryssa Dennis

Makatuʻunga ʻi ha talanoa moʻoni

ʻOku nofo ʻa e ongo faʻu tohí ʻi ʻIutā, USA.

“Kapau te ke fie maʻu ha kaungāmeʻa, kuo pau ke ke fakahaaʻi ʻokú ke tokanga” (Children’s Songbook, 262).

Naʻe taʻeoliʻia ʻa ʻEtuliana. Naʻá ne fie maʻu ke vaʻinga mo hono tokoua māhanga ko Taianá. Ka naʻe ʻalu ʻa Taiana ke fakatau ha meʻakai ʻi he māketi mo e fineʻeikí. Naʻe māpuhoi ʻa ʻEtuliana. Naʻe ongoʻi lala ʻaupito ʻa e falé. Naʻá ne fakaʻamu pehē ange mai naʻá ne ʻalu mo kinaua.

Naʻe fakakaukau ʻa ʻEtuliana ke ʻaʻahi ki hono kaungāʻapi ko Makalitá. Ne ʻosi fuʻu lalahi e fānau ʻa Makalitá, pea naʻá ne hangē ko ha kuifefine kia ʻEtulianá. Naʻá na fiefia lahi fakataha maʻu pē.

Naʻe ʻalu ʻa ʻEtuliana ki tuʻa. Naʻe vevela hifo kiate ia e laʻaá ʻi heʻene lue atu ki he fale ʻo Makalitá. Naʻe kiʻi hū atu hono ʻulú ki he loto matapaá. “ʻOkú ke ʻi ʻapi, Makalita?”

Ne ui mai ʻa Makalita, “ʻIo, ʻoku ou ʻi he peitó.” Naʻe maʻu atu ia ʻe ʻEtuliana ʻokú ne tangautu pē he tēpile ʻi peitó mo punou hono ʻulú. Naʻá ne sio hake ʻi he taimi naʻe hū atu ai ʻa ʻEtulianá.

Naʻe pehē mai ʻe Makalita, “Mālō e lelei ʻa ʻEtuliana.” Naʻá ne malimali ange. Ka naʻe ngali loto mamahi.

Naʻe ʻeke atu ʻe ʻEtuliana, “Ko e hā e meʻa ʻoku hokó?”

Naʻe māpuhoi ʻa Makalita. “ʻOku ʻikai ha meʻa ke ke hohaʻa ki ai.”

“Te u tokoniʻi fēfē ia ke ne ongoʻi sai angé?” Ko e fakakaukau ia ʻa ʻEtulianá. Ne hangē naʻe fiefia maʻu pē ʻa Makalita ʻi he taimi naʻá na feimeʻatokoni fakataha aí. “ʻE lava ke u tokoni atu ke ngaohi ha mā faka-Mekisikou?”

Naʻe pehē ʻe Makalita, “Naʻe toki ʻosí ni ʻeku fai ia.” Naʻá ne hiki hake ha tupenu holoholo ke fakahaaʻi ange ha fokotuʻunga mā faka-Mekisikou.

“Ka ʻe lava ke u tokoni atu hono kai e mā faka-Mekisikoú?” Naʻe kole ange ʻa ʻEtuliana mo malimali pē.

Ne kata ʻa Makalita. “ʻLava lelei. Tuku ke u fakamafana ha piini ke kai ʻaki.”

Naʻe tuʻu ʻa ʻEtuliana ʻi he tafaʻaki ʻo Makalitá he veʻe sitoú mo heuheu e piini he kuló. ʻI he taimi ne māfana ai e pīní, naʻá ne ʻave ia ki he tēpilé. Ne ʻomai ʻe Makalita e mā faka-Mekisikoú mo e sīsí.

Naʻe toʻo ʻe ʻEtuliana ha laʻi mā mafana ʻo vali ʻaki e pīní. Naʻá ne afuhi leva e sīsí ʻi ʻolunga. Naʻe ʻasi ifo! Ne ʻikai faʻa tatali ʻa ʻEtuliana ke kai. Ka naʻe ʻi ai e meʻa naʻá ne fie maʻu ke tomuʻa fai.

