“Ko e hā ʻOkú Ke Loto Ke Mau Faí?!”

Michael Magleby

Talēkita ʻo e Vaʻa Faʻu Nāunau Fakalēsoní

ʻI he taimi naʻe kole ai ʻe he timi faʻu nāunau ʻa e Siasí ki ha kau mēmipa ke nau ʻahiʻahiʻi ʻa e nāunau foʻou ʻo e Haʻu, ʻo Muimui ʻIate Au ki he 2019, naʻa mau toutou fanongo ki he fehuʻi ko ʻení, fakataha mo ha ngaahi fakamatala peheni: “Ne u tomuʻa pehē ‘ʻOku fakavalevale ʻeni!’ Naʻe ʻikai ke u fakapapauʻi pe ʻe ʻaonga.” Ka naʻe fakaʻau pē ʻo fetongi e ngaahi hohaʻa ko ʻení ʻaki ha fakapapau “kuo liliu moʻoni ʻemau ako e folofolá” pe “ʻOku ʻaonga ia!”

Ko e hā ʻoku mahuʻinga ai kiate koe ʻa ʻenau ngaahi aʻusiá? Koeʻuhí he ko e nāunau foʻoú maʻau mo hoʻo fāmilí ʻi homou ʻapí kae ʻikai maʻá e faiako pē ʻi he lotú.

‘I hono fokotuʻu mai ʻe he Kau Palesitenisī ʻUluakí, ʻoku fakamatalaʻi ʻi he makasini ʻo e māhina ní e ngaahi tefitoʻi moʻoni ʻi he puipuituʻa ʻo e nāunau fakalēsoni foʻou Haʻu, ʻo Muimui ʻIate Aú—ʻa ia ʻoku hoko mai pē ʻi he nāunau fakalēsoni ʻa e toʻu tupú ne toe vakaiʻi ʻo tukuange mai ʻi he 2013, Ko e Faiako ʻi he Founga ʻa e Fakamoʻuí ʻi he 2016, pea mo e nāunau fakalēsoni ʻa e Lakanga Taulaʻeiki Faka-Melekisētekí mo e Fineʻofá ʻa ia ne kamata he 2018

Kamata ʻi he peesi 20, ʻoku ʻomi ai ʻe ʻEletā Sefilī R. Hōlani, ʻa ia naʻá ne fai e fakahinohino ki hono faʻu ʻo e nāunau fakalēsoní, ha ngaahi fakakaukau kapau ʻe fakaʻaongaʻi, te ne lava ʻo liliu kitautolu ʻi ha ngaahi founga kāfakafa mo taʻengata. ʻOku ʻikai ko ha nāunau fakalēsoni pē ia ka ko ha founga ki hono ako fakaʻaho mo moʻui ʻaki ʻo e ongoongoleleí.

ʻI heʻeku vakai ki hono tataki ʻe he kau palōfita, kau tangata kikite, mo e kau tangata maʻu fakahaá hono faʻu e nāunau fakalēsoni foʻou ʻoku fakatefito ʻi ʻapi mo poupouʻi ʻe he Siasí, kuó u ofo he founga ʻoku fenāpasi ai mo e ngaʻunu ʻa e Siasí ki ha founga faingofua ange hono moʻui ʻaki e ongoongoleleí, ʻo fakaafeʻi kitautolu ke tau fatongia lahi ange ʻaki ʻetau tupulaki fakalaumālie fakatāutahá. ʻI heʻetau fai iá, ʻoku ou tui te tau maʻu ha maama mo ha moʻoni lahi ange pea ʻe tupulaki hotau ivi malava ke muimui ʻia Sīsū Kalaisí mo siʻaki e tokotaha koví (vakai, T&F 93:29–40), pea ʻomi ai ha melino ki heʻetau moʻuí mo ha lelei ki he māmaní.