Ko ha Kilisimasi Fiefia
Wilson Correia dos Santos
Pernambuco, Brazil
Tā fakatātaaʻi ʻe Enya Todd
ʻI heʻeku manatú, naʻe fokotuʻu ʻe hoku fāmilí ʻa e Kilisimasí ko ha polokalama fakangalongataʻa ʻI he taimi naʻá ku mavahe ai ki he Misiona Brazil Porto Alegre South, ne ʻikai ke u ʻiloʻi ʻe faingataʻa kiate au ʻeku fuofua mavahe ʻo Kilisimasi mamaʻo meiate kinautolú.
ʻI heʻeku ʻuluaki Kilisimasi he malaʻe ʻo e ngāue fakafaifekaú, naʻá ku fakaʻānaua ke u kau mo hoku fāmilí, ka naʻá ma kilisimasi toko ua pē mo hoku hoá. Naʻá ku ongoʻi loto mamahi mo taʻelata.
Ne fakaafeʻi au mo hoku hoa ʻe ha fāmili ke mau maʻu meʻa tokoni fakataha ʻi he Efiafi kimuʻa he Kilisimasí. Ne mau fiefia fakataha, ka naʻe hanga ʻe he fiefia ʻo e fāmili ko ʻení ʻo fakamanatu mai kiate au ne u mamaʻo mei hoku fāmilí. Ne ma foki ʻi he pō ko iá ki ʻapi, mo u feinga ke mohe mo fakangaloki ko e Kilisimasí e ʻaho hono hokó. Ko e fuofua taimi ia ʻi heʻeku moʻuí ke u fiefia ʻi he ʻosi atu ʻa e Kilisimasí.
Hili ha taʻu ʻe taha, naʻá ku fakakaukauloto ki he Kilisimasi ne toki ʻosí mo e meʻa naʻá ku mei malava ke fai ke toe lelei ange ai hoku Kilisimasi ʻi he malaʻe ngāue fakafaifekaú. Ne u fakatokangaʻi ne hoko e ngaahi ongo loto mamahi naʻá ku maʻu ʻi he taʻu kimuʻá mei he tuku taha ʻeku tokangá kiate au pē kae ʻikai ko e Fakamoʻuí. Naʻá ku ʻilo foki ko e Kilisimasí ko ha taimi ia ke manatua ai hono ʻaloʻi e Fakamoʻuí pea ʻoku totonu ke u fiefie ke ngāue Maʻana ʻi heʻeku hoko ko Hono fakafofongá.
ʻI haʻaku talanoa mo hoku hoá, naʻá ma fakakaukau ai ke fakatau ha lole kau ʻo tufa ki he kau mēmipá, kau fie fanongó, fānaú mo ha taha pē naʻa mau fetaulaki ʻi he ʻAho Kilisimasí. Naʻá ma ako foki mo ha ngaahi himi Kilisimasi ke hivaʻi. Ne u ongoʻi fiefia moʻoni ʻi hoku lotó ʻi he ʻAho Kilisimasí ʻi heʻema fetaulaki mo e kakaí, hivaʻi ha ngaahi himi mo tufa e lole kaú.
ʻI heʻema foki ki ʻapi ʻi he efiafi ko iá, naʻá ma fetaulaki ai mo ha tangata naʻe tangutu he laʻisima ʻaluʻangá. Naʻá ma ʻeke ange pe kuó ne maʻu ha meʻaʻofa Kilisimasi ʻi he ʻaho ko iá. Naʻá ne pehē mai ʻio—naʻá ne talanoa mo ʻene fānaú ʻa ia ʻoku nau nofo mamaʻo.
Naʻá ma pehē ange, “ʻOkú ma maʻu ha meʻaʻofa fakaʻosi maʻau.” Naʻá ma ʻoange ki ai ha foʻi lole kau.
Naʻá ne pehē mai, “He ʻikai ngata pē hene fakamelie hoku ngutú, ka te ne fakafiefiaʻi foki mo hoku laumālié.”
Ko e Kilisimasi kovi taha ia kuó u maʻu ʻi heʻeku ngāue fakafaifekaú koeʻuhí naʻá ku tokanga taha pē kiate au pē. Naʻe hoko foki kiate au ʻa e Kilisimasi lelei tahá ʻi he taimi ne u tokanga taha ai ki he Fakamoʻuí. ʻOku ou ʻilo ʻi heʻetau tokanga taha kiate Iá, te Ne ʻomi ha fiefia ki hotau ngaahi laumālié ʻi he Kilisimasí pea mo e ʻaho kotoa pē ʻo e taʻu ko iá.