Langa ha Ngaahi Hala Fakakavakava
ʻI he ngaahi laui senituli kuohilí, naʻe fehuʻi ʻe ha loea mataotao ki he Fakamoʻuí:
“ʻEiki, ko e fekau fē ʻi he fonó ʻoku lahí?
“Pea tala ʻe Sīsū kiate ia, Ke ke ʻofa ki he ʻEikí ko ho ʻOtua ʻaki ho laumālie kotoa, mo hoʻo moʻui kotoa, mo ho loto kotoa.
“Ko e ʻuluaki pea ko e lahi ia ʻo e fekaú.
“Pea ko hono ua ʻoku tatau mo iá, Ke ke ʻofa ki ho kaungāʻapí ʻo hangē pe ko koé.
“Ko e fekaú ni ʻe ua ʻoku tautau ai ʻa e fonó kotoa mo e kau palōfitá.”1
Pea ne toe fakahā ʻa e fakahinohino ko ʻení ʻi he 1831 ki he Palōfita ko Siosefa Sāmitá, ʻi he folofola ʻa e ʻEikí ʻo pehē: “Pea tuku ke ʻofa ʻa e tangata kotoa pē ki hono tokouá ʻo hangē pē ko iá, pea ngāue ʻi he angamaʻa mo e māʻoniʻoni ʻi hoku ʻaó.”
Pea naʻá Ne toe tānaki ʻo fakamamafaʻi mai, “Pea ko e tahá ʻoku ou pehē kiate kimoutolu, tuku ke ʻofa ʻa e tangata kotoa pē ki hono tokouá ʻo hangē pē ko iá.”2
Naʻe fakamamafaʻi ʻe he ʻEikí ʻi he vaeuaʻangamālie ʻo taimí pea ʻi he ngaahi ʻaho kimui ní foki ʻa ʻEne tokāteline mahuʻinga ʻo e faingamālie potupotu tataú maʻa ʻEne fānaú. Pea kuo fakamanatu mai ʻe Palesiteni ʻOakesi ʻi heʻene akonaki mei he Tohi ʻa Molomoná: “ʻOku ʻikai fakafisingaʻi ʻe he ʻEikí ha taha ʻe haʻu kiate ia, hinehina pe ʻuliʻuli, pōpula pe tauʻatāina, tangata pe fefine; … ʻoku tatau ʻa e taha kotoa ki he ʻOtuá.”3
ʻOku fakatahataha mai e kakai faivelenga ʻo e konitinēniti kotoa pē mo e ngaahi motu kotoa pē ʻo e tahí ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku ʻikai mahuʻinga ʻa e ngaahi faikehekehe ʻi he anga fakafonuá, leá, tangata pe fefine, matakalí, mo e fōtunga ʻo e matá ki he fononga ʻa e kau faivelengá ʻi he hala ʻo e fuakavá mo haʻu ki hotau Fakamoʻui ʻofeiná.
Te tau toki ʻilo ai, ko e mahino pē ki he tuʻunga Fakaetamai totonu ʻo e ʻOtuá te ne toki lava ke ʻomi ʻa e houngaʻia kakato ʻo e feohi fakatokoua moʻoni ʻa e kakai tangatá mo fafiné. ʻOku ueʻi kitautolu ʻe he mahino ko iá mo holi mālohi ketau langa ha ngaahi halafakakavakava ʻo e ngāue fakatahá kae ʻikai ko ha ngaahi ʻā vahevahe.
Ko ʻeku lotú mo e tāpuaki ʻoku ou tuku ki he tokotaha kotoa pē ʻoku fanongo maí ke tau ikunaʻi e ngaahi faingataʻaʻia ʻo e filifilimanakó mo ʻaʻeva mo e ʻOtuá ʻi he angatonu—pea mo e niʻihi kehé—ʻi he melino mo e uouangataha haohaoa.