Ngaahi Manatú
Ko ha Foʻi ʻUhila Kulokula ʻe Taha
ʻOku nofo ʻa e tokotaha naʻá ne faʻú ʻi ʻOlikoni, USA.
Naʻe fakamanatu mai ʻe ha kiʻi meʻa teuteu ʻakau Kilisimasi siʻisiʻi e tuʻunga totonu ʻo e Kilisimasí.
ʻAtá mei he Getty Images
Naʻe ʻikai ko e Kilisimasí ia. Neongo ʻeku feinga ke fiefia hono tā e ngaahi fasi kilisimasí, ne u toho mai e ngaahi piní mo ongoʻi taʻeoliʻia pē. Naʻa fakamanatu mai ʻe he hina kūkisí ʻoku ʻikai ha taha ke ma taʻo meʻa. Hangē ne pehē mai ʻe he ngaahi fakatātā ʻo Sanitaá ʻoku siʻi ha ʻuhinga ia ke toe tautau ai e ngaahi sitōkení, mo hono fakamanatu mai ʻe he pepa kofu meʻaʻofá he ʻikai te ne ʻomi e fanga kiʻi leʻo fiefia ʻo e fānaú ʻi he pongipongi ko iá.
Ne mavahe atu he taʻú ni ʻema siʻisiʻi tahá ki he ʻunivēsití pea ne ongo fakataʻelata mo fakalongolongo homau ʻapí. Naʻá ku fili pē e meʻa teuteu naʻe ʻikai hā ai ʻa Sanitaá pea fakafoki e toengá ki honau ngaahi puhá.
Koeʻuhí naʻe ʻikai ʻi heni hoku husepānití, naʻá ku teuteuʻi tokotaha pē ʻa e fuʻu ʻakaú. Naʻe ʻohake ʻe hoku ʻofefine he fonó ʻi he ʻinitanetí ha ʻū lauʻi tā ʻo hoku fanga mokopuná ʻoku nau teuteuʻi ʻenau fuʻu ʻakaú, pea fakaʻānaua hoku lotó ki he ʻaneafí. Ne u fifili ki he vave pehē e ʻalu e taimí. Naʻe anga fēfē e tupu vahe pehē ʻeku fānaú? ʻI heʻeku kei fakakaukau ki aí, naʻá ku sio hifo ki he foʻi ʻuhila ʻi hoku nimá. Ko ha foʻi ʻuhila kulokula pē ʻe taha.
Naʻá ku vakavakaiʻi hono lanú, ko ha lanu kulokula mālohi. Kulamūmū. Naʻá ku sio takai ki he toenga ʻo e meʻa teuteú: meʻa teuteu siʻisiʻi pē ʻo e ʻaloʻí, ko ha ʻaiʻanga kai ʻo e manú ʻa ia ne ngaohi mei ha fanga kiʻi vaʻakau ʻaisipoloká, mo e ngaahi mataʻi tohi lanu koula naʻá ne sipela ʻa e NOEL. Ne kamata ke u tangi. Naʻe lanu kulokula ʻa e foʻi ʻuhilá—kulokula ʻo hangē ko e taʻataʻa ʻo e Fakamoʻuí.
Naʻá ku fakakaukau ki heʻeku faʻa ʻai maʻu pē e ngaahi teuteú ke tataú, sīpinga ʻo e kūkisí, mo e fiefia ʻa e fānaú ʻi he pongipongi Kilisimasí mo e meʻa naʻá ne ʻai au ke u fiefia ʻi he taimi Kilisimasí. Peá u fakakaukau ki heʻeku fānaú mo honau ngaahi fāmili taʻengatá. Naʻá ku fakakaukau ki he fiefia naʻá ku maʻu ʻi hoku fāmilí mo e fiefia ʻoku nau maʻu ʻi honau fāmilí. Naʻá ku fakalaulauloto ki he lava ʻe he pēpē ʻi he ʻaiʻangakai ʻo e manú ʻo fakatupu iá. Naʻá ku maʻu ha loto māfana ʻi hoku lotó ʻi heʻeku fakakaukau ki he meʻaʻofa ʻa e Fakamoʻuí—ʻikai maʻaku pē ka ki he kotoa ʻo e faʻahinga ʻo e tangatá.
“Pea pehē ʻe he ʻāngeló kiate kinautolu, ʻOua ʻe manavahē: vakai, he ʻoku ou ʻomi kiate kimoutolu ʻa e ongoongolelei ʻo e fiefia lahi, ʻa ia ʻe hoko ki he kakai fulipē” (Luke 2:10; tānaki atu hono fakamamafaʻí).
ʻI he hoko atu ʻeku teuteuʻi e fuʻu ʻakaú, naʻá ku fakakaukau ki he aloʻi mo e moʻui angavaivai ʻa Sīsū Kalaisí. Naʻá Ne hāʻele mai ke fakaleleiʻi ʻa e meʻa ʻoku maumaú, langaki e tui ʻoku vaivaí, fakafiemālieʻi e tukuhausiá, ʻomi e nongá ki he taʻe-haohaoá, mo foaki e manavaʻofá ki he faingataʻaʻiá. Naʻe ʻaloʻi Ia peá Ne pekia ke tau lava ʻo nofo mo Ia ʻi he puleʻanga ʻo ʻetau Tamaí. Naʻá Ne hāʻele maí kae lava ke ʻilo ʻe he tangatá ʻa e fiefia moʻoní. Naʻe fonu hoku lotó pea naʻá ku maʻu ʻa e fiefia ʻia Kalaisi, koeʻuhí ko Kalaisi ʻa e Kilisimasí.