Ne Fakatou Tāpuekina Kimaua

Anna Fingerle

Hesse, Germany

Tā fakatātaaʻi ʻe Carolyn Vibbert

Ne u kui fakafaʻahitaha hili hano tuiʻi au ʻe ha loli ʻo tō mei heʻeku pasikalá. Hili siʻi pē ha taʻu ʻe fā mei ai, lolotonga e faʻahitaʻu Kilisimasi ʻo e 2011, naʻá ku ongoʻi ke u kole ki ha tangata ne u ʻilo ʻi ha uooti kimuʻa ha tāpuaki lakanga fakataulaʻeiki. Ne siʻi ʻeku faʻa sio ki he tangatá ni, ko ia naʻe ʻikai mahino kiate au e ʻuhinga ke u kole ai kiate iá. Naʻá ku ʻilo ne ʻi ai mo ha kau maʻu lakanga fakataulaʻeiki kehe ne nau moʻui taau te u lava ʻo kole ki ai.

Hili ha ngaahi uike mei ai, ne toe mālohi ange ʻeku ongoʻi ʻoku ou fie maʻu ha tāpuakí. Naʻá ku ngāue temipale ʻi he Temipale Felengifuti Siamané, ko ia naʻá ku fakakaukau ai ke u kole ha tāpuaki mei ha taha ʻo e kau tangata aí.

Hili ʻeku fai e fili ko iá, ne hū mai e tangata naʻá ku ongoʻi ʻoku totonu ke ne fai hoku tāpuakí ki he temipalé. Ne u ʻiloʻi vave ai ʻoku ʻikai ko ha meʻa tupukoso ia—ne finangalo e Tamai Hēvaní ke u kole ki he tangata pē ko ʻení. Naʻá ku feinga ke u loto lahi peá u kole ange ke ma talanoa hili ʻene sēsiní. Naʻá ne loto ki ai.

Hili iá, naʻá ku fakamatalaʻi ange naʻe ʻikai ke u ʻilo hono ʻuhingá, ka naʻá ku ʻilo ne u fie maʻu ha tāpuaki meiate ia. Naʻá ne fakahaaʻi mai ʻene fiefia ke tokoní. Naʻá ne fakaafeʻi ha tangata ʻe taha ki he lokí peá ne kamata ke tuku hoku tāpuakí. ʻI heʻene ʻosí, naʻá ku puputuʻu. Naʻe fakaʻofoʻofa e tāpuakí, ka naʻe ʻikai ha meʻa ia ʻe makehe ai.

Ne u ʻāʻā hake.

ʻI heʻeku ʻāʻā haké, hangē ne u mei sio fakalūkufua pē au ki he lokí. Ne ʻikai ke u tui ki he meʻa ne hokó! Naʻá ku ʻeke ange ki he tangatá pe ʻokú ne ʻilo e ʻuhinga naʻe fie maʻu ai pē ia ke ne foaki mai hoku tāpuakí. Naʻá ku maʻu ha loto-fakatōkilalo ʻi he tali naʻá ne ʻomí.

Naʻá ne pehē mai, “ʻOku ʻikai ke u tui ko e tāpuakí ni maʻau pē.” “Naʻe ʻomi foki ia maʻá ku. Te u fai ha tāpuaki maʻa hoku ʻilamutú ʻapongipongi koeʻuhí he ʻoku papitaiso. ʻOku ʻikai mālohi homau fāmilí ʻi he Siasí, pea ko e fuofua mēmipa ia ʻi homau fāmilí ke papitaiso hili nai ha taʻu ʻe 20. Ko e tokolahi homau fāmilí te nau ʻi he papí, pea naʻe ʻikai ke u fakapapauʻi pe ʻoku feʻunga ʻeku tuí ke u fai e tāpuakí. Kuó u ʻilo ʻeni te u lava pē ʻo fai ia.”

ʻI he ngaahi ʻaho hokó, naʻe toe lelei ange ʻeku sió ʻo ʻikai ke u toe fie maʻu ʻeku tokotoko hinehiná. Ne u kofukofuʻi ia ʻo foaki ange ko ha meʻaʻofa Kilisimasi ki he tangata ko ʻení fakataha mo ha kiʻi tohi. Naʻá ku tohi ʻo pehē, “ʻOku ou ʻilo ʻoku ʻikai ko e tokotoko ʻeni ia ʻo Mōsesé, ka ʻoku ou ʻamanaki pē te ne fakamanatu atu kiate koe ʻa e mālohi ʻo e lakanga fakataulaʻeiki ʻokú ke maʻú.”

ʻOku ʻofa ʻa e Tamai Hēvaní ʻiate kitautolu pea ʻokú Ne hoifua ke tāpuakiʻi kitautolu. Naʻe ʻikai ngata pē hono fakafoki mai ʻe he tāpuaki ko ʻeni ʻi he Kilisimasí ʻeku sió ka naʻe maʻu foki ʻe ha taha maʻu lakanga fakataulaʻeiki loto fakatōkilalo e loto falala ʻi hono fatongia he lakanga fakataulaʻeikí.