“ʻE lava ke u fai ha lotu?” Naʻe kole ʻe ʻEtuliana kia Makalita.

“ʻIo.”

Naʻe kuikui ʻe ʻEtuliana hono matá mo kūnima. “Tamai Hēvani, ʻokú ma fakamālō koeʻuhi ko e meʻatokoni ko ʻení. Fakamolemole ʻo tāpuakiʻi ia ke ne ngaohi kimaua ke ma moʻui lelei mo mālohi. Kātaki ʻo tokoniʻi ʻa Makalita ʻi ha faʻahinga meʻa pē ʻokú ne fie maʻu. ʻOku ou fiefia ʻi heʻene hoko ko hoku kaungāmeʻá. ʻI he huafa ʻo Sīsū Kalaisí, ʻēmeni.”

Naʻe ʻāʻā hake e mata ʻo ʻEtulianá. Naʻe malimali ‘a Makalita—ʻi he fakamoʻomoʻoni he taimí ni. Lolotonga ʻena kaí, naʻá na talanoa fekauʻaki mo e akó mo e ngaahi sipotí mo e ngaahi tohí. Naʻe saiʻia ʻa ʻEtuliana he talanoa mo Makalitá.

ʻI he taimi ne ʻosi ai ʻena kaí, naʻe fāʻofua ʻa ʻEtuliana kia Makalita. “Fakamālō atu ʻi he kiʻi kai maʻamaʻá. Naʻá ku fiefia lahi!”

Naʻe fāʻofua foki mo Makalita kia ʻEtuliana. “Fakamālō atu, ʻEtuliana. Naʻá ku fie maʻu ha kaungāmeʻa he ʻahó ni.”

Ne malimali lahi ʻa ʻEtuliana. “ʻOku ou fiefia ʻi heʻeta hoko ko ha kaungāfefiné.”

Naʻe pehē ʻe Makalita, “ʻOku ou fiefia mo au foki heʻeta hoko ko e ongo kaungāmeʻá.” “Fēfē ka ke ʻave ai leva e toenga mā ko ʻení ki ʻapi? ʻOku ou fuʻu mākona.”

Naʻé hopohopo fiefia ʻa ʻEtuliana ʻi heʻene foki ki hono falé. Naʻá ne ongoʻi mākona foki mo ia—kae ʻikai koeʻuhí ko e mā faka-Mekisikoú pē! Naʻá ne fonu ʻi he anga fakakaumeʻá mei hono ʻulú ki hono louhiʻi vaʻé.

Mā Faka-Mekisikou Anga Fakakaumeʻa

ʻOku lelei ʻaupito hono ngaohi e mā faka-Mekisikou koane faingofua ko ʻení mo vahevahe ia mo e ngaahi kaungāmeʻá! Fakapapauʻi ʻoku tokoni atu ha taha lahi.

ipu masa farina ʻe 2 (mahoaʻa koané/corn flour)

ipu vai mafana ʻe 1 mo e 1/2

1. Heu fakataha e mahoaʻa koané mo e vai mafaná. Natu e toú kae ʻoua kuo molū.

2. Ngaohi ha fanga kiʻi pulu fō iiki mei he toú. Faʻo ha foʻi pulu ʻe taha ʻi he vahaʻa ʻo e ongo laʻipepa taʻo mā ʻe ua.

3. Ngāue ʻaki ha peleti pe fakapaku ke toutou lomiʻi ʻaki e foʻu pulú.

4. Fakapaku e mā faka-Mekisikoú ʻo ʻikai fuʻu ulo lahi pe vela kae māmāfana pē. ʻI he taimi ʻe fakaʻau ke ʻasi moho ai e tafaʻaki ki ʻolungá, fulihi ke moho e tafaʻaki ʻe tahá.

5. Afuhi ʻaki ʻa e pīní mo e sīsí, pea kai fiefia ia!