Kae ʻOua Ke Tau Toe Fakataha Mai
ʻIloʻi a Kalaisi ʻo fakafou ʻia Siosefa Sāmita
Mei he “Siosefa Sāmita—Ko e Pālofita Māʻongoʻonga ʻi hono Toe Fakafoki Maí,” Ensign, Mē 1976, 94–96. Naʻe fakaleleiʻi e mataʻitohi lahí.
Kuo ʻi ai ha taha ʻa ia kuo ʻomi ai e ʻilo fekauʻaki mo Kalaisi pea mo e fakamoʻuí ʻi hotau ʻahó.
ʻOku tau akonaki mo fakamoʻoni ʻoku ʻia Kalaisi ʻa e fakamoʻuí. Ko Ia hotau ʻEikí, mo hotau ʻOtuá, mo hotau Tuʻí. ʻOku tau moihū ki he Tamaí ʻi Hono huafá, ʻo hangē ko e kau palōfita māʻoniʻoní, mo e Kau Māʻoniʻoni ʻi he kuonga kotoa pē.
ʻOku tau fiefia ʻiate Ia mo ʻEne feilaulau huhuʻí. ʻOku māʻolunga ange hono huafá ʻi ha toe hingoa, pea ʻe tūʻulutui Kiate Ia ʻa e tui kotoa pē pea fakamoʻoni ʻa e ʻelelo kotoa pē ko Ia ʻa e ʻEiki ʻo e meʻa kotoa pē, pea kapau naʻe taʻe-ʻoua Ia, he ʻikai ha moʻui taʻe faʻamate pē moʻui taʻengata.
Ka te u lea he taimí ni ki ha taha kehe, ʻa e tokotaha naʻe ʻomi ki ai ʻa e ʻilo fekauʻaki mo Kalaisi mo e fakamoʻuí ʻi hotau kuongá. …
Te u lea fekauʻaki mo Siosefa Sāmita ko e siʻi., ʻa e palōfita maʻongoʻonga ʻi hono Toe Fakafoki Mai e Ongoongoleleí , ʻa e tokotaha naʻá ne fuofua fanongo ki he leʻo fakalangi ʻi he kuonga fakakōsipelí ni, ʻa e tokotaha ko e meʻangāue naʻe toe fokotuʻu ai ʻa e puleʻanga ʻo e ʻOtuá ʻi he faʻahinga ʻo e tangatá. …
ʻI he faʻahitaʻu failau ʻo e 1820, naʻe hanga ʻe he [ʻOtua ko e Tamaí mo Hono ʻAlo ko Sīsū Kalaisí] ʻo fakamavaeuaʻi ʻa e veili fakapoʻuli naʻá ne kāpui ʻa e māmaní ʻi ha ngaahi taʻu lahi. … Naʻá na hāʻele hifo mei Hona ʻafioʻanga fakasilesitialé ki ha vao ʻakau ne ofi ki Palemaila, Niu ʻIoke. ʻI heʻena ui ʻa e talavou ko Siosefá ʻaki hono hingoá, naʻá Na folofola kiate ia … te ne hoko ko ha meʻangāué ʻi Hona toʻukupú ke toe fakafoki mai e kakato ʻo ʻEna ongoongolelei taʻengatá. …
ʻE lava ke fehuʻi hifo ʻe he tangata kotoa pē kiate kinautolu pe ʻoku nau tui kia Siosefa Sāmita mo hono misiona fakalangí. ʻOku nau kole ki Hono huafá mo fekumi ki he fakamoʻui ʻoku maʻu he ongoongolelei pē ʻo Kalaisí, hangē ko hono fakahā ki Heʻene palōfita he ngaahi ʻaho kimui ní … ? Ko e fehuʻi mahuʻinga taha ʻoku fie maʻu ke tali ʻe he tokotaha kotoa pē ʻi hotau kuongá—pea ʻi he tuʻunga faingataʻa honau fakamoʻuí—ko e: Naʻe ui nai ʻe he ʻOtuá ʻa Siosefa Sāmita? …
… Tuku ke ʻoua naʻa ʻi ai ha taʻefemahinoʻaki. Ko e kau fakamoʻoni kitautolu ʻo Kalaisi. Ko Ia hotau Fakamoʻuí. … Ka ko ha kau fakamoʻoni foki kitautolu ʻo Siosefa Sāmita, ʻa ia kuo tau ʻilo ai ʻa Kalaisí, pea ko e tangata ia ne fakamafaiʻi pea tuku ki ai e mālohi, ko e meʻa te ne haʻi ʻi māmaní ʻe silaʻi ia ʻi langi, pea ʻe hoko e faʻahinga kotoa ʻo e tangatá talu mei hono kuongá ko ha kau ʻea-hoko ʻo e fakamoʻuí.