Keiti mo Kuinisī
ʻOku nofo ʻa e ongo faʻu tohí ʻi ʻIutā, USA.
Ne angamaheni ʻaki e tokoni ʻa Kuinisī kia Keití. Ka ʻi he pooni, naʻe loto ʻa Keiti ke ne tokoniʻi ʻa Kuinisī!
“ʻOku ʻofa maʻu ai pē ʻa e kāinga moʻoní” (Ngaahi Lea Fakatātā 17:17).
Naʻe manako ʻa Keiti he hivá. Naʻá ne manako he hulohulá. Ka naʻá ne saiʻia taha he ngaahi ʻaho Sāpaté. Ko e taimi ia ʻokú ne fetaulaki ai mo hono kaungāmeʻa ko Kuinisií.
Naʻe faingataʻaʻia fakaesino ʻa Keiti. Naʻá ne faʻa puputuʻu he taimi ʻe niʻihi ʻi he lotú ʻo ʻikai ʻilo e meʻa ke faí. Ka naʻá ne ʻilo ne ʻi ai ʻa Kuinisī ke tokoniʻi ia.
Ne faʻa puke ʻe Kuinisī e nima ʻo Keití pea lue mo ia ki he Palaimelí. Naʻe ongoʻi faikehe ʻa Keiti lolotonga e taimi feʻinasiʻakí, peá ne fāʻofua ki ai ʻa Kuinisī. Naʻe tokoni maʻu pē ia ke fakanonga ʻa Keiti. Hili e taimi feʻinasiʻakí, ne tokoni ʻa Kuinisī kia Keiti ke kumi ʻene kalasí. Naʻe ʻofa ʻa Keiti ʻia Kuinisī.
Ne ʻilo ʻe Keiti ʻi ha ʻaho ʻe taha ha meʻa fakamamahi naʻe hoko ki he fāmili ʻo Kuinisií. Ne mālōlō e tuongaʻane lahi ʻo Kuinisī ko Kolí! Naʻe ʻilo ʻe Keiti ʻe lotomamahi hono kaungāmeʻá. Naʻá ne ʻilo ne ʻofa lahi ʻa Kuinisī ʻi hono tuongaʻane lahí.
Naʻe talaange ʻe he fineʻeiki ʻa Keití ʻe ō e kakaí ki he ʻapi siasí ke fakahaaʻi ʻoku ʻofaʻi lahi e fāmili ʻo Kuinií. Pea ʻe fai leva e meʻa fakaʻeiki ʻo Kolí ʻapongipongi.
“Te ke fie ʻalu nai mo au mo Teti ki he ʻapi siasí ʻa pō?” Ko e ʻeke ange ia ʻe Mami kia Keití.
Naʻe kamokamo pē ʻa Keiti. Naʻá ne loto ke talange kia Kuinisī ʻokú ne ʻofa ʻiate ia!
Naʻe tokoni ʻene fineʻeikí ke fakatui ha vala lelei ʻo Keiti. Pea nau fakaʻuli leva ki he lotú.
ʻI heʻenau aʻu ki aí, naʻe vakai atu ʻa Keiti ki ha kakai tokolahi. Naʻá ne ʻilo ha niʻihi ʻo kinautolu mei he lotú. Naʻá ne sio atu ki heʻene pīsopé. Naʻá ne sio atu ki heʻene faiako Palaimelí. Ka naʻe ʻikai ke ne sio ki hono kaungāmeʻá.
“Mami, ko fē ʻa Kuinisī?” Ko e ʻeke ange ia ʻe Keití.
Naʻe ʻikai ʻilo ia ʻe Mami.
“Fēfē ke ta ʻeke ki ha taha?” Ko e tali ange ia ʻene Mamí.
Ne ʻikai ke fuʻu saiʻia ʻa Keiti ke pō talanoa mo ha kakai tokolahi. Ka ʻi he pōní naʻe fie maʻu ke ne kumi ʻa Kuinisī. Naʻe ongoʻi loto toʻa ʻa Keiti. Naʻá ne lue atu ki he pīsopé.
