ʻOku ʻI Ai Maʻu Pē ʻa e Māmá

Fai ʻe ʻEletā Dieter F. Uchtdorf

ʻO e Kōlomu ʻo e Kau ʻAposetolo ʻe Toko Hongofulu Mā Uá

Mei ha lea ʻi he konifelenisi lahi ʻo ʻOkatopa 2017, ʻi he taimi naʻe hoko ai ʻa ʻEletā ʻUkitofa ko e Tokoni Ua ʻi he Kau Palesitenisi ʻUluakí.

Lolotonga ʻeku fepunaʻaki he māmaní ko ha kapiteni ʻo ha kautaha vakapuna, ne toʻoa maʻu pē au ʻe he fakaʻofoʻofa mo e haohaoa e fakatupu ʻa e ʻOtuá. Ko e meʻa naʻe fakavaleloto taha kiate aú, ko e fetuʻutaki ko ia ʻa e māmaní mo e laʻaá. ʻOku ou lau ko ha lēsoni mahuʻinga fau ia ʻoku fakatātā ʻaki ha meʻa, ʻa e anga e tuʻu ʻa e fakapoʻulí mo e māmá.

Hangē ko ia ʻoku tau ʻiloʻí, ʻi he houa ʻe 24 kotoa pē, ʻoku vilo e poʻulí ki he ʻahó mo e ʻahó ki he poʻulí.

Ko e hā leva ʻa e poʻuli?

ʻOku ʻikai toe kehe ia mei ha ʻata.

Naʻa mo e pō kaupōʻuli tahá, ʻoku ʻikai hōloa e huhulu ia ʻa e laʻaá. ʻOku hokohoko atu ʻene ulo ngingilá. Ka ko e vaheua pē ʻe taha ia ʻo e māmaní ʻoku fakapoʻulí.

ʻOku hanga ʻe he pulia ʻa e māmá ʻo fakatupu ʻa e fakapoʻulí.

ʻI he taimi ʻoku tō mai ai e poʻulí, ʻoku ʻikai ke tau lotofoʻi pe hohaʻa naʻa kuo tāmateʻi e laʻaá. ʻOku ʻikai ke tau pehē ʻoku pulia pe mate ʻa e laʻaá. ʻOku mahino kiate kitautolu ʻoku tau ʻi hono ʻatá, pea ʻe hokohoko atu pē vilo ʻa e māmaní pea ʻe toe aʻu mai pē ʻa e huelo ʻo e laʻaá kiate kitautolu.

ʻOku ʻikai fakahaaʻi mai ʻe he fakapoʻulí ia he ʻikai ha maama. Ka ʻoku faʻa ʻuhinga pē ia ʻoku ʻikai ke tau ʻi he feituʻu totonú ke maʻu ʻa e māmá.

‘Oku hokohoko ulo atu e maama fakalaumālié ki he fakatupu kotoa ʻa e ʻOtuá.

ʻOku ʻatautolu ke tau tuʻu ʻi he feituʻu totonú ke tau sio ki he maama mo e moʻoni fakalangi ʻo e ongoongolelei ʻo Sīsū Kalaisí. Naʻa mo e taimi ʻoku tō mai ai e poʻulí ʻo ngali fakapoʻuli ʻa e māmaní, ʻe lava ke tau fili ke ʻaʻeva ʻi he maama ʻa Kalaisí, tauhi ʻEne ngaahi fekaú mo fakamoʻoni lototoʻa ʻo kau ki Heʻene moʻuí mo ʻEne maʻongoʻongá.

Ko e taimi kotoa pē ʻoku fakatafoki ai ho lotó ki he ʻOtuá ʻi he lotu fakatōkilalo, ʻokú ke aʻusia ai ʻEne māmá. Ko e taimi kotoa pē ʻokú ke fekumi ai ki Heʻene folofolá mo e finangaló ʻi he folofolá, ʻoku tupulaki e ulo ngingila ʻa e māmá. Ko e taimi kotoa pē ʻokú ke fakatokangaʻi ai ha fie maʻu tokoni ʻa ha taha peá ke feilaulauʻi hoʻo fiemālié ke fai ha tokoní, ʻokú ke fakamafola mo fakatupulaki ai ʻa e māmá. Ko e taimi kotoa pē ʻokú ke fakafisingaʻi ai ʻa e ʻahiʻahí mo fili ʻa e loto maʻá, fekumi pe foaki ai ha fakamolemolé, pe fakamoʻoni lototoʻa ki he moʻoní, ʻoku hanga ʻe he māmá ʻo tuli atu ʻa e fakapoʻulí kae tohoakiʻi mai ʻa e niʻihi ʻoku fekumi foki ki he māmá mo e moʻoní.