Na Tisaipeli Dina, Era Muria na ‘iNaki i Karisito,’ e Viti

E kaya kina o Elder Dieter F. Uchtdorf ena Kuoramu ni iApositolo Le Tinikarua:

“Eda rawata na bula vakaikuri o ya sega ni mai na raici ni noda gagadre se rawaka vakaikeda ia mai na bula vakatisaipeli dina i Jisu Karisito—kena muri ni Nona sala ka vakaitavi voli ena Nona cakacaka. Eda kunea na bula vakaikuri ni da guilecavi keda ka tutaka voli na sasaga cecere i Karisito.

Na cava mada na sasaga i Karisito? Sai koya meda vakabauti Koya, loloma me vaka a dauloloma, ka kitaka me vaka a kitaka o Koya.

O Jisu a “lako voli ka dau caka vinaka” (Cakacaka 10:38). E a maliwai ira na dravudravua, na vakuwai, na tauvimate, kei na madua. A qaravi ira na vakaleqai, na malumalumu, kei na tawaveitokani. A vakayagataki gauna kei ira; a veivosaki kei ira. “A sa vakabulai ira ko Koya” (Dieter F. Uchtdorf, “Vakabauta, Lomana, Kitaka,” Liaona, noveba 2018; Koniferedi Raraba ni Okotova 2018)

Na lotu e Viti sa cakava tiko na nona “lako voli ka dau caka vinaka” ena veitikotiko raraba kece kei na vuqa na sala Talei ka veivakauqeti ni da sa “tutaka voli na sasaga cecere i Karisito.”

Na Veikilai kei na Veidokai Vakamatavakabauta

Ena Noveba ni 2018, era a vulica vinaka kina e lewe ono na marama Wesele kei na Yalododonu Edaidai na veika e baleta na Diwali ena nodra marautaka vata na Soqo ni Rarama (Festival of Lights). E dua na marama kaya, “Eda rairai bulataka tiko e dua tale na ivakarau ni bula kei na vakabauta vakalotu, ia e sega ni dodonu me tarovi keda meda mai marau vata. Ena vukei keda meda kila vinaka kina na lotu Hindu kei na nodra ivakarau ni bula na Wekada na Idia. Ena kila oqo sa rawa kina meda talaraka sobu kina na bai e vaka me tawasei keda tiko.”

Ena vula vata o ya, ena Sitoa Levu ni Morris Hedstrom e Suva, a tavoci kina na parokaramu ni ‘Vakararamataki Vuravura’. Ena veiliutaki nei Elder Adolf Johansson, a tavoca kina o Mereseini Vuniwaqa, na Minisita ni Marama, Gone, kei na Valuti ni Dravudravua na kena tutaki na Siganisucu e vuravura raraba, ena nodra vakayaloqaqataki na lewe i vuravura taucoko mera veiqaravi vakai ira ena gauna ni olodei oqo. Na kena wasei yani na parokaramu oqo kivei ira kece na lewe i Viti, oka kina o ira eda sega ni vakabauta vata, a sala cecere sara me laveti cake na veitokoni oqo ki na dua tale na itagede ni sa kena ikatolu ni yabaki oqo.

Na kena kilai vinaka na nodra vakabauta vakalotu eso ni da wasea yani na noda vakabauta vei ira ena rawa me vaqaqacotaka na ‘iNaki i Karisito’ ni da sa duavata tiko ena noda cakacaka vinaka. Eda sa vakaraitaka kina ni da sa tautauvata ga ka sega ni duidui kei na noda duavata eda na caka vinaka vakalevu cake kina.

Na Cau ki na iSoqosoqo ni Loloma, Koronivuli kei na iLawalawa ni iTikotiko Raraba

Me vaka e noda cakacaka ni veivuke ki na kawatamata raraba, na Lotu i Jisu Karisito ni Yalododonu Edaidai sa tokoni ira talega na veisoqosoqo raraba ena noda vanua ena nodra sasaga dodonu. E a lolomataka na LDS Charities e rua na misini ni dikevi ni dra kei na kateni ni pepa lalai ni tauri ni dra ki na Diabetes Fiji. Na misini vou kei na kena pepa lalai ena dikevi kina na levu ni uro kei na suka vei ira ena taudaku ni taoni. Sa dau sema vata na LDS Charities kei ira na veisoqosoqo ena noda vanua era kila na bibi ni nodra gagadre kei na ibolebole era sotava na tamata ena nodra yasana.

