Ko e Fē ʻEku Ongo Faiako Fakaʻapí mo e Faiako ʻAʻahí?
Fai ʻe Jean B. Bingham
Palesiteni Lahi ʻo e Fineʻofá
ʻOku totonu ke hanga ʻe he faingofua ʻo e ngāue fakaetauhí ʻo poupouʻi kitautolu ke fakahaaʻi ha tokanga lahi ange, kae ʻoua te ne ʻai ke tau fakafiefiemālie.
Ne fehuʻi mai ʻe ha taha ʻo hoku ngaahi kaungāmeʻá kimuí ni, ʻi heʻene puputuʻú ʻo pehē mai, “Ko e fē ʻeku ongo faiako ʻaʻahí?” Mei he taimi naʻe mālōlō ai hono husepānití, naʻá na ʻofa mo tokanga, kae talu e fanongonongo e polokalama ngāue fakaetauhi foʻoú ʻi he konifelenisi lahi ʻo ʻEpeleli 2018, mo e ʻikai pē ke u toe sio ki ha taha ʻiate kinaua.
ʻOku tau liliu kotoa ki ha founga foʻou hono fakahoko ʻo e ngaahi meʻá, pea mahalo ʻoku ʻi ai ha kau tangata mo ha kau fafine ngāue fakaetauhi kuo ʻikai mahino kiate kinautolu neongo ko e ʻaʻahi ki he ʻapí ʻoku ʻikai ko e founga pē ia ke ngāue fakaetauhí, ka ko ha founga lelei ia ke fakahaaʻi ʻa e ʻofá mo e tokanga moʻoní—pea ʻoku kei fie maʻu pē ia ʻe ha kāingalotu tokolahi.
Ko hono fakamuʻomuʻa e ʻUhingá ʻi he Foungá
Mahalo ko e palopalemá, ki ha niʻihi, ko e ʻikai mahino e taumuʻa ʻo e liliú. ʻOku ʻikai ko e taumuʻa hono liliu ʻo e faiako fakaʻapí mo e faiako ʻaʻahí ki he ngāue fakaetauhí ko hano liliu pē ʻa e founga ʻetau fetauhiʻakí, ka ke tokoni ke tākiekina lahi ange kitautolu ʻe he ʻuhingá.
Ko e taumuʻa fisifisimuʻa ʻo ʻetau ngāue fakaetauhí ko hono tokoniʻi e niʻihi kehé ke toe loloto ange ʻenau ului ki he Fakamoʻui ko Sīsū Kalaisí pea tupulaki ki he tuʻunga fakalangi te nau lava ke aʻusiá. ʻOku ʻikai ʻuhinga e tānaki mai ke faingofua e polokalamá ke poupouʻi ʻa e ngāue fakafiefiemālié; ka ʻoku ʻuhinga ia ke maʻu ai ha faingamālie lahi ange ke tākiekina ʻe he Laumālié ʻetau ngaahi ngāué.
Ko ia ai, pe ʻoku fie maʻu ke fai ha ʻaʻahi ki ha taha pe ʻikai ʻoku totonu ke fakatefito e konga lahi ʻo e ʻaʻahí ʻi he meʻa te ne tokoniʻi kinautolu ke nau laka atu ʻi he hala kuo tofa ʻe he Tamai Hēvaní maʻanautolú.
Ko e Ako Fakatahá
ʻOku alanima atu hotau kāingá ʻo fetokoniʻaki, neongo e ngaahi meʻa ne ʻikai ke tau fakapapauʻi kimuʻa fekauʻaki mo e ngaahi meʻa ʻoku fie maʻu meiate kitautolu ʻi heʻetau ngāue fakaetauhí. Ko e fē pē ha feituʻu kuó u ʻaʻahi ki ai, kuó u fiefia moʻoni he fanongo ki he ngaahi aʻusia lahi mei he kau fefine (mo e kau tangata tokolahi) kuo nau vahevahe ʻenau ngaahi talanoa fekauʻaki mo e ngaahi lelei kuo liliu ʻe heʻenau ngāue fakaetauhí—pe ko e ngāue fakaetauhi mai ha taha kiate kinautolú—ʻi honau vā fetuʻutakí mo e tupulaki fakatāutahá.
Ne u toki foki mai mei Kalolaina Tokelau, USA, ʻa ia ne vahevahe mai ai ʻe ha palesiteni Fineʻofa ʻo ha uooti ha ngaahi fakakaukau naʻá ne maʻu mei he kau taki ʻo e siteikí. ʻI hono fakamahinoʻi ange ha ngaahi meʻa ʻe niʻihi, naʻá ku fakakaukau ne tonu ia pea ʻaonga hono vahevahé.
Hokohoko Atu Ai Pē
ʻOku tau ako fakataha kotoa pē ʻi heʻetau tali ha “founga foʻou mo lelei ange” ʻo e ngāue fakaetauhí.1 Mahalo ʻoku ʻi ai ha niʻihi ʻiate kitautolu ʻoku ongoʻi lōmekina pe loto foʻi. ʻE tokoni haʻo manatuʻi ʻoku ʻikai ʻuhinga e “founga foʻou mo lelei angé” ʻoku “haohaoa pea faingataʻa ke lavaʻi.”
Pe ʻokú ke kei veiveiua pē fekauʻaki mo e ngaahi taumuʻa ʻo e ngāue fakaetauhí mo e founga hono faí pe ʻokú ke fakakaukau ʻokú ke ʻilo kotoa ia, ʻoku ou fakaafeʻi koe ke ke mamata mo lau e ngaahi maʻuʻanga tokoni ʻi he ministering.lds.org pea ako e ngaahi fakamatala ki he Ngaahi Tefitoʻi Moʻoni ʻo e Ngāue Fakaetauhí ʻa ia ʻoku pulusi he māhina kotoa pē ʻi he Liahona (vakai ki he peesi 8 ʻo e makasini ko ʻení). ʻE tokoni atu e ngaahi naunau ko ʻení ke fakafenāpasi hoʻomou ngāue fakaetauhí mo e ngāue ʻa e Fakamoʻuí.
ʻOku ou fakamālō atu, kau fefine mo e kau tangata lelei, ʻi hoʻomou ʻofa, tokanga mo alanima atu ʻo tokoní. ʻOku mou fakaofo moʻoni, pea ʻe hoko hoʻomou ngāue fakaetauhí ko ha “meʻa mātuʻaki makehe”!2