Fakaʻilekitulōnika Pē
ʻUhinga ʻoku ʻIkai ke u Toe Fehuʻi ai “ʻUhingá?” hili e Pekia Hoku Tuongaʻané
ʻOku nofo ʻa e taha naʻá ne faʻú ʻi Salata, ʻĀsenitina.
Neongo ʻoku ʻikai ke ne ʻi heni tonu mo au, ka ʻoku ou kei ongoʻi pē ʻoku ʻi heni.
ʻI he taimi naʻá ku maʻu ai ʻa e ongoongo naʻe pekia hoku tuongaʻane ko Sēkioó, naʻá ku ʻi hoku lokí ʻo fai ʻeku ako pea naʻe lau ʻe he Fineʻeikí ʻene ngaahi ʻīmeili naʻe toki ʻomi ʻaneafí. Naʻá ne talamai naʻá ne fiefia ʻaupito ke ngāue fakafaifekau ʻi Sikilaiō, Pelū pea hoko ko e fakafofonga ʻo Sīsū Kalaisí. Naʻe fai mai ʻene pōpoaki ʻofa mo e loto vēkeveke lahi pea naʻe ʻikai lava ʻo mapukepuke ʻemau malimalí.
ʻI he ngaahi mōmeniti kimuʻa pea maʻu e fetuʻutaki telefoni ʻene palesiteni fakamisioná ʻo fakahā mai ai e ongoongo fakamamahí, naʻá ku fanongo mo ʻeku fineʻeikí ki ha foʻi hiva naʻe manako ai hoku tuongaʻané. Naʻe fakafokifā pē ʻa e kāpui ʻe ha ongo nonga ʻa e lokí kotoa. Naʻe mālohi fau e Laumālié. Ne ma fetāngihi koeʻuhí naʻe moʻoni ʻaupito e ongo māfana mo e ongo naʻá ne lōmekina kimauá pea naʻe ʻikai ha lea ke mafakamatalaʻi. Pea hili pē ha miniti ʻe 10 mei ai mo e tatangi mai ʻa e telefoní.
Naʻá ku fanongo mo e fineʻeikí ki he tali kotoa ʻe he tangataʻeikí e ngaahi fehuʻi ne fai ange kiate iá. Ne mau ʻiloʻi ko ʻene fetuʻutaki mai pē ʻa e palesiteni fakamisioná, naʻe hoko fakamātoato ha meʻa. Naʻá ma fanongo atu leva ki he pehē ʻa e Tangataʻeikí, “ʻOku fehalaaki ia. He ʻikai lava ke hoko ʻeni.”
Naʻá ku fehuʻi ange e meʻa naʻe hokó. Pea ko e taimi ia ne loʻimataʻia ai e Tangataʻeikí ʻi heʻene tali leʻo vaivai mai: “Kuo pekia ʻa Sekiō Siʻi.”
Naʻá ku tangi mamahi mo toutou fehuʻi loto ʻiate au, “Tamai Hēvani, ko e hā hono ʻuhingá? Ko e hā ʻoku mau foua ai ʻení? ʻIkai ʻoku totonu ke hoko e misioná ko e feituʻu malu taha ʻi māmaní?!”
Neongo ʻemau maʻu e ongoongoleleí mo ʻiloʻi e palani ʻo e fiefiá, ka ʻoku hangē pē ne ʻikai ha fakanonga ki heʻemau loto mamahí. Naʻá ku ʻiloʻi ko ʻetau Tamai Hēvaní pē te ne lava ʻo tokoniʻi kimautolu ʻi he tūkunga ne mau ʻi aí.
