iTukutuku ni Veiliutaki ni iWasewase
Na Kena Kilai, Vakadeitaka e Lomada ka Muria na iVakaro ni Kalou
Na kena imatai o ya meda kila na ivakaro. Na kena ikarua o ya na kena vakadeitaki e lomada na ivakaro. Sa dua tale o ya me sa lomada dina meda muria na ivakaro.
Niu se qai curuvou walega ena Lotu, niu se yabaki tinikatolu, au sa mai kila kina na ivakaro. Ia, au a sega ni vakadeitaka e lomaqu na vuna e yaco kina eso na ivakaro ni Turaga, se meu vakasamataka niu na raica na kalougata niu muria na ivakaro. Me vakataka, noqu dinata tiko meu muria na Vosa ni Vuku, a sega ni vinaka na noqu kaukauwa kei na igu niu qito, ka so na gauna, a ca vakalevu sara ni vakatauvatani kei ira na noqu lewe ni timi era a voroka tu na lawa yadua ni Vosa ni Vuku. Sai ira ga era cici tiko ka sega ni oca,1 o au e sega, ia, ena vakabauta ga au sa talairawarawa kina.
Me kena ikuri, sa vaka me sogolati au na ivakaro ka vakamalumutaka na noqu kila vaka-qito. Ia, ni oti e 48 na yabaki au sa qai raica kina na veisereki ni ivakaro, ka sega ni veisogolati. Na cava sa veisau? E sega ni ivakaro. Sa veisau na veivakadeitaki e lomaqu kei na noqu ivalavala.
Au sa mai raica oqo na ivakaro ena vakavinavinaka me vaka niu raica na saini ena baravi “qalo ena kedra maliwa na kuila”. Ni gadrevi na qalo galala e baravi, ena vanua sa vakadeitaki tu ni sa taqomaki, au sa qalo ga ena kedra maliwa na kuila. Dina, niu rawa ni qalo ena veivanua tale eso, ia niu cakava oqori au sa na ciqoma kina na revurevu ni noqu lewa o ya.
Au sa digitaka oqo meu muria na ivakaro baleta niu kunea kina na vakacegu e cecere kau taqomaki kina, ia ni toso na gauna, au sa raica kina na kalougata niu talairawarawa kina.
Ena vuku ni ivakaro e kaya kina o Elder Dale G. Renlund ena Kuoramu ni iApositolo Le Tinikarua, “Na ituvatuva ni Kalou e oka kina na veidusimaki baleti keda, e vakatokai tiko ena ivolanikalou me ivakaro. Na ivakaro oqo era sega ni dua na ituvatuva vosa veivakamarautaki se lawa vakai koya ga me vakavulici keda walega meda talairawarawa. Era sa sema ki na noda tarai cake meda bula vakalou, lesu tale vua na Tamada Vakalomalagi, ka ciqoma na reki e gumatua. E dina ga ni gadreva na Kalou meda tiko ena sala ni veiyalayalati, sa solia tu o Koya na dodonu ni noda digidigi. 2
Me vakataki Nifai, ena vukuqu, au kila ni “Sa dodonu meu talairawarawa”. 3
Na reki, marau, vakacegu e titobu, vakila na veitaqomaki kei na inaki vakalou, era yaco mai ena kena gauna, kivei ira era sa vakadeitaka e lomadra ka muria na ivakaro. Na kena dina, ni da muria na ivakaro ena vakabauta ena yaco meda vakadeitaka e lomada. E cavuta kina o Joni na vosa ni Turaga, “Kevaka e dua na tamata sa via cakava na loma i koya, ena kila se sa ka mai vua na Kalou nai vakavuvuli, se’u vosa vakai au ga.”4 (kuri ena vosa-kala)
A vola kina o Edgar A. Guest na itukutuku oqo me baleta na dodonu ni caka vinaka, ka sega ni tukuni walega.
Meu raica ga na bulataki ni vunau ka sega ni rogoca walega;
Me dua e lako vata kei au ka me kua ni tukuna walega vei au na sala.
E gonevuli vinaka cake na mata, ni gagadre cake mai vei daliga;
E veicavilaki na ivakasala momona, ia e matata cake na ivakaraitaki,
Era sa vinaka sara na dauvunau ni ra bulataka na nodra vakabauta,
Ni laurai e dua na caka vinaka sa nodra gagadre na tamata kecega.
Au na vulica sara meu cakava kevaka mo vakatakila vei au na kena caka;
Au na raica na ligamu ni ko sa cakava, ia na nomu vosa sa totolo sara.
Ena rairai vuku ka dina sara na nomu veituberi,
Ia au na via vuli ga niu raica na ka o cakava.
Niu na rawa ni sega ni kilai iko kei na nomu ivakasala cecere,
Ia au na kila rawa na nomu ivakarau kei na ivalavala o bulataka.5
Na bula vakatisaipeli e sega walega ni kena kilai na ivakaro ena veika vakavuli ka sega ni bulataki. Na bula vakatisaipeli e sega ni baleta na kena muri tiko vakamataboko na ivakaro. Na bula vakatisaipeli dina sai koya na kena vakadeitaki e lomada na ivakaro ka lomada dina meda muria, baleta ni da sa mai kila ni sa veivakalougatataki mai vua na Tamada mai Lomalagi dauloloma.