Me vaka ena vuqa sara ena Veiyanuyanu ena Pasifika, sa lolomataka talega kina na Lotu na taqe ni wai e gadrevi tu e Viti. Ena 2017 a vakau e 14 na taqe ni wai 10, 000 na lita ki na Yanuyanu o Koro mera vukei na tamata e kea mera vakacokotaki na nodra itikotiko raraba ni oti na Cagilaba o Winston. Na taqe ni wai oqo a veivakacegui vakalevu sara vei ira ena Yanuyanu baleta ni yaga na kena tawani na wai ni ra cakacaka na lewe ni koro.

Ena Jiune ni 2018, era a cakacaka vata na New Zealand’s Furniture for Schools Charitable Trust, LDS Charities kei na BYU-Hawaii me ciqomi rawa kina na kena lolomataki mai na iyaya ni loma ni koronivuli mai vei ira na koronivuli e Niu Siladi, vakakina na iyaya tale eso, ki na koronivuli e Namuka I Cake e Vanua Levu.

Me vaka talega na iyaya e loma ni vale, era sa cakacaka tiko kina vagumatua na gonevuli mai BYU-Hawaii ena Millstone Initiative Project vata kei ira na isoqosoqo eso e Viti. O ira na vakaitavi kina era vakavinakataka na rumu ni vuli kei na nodra vale na qasenivuli ena Koronivuli o Namuka I Cake e Vanua Levu.

Ena 2018 a lolomataka na Lotu e 296 na dabedabe qiqi ki na Spinal Injury Association of Fiji. A kaya kina o Veena Bhatnagar na iVukevuke ni Minisita ni Marama, Gone kei na Valuti ni Dravudravua, “Ena vuku ni Matanitu o Viti, au via vakavinavinakataka vakalevu sara na nomuni sotava na nodra gagadre levu o ira e vakaleqai tu na ituvaki ni yagodra.”

O Akata, na tinana na cauravou yabaki 7 e vakaleqai tu na nona suitu, a kerea e dua na dabedabe qiqi lailai me nei Sam. E ratou vakaitikotiko na nona vuvale ena yasana e ra ni dua na ibulubulu sa kena ibalebale ni ratou na taubale cake vakabalavu ki na ikelekele ni basi. Sa cauravou levu toka o Sam ka sa dredre vei tinana me keveti koya ka sa qai dau wawa tu ga e vale o Sam ka davo toka ena ibe e ra. Sa dau gadreva tu o Akata me kauti koya ki lotu.

Sa qai vakavodoki vakavinaka toka o Sam ena nona dabedabe qiqi vou kei na kena gacagaca veitaqomaki kece. Sa dau matau tu vei Sam me davo tu ga ena vuloa ena vuqa na gauna, ka sa ka vou oqo vua me vakamatautaki koya ki na nona dabedabe qiqi vou. Na nona ceguva mada ga na cagi bulabula e tuba sa ka vou sara vua. Ia oqo, na qiqi ni nona dabedabe sa mai tabana ka sa rawa vua me sotavi vuravura vata kei na nona vuvale.

Na Cakacaka Vata kei na Tabana ni Matanitu kei na Media me Kaburaki kina na Kosipeli

Ena mua ni Okotova 2018, era a sota kina na Vitusagavulu ni iWasewase, o Elder Adolf Johansson, kei koya na Dairekita ni Veika Raraba ni iWasewase na Pasifika, o Richard Hunter, kei na dua na ilawalawa Yalododonu vata kei koya na Edita ni Fiji Sun o Nemani Delaibatiki kei ira na vakailesilesi ni Fiji Sun. A oka tiko e dua vei ira na Yalododonu o Sulueti Kama, na dairekita ni veika raraba e Viti, Elder kei Sister Williams, e rau daukaulotu ni Lotu kei Sister JoAnne Wadsworth, e dua na gonevuli ni BYU e mai vuli vulatolu tiko ena Ceva ni Pasifika.

A veivosakitaki kina e vica na ulutaga vata kei Mr. Delaibatiki oka kina na kena raica matua tiko na Lotu na vakabauta, matavuvale, bula galala vakalotu, vuli, veivukei ki na kawa tamata raraba, bula-rawati koya kei na sasaga tale eso mera laveti cake kina na tamata yadua, matavuvale kei na itikotiko raraba.