ʻI ha mōmeniti ʻo e mahinó he pō ko iá, naʻá ku fekumi ki heʻeku folofolá he naʻá ku manatuʻi ha potufolofola mei he tohi ʻa ʻAlamaá naʻe vahevahe mai ʻe hoku tuongaʻané ʻi ha ngaahi uike kimuʻa pea pekiá. ʻOku pehē, “Taumaiā ko e ʻāngelo au, peá u lava ʻo maʻu ʻa e fakaʻamu ʻa hoku lotó, ke u ʻalu atu ʻo lea. … Te u fakahā ki he kakai fulipē, ʻo hangē ko e ʻuʻulu ʻo ha maná, ʻa e fakatomalá mo e palani ʻo e huhuʻí. … Kae vakai, ko ha tangata pē au, peá u fai angahala ʻi heʻeku fakaʻamú; … ʻoku ʻikai lelei ke u feinga ke liliu ʻi heʻeku ngaahi fakaʻamú ʻa e tuʻutuʻuni pau ʻa ha ʻOtua angatonu, he ʻoku ou ʻiloʻi ʻokú ne foaki ki he tangatá ʻo fakatatau mo ʻenau holí, pe ko e holi ki he mate pe ki he moʻuí” ( ʻAlamā 29:1–4).
Naʻe toki mahino kiate au naʻe loto hoku tuongaʻané ke mau ʻiloʻi naʻá ne kei moʻui pē pea ʻoku ʻi heni hono laumālié, ka kuó ne hiki atu mei he moʻuí ni he kuo uiuiʻi ia ke malanga ʻi he maama tataliʻanga ʻo e ngaahi laumālié. Naʻá ne fie maʻu ke mau ʻiloʻi ʻe hangē ʻene puliá ha fakalōloa ʻo ʻene uiuiʻi ngāue fakafaifekaú—ko ha fehikitaki pē, koeʻuhí naʻá ne manako he hoko ko ha faifekaú, pea kuo fakahoko e holi taupotu taha ʻa hono lotó: ke hoko ko ha “ʻāngelo” ʻa e ʻEikí. Kuó ne lava ʻo līʻoa kakato ki he ngāue ʻa e ʻEikí, ke fakahā ki he ngaahi laumālie kotoa pē ʻa e “fakatomalá mo e palani ʻo e huhuʻí,” ʻa e palani ʻo e fiefiá.
Neongo ʻoku ʻikai ke ne ʻi heni tonu mo au, ka ʻoku ou kei ongoʻi pē ʻoku ʻi heni. Naʻe ʻikai ke u toe fehuʻi, “Tamai Hēvani ko e hā hono ʻuhingá?” he ʻoku mahino ʻa e talí: “naʻe ʻalu hifo ʻa e Foha ʻo e Tangatá ʻo māʻulalo ange ʻiate kinautolu kotoa pē. ʻOkú ke lahi ange koe ʻiate ia?” (Tokāteline mo e Ngaahi Fuakava 122:8).
Kuo mau ʻohake homau lotó ki he ʻOtuá ko ha fāmili, pea fakamālō ki he ongoongoleleí, kuo mau maʻu ʻa e fakafiemālie. ʻOku mau ʻiloʻi ko e moʻui ʻahiʻahiʻanga ʻeni pea ʻoku taʻengata hotau ngaahi laumālié.
ʻOku mau ʻiloʻi fakafou ʻi he ʻamanaki lelei ʻo e ʻofa taʻefakangatangata ʻa hotau Fakamoʻui ko Sīsū Kalaisí pea mo e Tamai Hēvaní, ʻoku malava e meʻa kotoa pē. Ko ia, neongo ʻoku kei taʻekakato ʻemau mahinó pea ʻoku teʻeki ke tau lava ʻi he moʻuí ni ʻo mamata kiate kinautolu kotoa ʻoku tau ʻofa aí, kae fakamālō ki Heʻene moʻuí, ʻoku mau ʻiloʻi ko e nofó ni ʻoku fakataimi pē.
Kuo toki taʻu pē ʻeni ʻe fā ʻa e mamaʻo atu ʻa Sekioó. ʻOku ou fakahā ʻoku kei ʻi ai pē lotomamahí pea tō e loʻimatá ʻi ha ngaahi taimi, he ʻoku ou ʻofa ki hoku tuongaʻane ʻofeiná. Ka ʻoku fonu mahuohua hoku lotó ʻi he houngaia ʻi heʻeku manatuʻi ko e nofó ni ʻoku fakataimi pē. Ko ʻeku fakaʻamú, ke ʻi ai ha ʻaho te mau toe fetaulaki ai pea toe fakataha homau fāmili fiefia taʻengatá ʻo lauʻi kuonga. ʻOku mahulu ange ʻeni ʻi ha mamahi kuó u fuesia he taimí ni.