Bulago ena Noda Vanua
Veika Vuni ni Kalou
Na noqu sala ki na vuli kei na saumaki vou.
Au a sega ni susu ena Lotu. Au a susu ena Lotu Wesele. E dina ga niu a sega tu ni kila niu sa tubu cake tiko, sa kilai au tiko na Kalou ka sa vakarautaka e dua na sala meu kunea kina na kosipeli i Jisu Karisito.
Au a tubu cake ena bula tu ga vakoro ena yanuyanu o Beqa ena taudaku ni yanuyanu levu o Viti Levu. Na vanua au a susu kina, a sega kina na koronivuli sekideri. Rau a biu vuli na noqu itubutubu ena itagede ni sekideri, kei na gauna meu tomana kina noqu vuli ni oti na kalasi walu a sega ni’u vakawalena.
Au a laki vuli ena koronivuli ni tikina o Sawau mai na kalasi dua ki na walu kau laki ivukevuke sara ni Head Boy. Mai kea au sa laki vakaitikotiko vata kei buqu e Viti Levu meu laki vuli ena Nasinu Secondary School. A dredre sara na veisau ki na bula vakataoni. Au sa nanumi rau lesu na noqu itubutubu vata kei tukaqu kei buqu e nakoro kau sotava e vuqa na ibolebole, ia au sa vakadeitaka meu vakacavara vinaka ni sa ka bibi sara vei au na vuli.
Au a vuli sara vakaukauwa ka vakacavara vakavinaka na imatai ni yabaki ia au a rarawa vakalevu ni sa sega ni rawa ki na noqu matavuvale me sauma na noqu vuli. Ena gauna sa tukuna kina o tamaqu meu sa tu ga e vale ena yabaki e tarava, sa mosi sara ga na yaloqu. E dina sara, niu sa rokova na nona lewa, ia au a sega ni vinakata meu lesu i nakoro. E dina ga ni’u se bera ni ciqoma na kosipeli ena noqu bula, kau a susu ena Lotu Wesele ka kila vinaka na masu. Au a kerea vua na Tamaqu Vakalomalagi ka vakila na vakacegu se cava ga ena yaco, sa ituvatuva ni Kalou.
Vinaka vakalevu na ituvaki vakayalo o ya, kau sa sega tale ni lomaleqa keu sa sega tale ni laki vuli se cava era na kaya na noqu itokani. Au sa ciqoma kina na lewa nei tamaqu ka vakacegu kina na yaloqu.
Na veika a qai yaco e muri a vakaraitaka vei au na nona kauwaitaki au tiko vakalevu na Turaga. A gadreva o Koya meu vakacavara na noqu vuli, ia sa gadreva talega meu kunea na Nona kosipeli ka meu papitaiso.
O tuakai tamaqu, e lewe ni Lotu i Jisu Karisito ni Yalododonu Edaidai, a dua taumada vei ira na vuqa a sasagataka meu saumaki vou. A qiriti tamaqu ka kerea meu sa lako yani vua meu laki tiko vata kei koya. A vakayaloqaqataki au o noqu Nau Buresova kei Tutu Nemani Buresova meu tomana tale na noqu vuli ka rau a sauma na noqu vuli e Suva Muslim College. Rau a vakaitavi talega ena nodrau a tuberi o tamaqu lailai kei na nona matavuvale ena kosipeli.
Au vakavinavinakataka na nodrau sasaga, ka rawa vua na Tamada Vakalomalagi me kauti au mai ki na dua na vuvale e tiko kina na Yalo ni Kalou. Au gole ki lotu ena vei Sigatabu vata kei tamaqu levu ka gole ki na nodratou itaviqaravi taucoko ni lotu. Sa vakatekivu me vakauqeti au na Yalo ni Kalou meu kila cake na veika ni kosipeli. Au sa tekivu tauri lesoni mai vei rau na goneyalewa daukaulotu, o Sister Aumua kei Sister Taufa, kau sa saumaki kina.
Na lewa kaukauwa o ya nei tamaqu, a vaka me sa tagutuvi kina na noqu rawa ni la’ki vuli tale ka sa mai yavu sara ga ni noqu ivakadinadina. Ena vuku ni ka au sotava o ya, au a raica vakamatata kina na liga ni Turaga ki na noqu bula. Au a raica kina ni tiko na Nona ituvatuva vakakina na Nona ituvatuva vei au sa cecere sara mai na kena au a tuva tu baleti au.
Ia oqo niu sa mai saumaki vou, au sa gadreva meu sa papitaso. Au a qiriti tamaqu ka tukuna vua niu sa gadreva meu sa papitaiso. Me vaka ni Wesele o koya, au sega ni vakadeitaka rawa na nona nanuma, ia au kila ni tamata vinaka o koya kau na doka na nona lewa. A qai kaya mai, “Luvequ, ke qaravi Jisu Karisito ga na lotu oqori, sa donu vei au.”
Au a papitaiso ka vakadeitaki meu sa lewe ni Lotu; kau a wilika na iVola I Momani ka vakarautaki au meu la’ki kaulotu. Au a taura na noqu ivola ni kaulotu meu sa laki kaulotu ena Australia Melbourne Mission. E dina ga niu a sotava na dredre e vuqa ena noqu ilakolako oqo, au a vakila na veivaqaqacotaki ni Turaga vei au ka vakalougatataki au ena veigauna taucoko kei na yabaki sa oti, au a digitaki meu sa Head Boy ena Suva Muslim College.
Au sa vakavinavinaka vakalevu sara kivei ira na tamata cecere digitaki era a lesi mai vei Tamada Vakalomalagi ki na noqu salatu ni saumaki vou. O tamaqu levu ka a vinakati au; o tinaqu levu Asena Raisele, a ciqomi au ena lomavinaka, na vuvale na Buresova ka a sauma na noqu vuli kei na veivakadonui nei tamaqu meu papitaiso. Au vakavinavinaka vakalevu ni sa lomadra dina mera muria na nodra dui vakauqeti vakayalo ka a vukea me saumi mai na noqu masu.
Au sa waraka tiko meu na laki kaulotu ena dua na gauna lekaleka oqo kau nuitaka niu sa nodra isau ni masu mai Ositerelia era vakasaqara tiko na dina. Au vakadinadinataka ni kevaka meda nuitaka ga na Kalou, eda na raica na noda veigauna dredre me na vuki meda kune kalougata kina. E lomani keda o Koya.