E kaya o Elder Johansson, “Eda sa kila tu ni Fiji Sun, me vakataki ira kece na isoqosoqo ni media era sa tu ga vakai ira ka gugumatua sara ki na nodra vakasaqara na dina mera ripotetaka me kaburaki raraba ka vakarautaka na kena inaki vinaka duadua me yaga vei ira na wilika. Eda sa vakavinavinaka vei ira na noda itokani ena kakaburaki ena media, eke e Viti vakakina ena iwasewase raraba, me vakataki keda ga, era sa dau vakasaqara na dina, ena nodra gagadre mera vukei ira na tamata. Sa dina sara, sa dodonu mera kaburaka raraba yani na itukutuku kaukauwa ni siga o ya, ia eda sa marautaka meda raica na kena tabaki talega na itukutuku vinaka eso, e lako mai na nodra bula na lewe ni vanua kei na itikotiko raraba sa yaco kina na veika vinaka ena vakabauta, lomavata kei na cakacaka kaukauwa.”

Era a sota talega na ilawalawa oqo vata kei Hon. Laisenia Tuitubou, Minisita ni iTabagone kei na Qito, kei na vakailesilesi e cake ni minisitiri me veivosakitaki na sala mera vukei kina na itabagone ni noda vanua.

Era a sota talega na mata ni Lotu vata kei Dr. Josefa Koroivueta, na Vunivola Tudei ni Marama, Gone kei na Valuti ni Dravudravua, kei na ivakalesilesi e cake eso mai na minisitiri.

Ena veiliutaki nei Elder Johansson kei na veitomani ni dua na noda lewe ni Lotu o Apimeleki Ravouvou Tuitubou, a wasea kina na ilawalawa vei ira na vakailesilesi ni matanitu e dua na ivolalailai vou na, “Noqu iVakatagedegede.” E tabaki tu kina na ivakamacala leleka ni itagede taumada ni bula dodonu ka sa baleti ira na itabagone ni veimatavakabauta cava ga. Sa gadrevi raraba e vuravura ka sega ni tiko kina na ivolanikalou ni Yalododonu Edaidai se vosa me vakataka na “Me iSakisaki ni iTabagone.”

E kaya kina o Elder Johansson, “A kerei na Lotu mai na veitiki ni vuravura tale eso, mai vei ira na matanitu, me dua na ilavelave raraba ni ‘Me iSakisaki ni iTabagone’ e rawa ni ra vakayagataka na itabagone mai na veimatalotu tale eso. Eda sa solia tiko ena gauna oqo na kena faile vakalivaliva ni ivurevure oqo me iloloma vei ira na veimatanitu kei na veimatalotu tale eso e vuravura raraba. Kevaka mena veivukei eso mera vakadewataka, tabaka, ka veisoliyaka, ia eda na marau sara kina. Eda gadreva meda tokoni ira e vuqa na itubutubu vinaka e Viti era sasagataka tiko mera susugi ira na luvedra ena dua na yavu ni vinaka kei na dodonu.”

E kaya o Richard Hunter, “Eda lomani ira kece na luveda kei ira na itabagone, ka da vinakata mera tubu cake ena nodra kila vinaka tiko o ira, kei na cava era gadreva ocei tutaka ena bula oqo. Na kena vakamatautaki na yavunibula vinaka kei na itagede ni savasava, ivosavosa, isulusulu kei na irairai, veivakamarautaki kei na media, kei na ituvaki tale eso ni bula, ena vukei ira e vuqa tale na itabagone mera digidigi vinaka cake, vakabibi ena veiyabaki dredre ni itabagone.”

E kaya o Mrs. Sulueti Kama, “A ka dokai vei ira na mata ni Lotu ena nodra a sotavi Minisita Tuitubou, Vunivola Tudei Dr. Koroivueta kei ira na vakailesilesi e cake ni matanitu nikua. Keimami a kidavaki ena marau, ka yaga sara na neimami veivosaki. Keimami sa vakavinavinaka vakalevu ena veika era sa cakava kei ira na vuqa tale eso mera qaravi o ira na itabagone ni noda vanua.”

Na “iNaki i Karisito” sa toso tiko ena vanua o Viti. E sega na cakacaka ni veiqaravi me ka lailai mena vakauqeta na itosotoso cecere oqo ni ivalavala dodonu. Oi keda yadua eda sa vakalougatataki ena isolisoli vakayalo kei na taledi. Ni da raica na isolisoli oqo kei na gagadre kei na ibolebole lelevu sa tu voliti keda, ena vakatakila vei keda na Yalo ni Kalou na sala meda na loloma vakalevu cake kina me vaka sa loloma na Karisito, ka cakava me vaka sa dau cakava o Koya.