“ʻOku lotomamahi ʻa Kuinisī. ʻOku ou fie maʻu ke u kumi ʻa Kuinisī!” ko ʻene leá ange ia.
Naʻe malimali ʻa e pīsopé mo puke e nima ʻo Keití. “Ta ʻalu ʻo kumi ʻa Kuinisí.”
Naʻe lue takai fakataha ʻa e pīsopé, Mami, mo Keiti ʻi he fale lotú. Naʻe faifai pea nau maʻu ia! Naʻe tangutu ʻa Kuinisī ʻi ha kiʻi tuliki. Naʻá ne fotu loto mamahi lahi ʻaupito.
Naʻe lue atu ʻa Keiti ki hono kaungāmeʻá ʻo fāʻofua kiate ia. Naʻá ne fakakaukau ki he ʻofa ʻa Kuinisī ki hono tuongaʻané.
“ʻOku sai pē ia, Kuinisī. ʻE tokangaʻi lelei ʻe Sīsū ia ʻa Koli,” ko e lea ange ia ʻa Keití. Naʻá ne amoamo fakalelei e ʻulu ʻo Kuinisií, mo fakapapauʻi ʻokú ne fai fakalelei ia.
Naʻe kamata ke tangi ʻa Kuinisī. Naʻe toe mālohi ange hono kuku ia ʻe Keití.
Ne talaange ʻe Keiti, “ʻOku sai pē.” ʻE tokangaʻi lelei ʻe Sīsū ʻa Koli.”
Naʻe hokohoko atu pē ʻene tangí. Naʻe ʻikai tuku ai e fāʻofua ʻa Keiti ki hono kaungāmeʻá. Hili ha taimi siʻi mei ai, naʻe kamata ke nonga hifo ʻa Kuinisī. Naʻá ne kei mihimihi pē, ka naʻe ʻikai ke toe fuʻu tangi. Naʻá ne sio hake kia Keiti.
Naʻá ne pehē ange, “Keiti, Mālō ʻaupito.” “ʻOkú ke moʻoni. ʻE tokangaʻi lelei ʻe Sīsū hoku tuongaʻané.”
Naʻe fiefia ʻa Keiti ʻi heʻene malava ke tokoniʻi hono kaungāmeʻá ke ongoʻi nongá. Naʻá ne ʻofa ʻia Kuinisī!
Ngaahi Kaungāmeʻa ʻoku Faingataʻaʻia Fakaesinó
ʻOku ʻi ai ha ngaahi faingataʻaʻia fakaesino ʻokú ne ʻai e sinó ke faingataʻa ʻene ngāué. ʻOku ʻi ai ha ngaahi faingataʻaʻia fakaesino kehe ʻokú ne ʻai e ʻatamaí ke faingataʻa ʻene ngāué. ʻOku ʻi ai ha kakai ʻoku nau faingataʻaʻia fakaesino ʻokú ne uesia e ʻatamaí mo e sinó fakatouʻosi. Neongo pe ko e hā pē, ʻoku mahuʻinga e fānau kotoa pē mo ʻofaʻi ʻe he ʻOtuá.
Kapau te ke fetaulaki mo ha taha ʻoku faingataʻaʻia fakaesino:
ʻOua ʻe…
-
Siofi, tuhu ki ai, pe fafana fekauʻaki mo kinautolu.
-
Tukunoaʻi kinautolú.
-
Fakaʻalumaʻi kinautolú.
-
Ui ʻaki kinautolu ha ngaahi hingoa fakaolí.
Fai ʻeni …
-
Fakafeʻiloaki kiate kinautolu mo angalelei.
-
Fai ha fehuʻi ʻi ha founga anga ʻofa.
-
Kau mo ia ʻo kapau ʻe angakovi ha taha kiate kinautolu.
-
Manatuʻi ko e fānau kinautolu ʻa e ʻOtuá, ʻo hangē pe ko koé!