Ko e Tohi ʻa Molomoná: Ko ha Meʻaʻofa Makehe

Claudette Bybee Burt

Washington, USA

ʻI he Efiafi kimuʻa he Kilisimasi ʻo e 2016, lolotonga ʻema ngāue ko ha ongo faifekau fakatemipale ʻi he Temipale Manila Filipainí mo hoku husepānití, naʻá ku loto ai ke foaki ha tatau ʻo e Tohi ʻa Molomoná ki ha taha. ʻI loto ʻi he takafi muʻa ʻo e tohí, ne u hiki ai ʻeku fakamoʻoní mo ha pousikaati ʻo e Temipale Manilá mo ha ngaahi fakamatala ʻo e feituʻu ke toe ako lahi ange ai fekauʻaki mo e Siasí. Peá u tūʻulutui ʻo kole ki he ʻEikí ke tataki au ki ha taha kuó Ne ʻosi teuteu.

Naʻá ku mavahe mei homa ʻapi nofoʻangá ʻo kolosi atu he halá. Naʻe ʻi ai ha taha leʻo ʻi he akoʻanga fakafaifekau ofi maí naʻe pō talanoa mo ha ongo tangata. Naʻá ne ui mai, “Ke ke maʻu ha Kilisimasi Fiefia!” Naʻá ku ongoʻi ke u lue atu kiate kinautolu.

Hili ʻeku fakafēʻiloaki ange aú, naʻá ku ʻilo ai ko e tangata ʻe taha ko ha tokotaha tauhi ʻapi ia ki he senitā akoʻanga fakafaifekaú pea ko e tangata ʻe tahá ko ha tangata faama. Naʻá ku ʻilo ai ko ha ongo mēmipa pē kinaua ʻo e Siasí.

Naʻá ku ʻeke ange pe ʻokú na ʻilo ha taha ʻe ngali fie maʻu ha meʻaʻofa Kilisimasi ʻa ia ko ha tatau ʻo e Tohi ʻa Molomoná. Naʻe ʻohovale e tangata fāmá. Naʻá ne talamai ʻoku haʻu hano kaungāmeʻa ʻi ha ngaahi miniti siʻi ke ʻaʻahi holo ʻi he tuʻa temipalé. Naʻá ne loto ke foaki ki hono kaungāmeʻá ha Tohi Molomona ka naʻe ʻikai ke ne maʻu ha tohi. Naʻá ku ongoʻi loto fiefia, peá u toʻo hake ʻa e Tohi Molomoná mei heʻeku kató. Naʻá ku fakamatala ange kiate kinautolu ʻeku lotú peá u ʻoange kiate ia ʻa e tohí.

Naʻe ongo kiate kimautolu kotoa ʻa e Laumālié, pea fakahaaʻi ʻe he tangata fāmá ʻa ʻene ʻamanaki lelei ʻe lau ʻe hono kaungāmeʻá ʻa e Tohi Molomoná peá ne tali ʻa e ongoongoleleí. ʻI heʻeku lue foki ki hoku ʻapi nofoʻangá, naʻá ku fakafetaʻi ki he ʻEikí peá u lotua ʻe tauhi ʻe he kaungāmeʻa ʻo e tangata fāmá ʻene tukupā ke ʻaʻahi mai ki he temipalé.

Hili ha miniti ʻe 15, naʻá ku maʻu ha telefoni mei he tokotaha leʻo he MTC. Ne ʻosi tūʻuta mai e kaungāmeʻa ʻo e tangata fāmá. Naʻá ku lue fakavavevave atu ke fēʻiloaki mo ia. Ko ha kapiteni ia ʻo ha vaka fefakatauʻaki pea ʻe foki ia ki tahi hili pē ha ʻaho ʻe ua. Naʻá ne fakamālō mai hono ʻoange e Tohi Molomoná peá ne talamai te ne ʻalu mo ia ki he vaká. Kimuʻa pea mau mātukú, naʻá ku sio fakahangatonu ki hono fofongá peá u pehē ange, “ʻOku moʻoni ʻa e tohí ni.” ʻI heʻeku fai iá, naʻe fakapapauʻi mai ʻe he Laumālie ʻa e moʻoni ko ʻení kiate au.

Naʻá ku foaki ʻi he Kilisimasi ko iá ha meʻaʻofa makehe: ko ha Tohi Molomona mo ʻeku fakamoʻoniʻi pea mo ʻeku fakamoʻoni ki hono moʻoní. Naʻá ku maʻu foki mo ha meʻaʻofa makehe: naʻe tali ʻe he ʻEikí ʻeku lotú pea tāpuakiʻi au ʻaki ha faingamālie ke vahevahe e ongoongoleleí.