Ennaan An Ritōl an Eria
Kwoj Iakwe Eō Ke?
Ke rikaļoor ro raar itok itak ippān Rilo̧mo̧o̧r eo n̄an parijet ko an Casearea Philippi, Jisōs eaar kajjitōk ippāer, “Wōn N̄a, ilo an armej kōnono?”1 Piter eaar uwaak im ba, “Kwe Ri Kraist, Nejin Anij e mour.”2 Innām ilo lo̧jet in Tiberias, kiiō jerkakpeje Kraist ej kajjitōk ippān Piter, “Kwōj yokwe Eō eļap jān rein ke?”3 Uwaak eo an Piter ekajoor, “Aet, Irooj; Kwō jeļā Ij yokwe eok.”4
Piter eaar jeļā kōn Jetōb Kwojarjar eo bwe Jisōs eaar RiKraist eo. Eaar bōk revelesōn eo an make, im menin eaar erom kam̧ool im naan in kam̧ool eo an make. Rilo̧mo̧o̧r eo eaar jeļā menin ilo An ba “Kwōj m̧ōņōņō Saimōn, nejin Jona: bwe kanniōk im bōtōktōk raar jab katakin eok kake, a Jema ej pād i lan̄.”5 Ālkin an Piter kar kile iakwe eo an n̄an Rilo̧mo̧o̧r eo, Jisōs eaar uwaake kōn kean̄ eo, “Kwōn naajdik Aō sip.”6 N̄an jerbal n̄an Rilo̧mo̧o̧r eo ad ej n̄an iakwe E, im n̄an iakwe E, ej n̄an jeļā E.
Iiō eo ļo̧k ilo Eprōļ Kweilo̧k eo Eļap, Būreejtōn Russell M. Nelson eaar kōjeļļā kōn juon jekjek ekāāl im ekkwojarjarļo̧k n̄an ekōjkan ad kea im jerbal in karejar n̄an ro jet. Eaar ba, “Irooj ekar kōm̧m̧an oktak ko ilo wāween eo jej kea kōn doon.”7 Innām ilo Oktoba Kweilo̧k eo Eļap, Būreejtōn Nelson eaar kōjeļļā kōn ijjino eo an “kōn juon jikin-kabun̄jar ilo Mweo im Kabun̄-ej bōk jipan̄ im karōk n̄an ekkatak katak ko, kōkajoorļo̧k tōmak, im kōjparok eļapļok kabun̄jar an juon make.”8
Ke Piter eaar wōnm̧aanļo̧k n̄an kōļapļo̧k tōmak eo an make, Rilo̧mo̧o̧r eo eaar ba n̄an e, “N̄e em̧ōj am̧ bar oktak, kwōn kakajoor ro jeim̧ im jatūm̧.”9 Kōjeļļā eo an Būreejtōn Nelson kōn m̧weo, pedped wōt ioon ekkatak katak eo im jekjek eo ekāāļo̧k, ekkwojarjarļo̧k n̄an kea kōn im jerbal in karejar n̄an ro jet, ekōtļo̧k bwe jān kōm̧m̧ane lukkuun men ko ruo Kraist eaar kajjitōk ippān Piter.
M̧oktata, jej aikuj kōļapļo̧k oktak eo ad make n̄an Rilo̧mo̧o̧r Jisōs Kraist. Men̄e ilo jikejuuļ in kweilo̧k in jar ilo Jabōt eaar jilu awa ko ak enaaj kiiō ruo, ej ilo lowaan m̧ōko im̧ōd make me jenaaj bōk eļap an oktak eo ad make im kareel eo.
Būreejtōn James E. Faust (1920–2007) eaar ba, “Eļan̄n̄e jej lukkuun in kōņaan bwe im̧ōko im̧ōd ren jikin ko rekwojarjar, enaaj ļapļo̧k ad kajieon̄ n̄an kōm̧m̧ani men ko me rej koketak n̄an Jetōb eo an Irooj.”10 Kein jipan̄ eo an Kabun̄ in, “Itok, Ļoor Eō—N̄an Kajjojo Armej im Baam̧le ko” ej ejaak n̄an jipan̄ kōj kōkōm̧anm̧anļo̧k ad ekkatak gospel eo, men̄e kōn kōj make ak ippān baam̧le eo ad.
N̄e kwaļo̧k kadkad in jabdewōt ukotak ko rekāāl n̄an juon jikejuuļ an juon make ak baam̧le, emaron̄ itok kōn kapan̄pan̄ ko an make. Meļeļe menin, Būreejtōn Nelson eaar letok n̄an kōj kaenōm̧m̧an in: “Ij kallim̧ūr bwe ilo ami niknik jerbal n̄an bar kōkāāl m̧weo im̧ōmi n̄an juon jikin ekkatak gospel eo, ilo iien ko raan in Jabōt ko ami renaaj em̧ool erom laudin̄din̄. Ajri ro nejimi renaaj itok limoier n̄an ekkatak im n̄an mour kōn katak ko an Rilo̧mo̧o̧r eo, im kareel eo an rikapo eo ilo mour eo ami im ilo im̧ōko im̧ōmi enaaj dikļo̧k. Oktak ko ilo baam̧le eo ami renaaj erom jelet im rejtake.”11
M̧ōttan eo kein karuo kōn kōmeļeļe eo n̄an Piter eaar n̄an kōkajoorļo̧k ro jein im jatin. Kiiō jej aolep kōnono kake menin āinwōt “jerbal in karejar”. Elder D. Todd Christofferson eaar ba jerbal in karejar ej, “rikaļoor, jej ļoor Rilo̧mo̧o̧r eo, jej kajieon̄ n̄an kōm̧m̧ane ta eo Shepherd eo Em̧m̧an eaar kōm̧m̧ane, im ļoor waanjon̄ak eo me Eaar kwaļo̧ke im katak eo ad ej n̄an ļoor Kraist im erom rikaļoor ro An ilo lukkuun jekjek eo”12. Ilo ad kōļapļo̧k nememe ko āinwōt an Kraist ilo kōj make, eddo eo kōn ijjitōn̄ ko ad an jerbal karejar eo renaaj āinwōt jab eddo, bōtaab ijello̧kin, naaj en̄jake ikdeelel im erom jim̧or jeraam̧m̧an im kūrm̧ool.
Ta eo Kraist eaar kōnono kake ke Eaar kōjerbal naan eo “rein”, ke Eaar kajjitōk ippān Piter, “Kwōj yokwe Eō eļap jān ‘rein’ ke?”13 Ej kōnono kōn poub ko im ebar lōn̄ kareel ko ilo mour ko ad, me rej jiāe n̄an iien im m̧ad eo ad.
Elder Christofferson eaar ba, “N̄an kattōt dim im pen kōn Tōmak ilo Kraist ebōk bwe gospel eo an Jisōs Kraist en im̧we būruwōn im an, meļeļein bwe gospel eo ejjab im̧we wōt elōn̄ jekjek ko ilo mour an juon armej ak ej ba kajjien mour im piktokin mour eo an.”14 Ilo ad kōļapļo̧k naan in kam̧ool eo ad ilo Kraist, oktak eo ad ej erom lōke eo ad. Innām jemaron̄ uwaak āinwōt Piter eaar im dim ilo ba, Aaet Irooj, kwojeļā bwe ij iakwe eok, bwe kwe RiKraist eo, nejin Anij eo emour.