Ko e Ngāue ʻi he Siasí
Tupulaki ʻi he Ngāue Tokoní
ʻOku nofo ʻa e ongo faʻu tohí ʻi ʻIutā, USA.
Naʻá ma ongoʻi ke fakavaveʻi hono foaki ki he kau mēmipa foʻou homau koló ha ngaahi uiuiʻi koeʻuhi ke nau tupulaki ʻi heʻenau fua fatongiá.
Ko e Kolo Kaohsiung Fitú ʻi he Temipale Taipei Taiwan ʻi Tīsema 2001.
ʻI he taʻu 2000 naʻe ui kimaua ke ma ngāue ko e palesiteni fakakolo mo e palesiteni Palaimeli ʻi he ʻiuniti siʻisiʻi taha ʻi he Siteiki Kaohsiung ʻi Taiuani. Ko ha kakai nai ʻe toko 20 ʻi he houalotu sākalamēnití, kau ai homa fāmili foʻoú, kaumātuʻa mālohi ʻe toko fā, pea mo e ongo faifekaú. Ne mau tuku atu kimui ange ha ongo talavou ki he ngāue fakafaifekaú, mo falala pe ki he ʻEikí te Ne fakatokolahi homau koló.
ʻI heʻema ngāue ʻi homau koló, naʻá ma manatuʻi e faleʻi ʻa Kōtoni B. Hingikelī (1910–2008) ʻoku fie maʻu ʻe he papi ului kotoa pē “ha kaungāmeʻa, ha fatongia, mo tanumaki ʻaki ‘ʻa e folofola lelei ʻa e ʻOtuá.’”1 Naʻá ma ongoʻi ke fakavaveʻi hono foaki ki he kau mēmipa foʻoú ha ngaahi uiuiʻi koeʻuhí ke nau tupulaki ʻi heʻenau fua fatongiá. Naʻe fakafeʻiloaki kimaua ʻe he ongo faifekaú ki he fie fanongo taki taha, pea hili ha uike ʻe ua mei heʻenau papí, ne nau maʻu ha uiuiʻi. Ne nau fakatupulaki ʻa e ʻulungaanga fakakaungāmeʻá ʻi heʻenau ngāue mo e kau mēmipa kehé.
Hili ha māhina ʻe taha, ne maʻu ʻe he tangata papi ului foʻou kotoa pē ʻa e Lakanga Taulaʻeiki Faka-ʻĒloné, mo nau tāpuakiʻi mo tufaki e sakalamenití. Ne mau teuteuʻi foki kinautolu ke maʻu e Lakanga Taulaʻeiki Faka-Melekisētekí ʻi he konifelenisi fakasiteiki hokó.
Ne akoʻi e kaumātuʻa foʻoú ke nau fai e ngaahi ouaú, pea akoʻi leva ʻe he kaumātuʻa ko ʻení e kaumātuʻa foʻou angé. Ne mau tui ki he maʻu e ʻiló ʻi he ngāué pea ʻi hono pukepuke e ʻilo ko iá ʻaki hono akoʻí. Naʻe fatongia ʻaki ʻe he kau mēmipa ʻo e koló hono fakatātāʻi mo akoʻi, faiakoʻi mo fakahinohinoʻi, poupouʻi mo tokoniʻi e niʻihi kehé.
Ne mau ngāue ʻaki e faiako ʻaʻahí mo e fakaʻapí, efiafi fakafāmilí, ʻekitivitī fakauōtí mo e ngaahi maʻu meʻatokoní ke fakafeohi ki he kau mēmipa foʻoú. Naʻe fafanga kinautolu ʻaki e folofola ʻa e ʻOtuá ʻi he Sāpaté mo e ngaahi fakahinohino fakalotu ʻi he lolotonga ʻo e uiké. Naʻe tupu e inisititiutí mei he kau ako ʻe toko 2, ki he toko 25. Ke toe lahi ange hono fafanga fakalaumālie homau kiʻi koló, naʻa mau ʻalu ki he Temipale Taipei Taiuaní mo ngāue ai ʻi he māhina kotoa pē—ko ha houa ia ʻe 10 ʻa e ʻalu pasi mo e foki mei aí. Ko e angamahení, ne ʻikai faʻa lava ʻe he siteikí ʻo fakafonu ha pasi ke ua. ʻI he tupulaki homau koló mo teuteu e ngaahi fāmilí ke maʻu honau ngaahi tāpuaki ʻi he temipalé, ne mau fokotuʻu ha taumuʻa ke mau fakafonu pē ʻemau pasí. Ne tuʻo ua ʻi he taʻu ko iá, hono fakafonu ʻe he siteikí e pasi ʻe taha, kae fakafonu homau kiʻi koló e pasi hono uá. ʻIkai fuoloa mei ai, ne kole ʻe he siteikí ki he uooti taki taha ke nau fakafonu ha pasi temipale, ʻo tuʻo taha pē ʻi he taʻu.
ʻI he taʻu hono uá, ne hiki hake ʻemau pukepuke ʻo e kau papi uluí mei he peseti ʻe 30 ki he peseti ʻe 90, pea tupu mo ʻemau maʻu houalotu sakalamenití ʻo toko 100 nai, kau ai mo ha kaumātuʻa mālohi ʻe toko 25. Ne hoko homau koló ʻo uooti, pea toe fakaleleiʻi homau fale motuʻá ki ha fale lotu foʻou.
Naʻe hoko homau kiʻi koló ko e uooti mālohi taha ʻi he siteikí koeʻuhi naʻe tāpuekina e papi ului kotoa pē ʻaki ha ngaahi kaungāmeʻa, fatongia, mo tanumaki ʻaki ʻa e folofola ʻa e ʻOtuá.