O se Tusi mai se Aposetolo
Saunia e Peresitene M. Russell Ballard
Sui Peresitene o le Korama a Aposetolo e Toasefululua
Mai se saunoaga, “O se Tusi i le Au Paia o le Eria a Iuta Sate Leki,” sa tuuina atu i se konafesi a siteki tuufaatasi i le aso 11 o Setema, 2016.
Ou te sii ae lo’u leo e lapatai outou ona o nisi o luitau ua tatou faafeagai i le asō.
Ata o le laau mai le Getty Images; auiliiliga mai i le Paul the Apostle, saunia e Jeff Ward
Sa tumau fesootaiga a le Aposetolo o Paulo ma le Au Paia anamua e ala i tusi ia sa ia auina atu i lalā eseese e faailoa atu i ai lona alofa, taitaiga, ma aoaoga. Talu ai ona e le mafai ona ou feiloaitino ia te outou uma, o le a ou tuuina atu i upu ia te outou la’u lava tusi e faailoa atu ai lo’u alofa, faafetai, ma aoaoga.
I le Au Paia i Korinito, sa tusi atu Paulo, “O Paulo na valaauina i le finagalo o le Atua e fai ma aposetolo a Iesu Keriso” (1 Korinito1:1).
Ua valaauina foi a’u o se Aposetolo a Iesu Keriso, ma i le avea ai ma molimau faapitoa o le Alii, ou te molimau atu, e pei ona faia e Paulo i ana tusi, sa tuuina mai e Iesu Keriso Ia lava mo i tatou ma sa toe faatuina mai o Ia e le Tama mai le oti (tagai i le Kalatia 1:1, 4). Ou te molimau atu foi sa toe fuataiina e Iesu Keriso Lana Ekalesia e ala i le Perofeta o Iosefa Samita i nei aso e gata ai ma o le atoatoaga o le talalelei ma faamanuiaga e fesootai ma feagaiga e faavavau o loo avanoa mo tagata uma o e talitonu ma mulimuli i le Alii o Iesu Keriso.
E faafeiloai atu ai ia te outou, ou te faaaogaina upu a Paulo: “I le ekalesia a le Atua … , o e ua faapaiaina ia Keriso Iesu, ua valaauina e fai ma tagata paia, … Ia ia te outou le alofa tunoa ma le manuia mai le Atua lo tatou Tamā, ma le Alii o Iesu Keriso” (1 Korinito 1:2–3).
O’u uso ma tuafafine, ina ia tausia o tatou loto faaletalalelei ia maloloina, tatou te manaomia on siaki soo i tatou. A o ou tatalo atu mo le fesoasoani a le lagi, ua ou maua ni fautuaga mo outou o le a fesoasoani e faatumauina lo outou maloloina ma le malolosi faaleagaga.
Sa lapataia e Paulo le Au Paia i ona lava aso e uiga i faigata faaleagaga sa latou faafeagai. I le au Kalatia sa ia tusi atu:
“Ou te ofo ina ua faapea ona vave liliueseina o outou i le na valaauina outou i le alofa tunoa o Keriso a e faasaga i le tala lelei e ese:
“E le se tasi tala lelei foi lea, a o isi tagata ua faaatuatuvale ia te outou, ma fia faaliliueseina le tala lelei a Keriso.
“A e peitai e ui lava ina tala’iina e i matou, po o se agelu mai le lagi, ia te outou se tala lelei e ese i lea na tala’iina atu ai e i matou ia te outou, ia anatema ia” (Kalatia 1:6–8).
Ou te sii a’e foi lo’u leo e pei ona faia e Paulo, o loo i ai i latou “ua faaatuatuvale ia te outou, ma fia faaliliueseina le tala lelei a Keriso.” O le a ou faatamala i lo’u tiute pe afai ou te le sii a’e lo’u leo e lapatai ia te outou e uiga i luitau ua tatou feagai i le asō.
O Mana e Lua i le Atulaulau
O’u uso e ma tuafafine, aua lava nei galo o loo i ai mana e lua i le atulaulau: o le tasi e valaaulia i tatou e filifili le mea sa’o ma maua le olioli ma le fiafia, ma o le isi e valaaulia ia tatou e filifili le faafeagai, ma aumaia ai le faanoanoa ma le le mautonu i le mea sa fai pe lei faia. O loo aoao mai i tatou e la tatou aoaoga faavae faapea o le olaga o se iloiloga—o se taimi e vaai ai poo le fea le valaaulia o le a tatou taliaina.
Ou te faamanatu atu ia te outou le valoaga a Iesu e faatatau i aso gataaga lea ua tatou ola ai nei: “Auā e tutū mai Keriso pepelo, ma perofeta pepelo, latou te faia foi faailoga tetele ma vavega, ina ia faasese ai i e ua filifilia lava, pe afai e mafai ai” (Mataio 24:24). Ua tatou faanoanoa lava pe a tatou molimauina nisi o “e ua filifilia lava” ua faaseseina, e pei ona lapatai mai ai Iesu.
Lata mai nei lava sa ou asiasi ai i se togalaau itiiti o laau o le sekoia sa totoina i le tele o tausaga talu ai i le lotoa o le Iunivesite o Polika Iaga. Sa faamalamalama mai ia te a’u e sa’u uo faapea o sekoia o laau aupito sili ona tetele i le lalolagi atoa ma e mafai ona tupu i le umi o le 286 futu (87 m) i le togavao. E mafai ona ola i latou ia sili atu nai lo le 3,000 tausaga.
Sa mate se tasi o laau ma manaomia ai ona taina i lalo, ae tuu ai na o se pogati e faamanatu mai ai i soo se tasi e pasi ane o se laau umī ma le maoae sa tu ai iina. Sa manao le fomai laau o le lotoa e fia iloa poo le a le mea na tapēina le laau, aua e mautinoa lava e le i mate le sekoia ona ua matua ona tausaga. Ina ua maea se suesuega, na ia faaiu ai o aa e fafagaina le laau sa mamate i le leai o se vai.
E faapefea ona tupu lena mea talu ai o lea sa tupu lauusiusi le laau iina mo le sili atu nai lo le limasefulu tausaga? Sa iloa ai e le fomai laau o maa e umia le vai lea e fafagaina le tamai togalaau sa siitia ese ona o se taunuuga e le i fuafuaina i le fausiaina o se fale fou, i le itu i sasae o le togalaau.
O se faatusatusaga matuā atoatoa lenei ia te a’u e faatatau i le mea e tupu i tagata sili ona malolosi o le Ekalesia—o ”e ua filifilia,” i latou o e i foliga faaalia uma e foliga mai o loo tutū maualuluga ma sasa’o i le faatuatua—e oti faaleagaga.
E pei o le sekoia ua mate, o nei tagata o le Ekalesia sa i ai se taimi sa maua ai lo latou malosiaga faaleagaga mai le puna o le vai ola sa ofoina mai e Iesu Keriso. Ae peitai poo se tasi mafuaaga po o seisi, ua latou siitia ese ai mai i le faapogai autu o le malosiaga faaleagaga, ma e aunoa ma lena malosiaga sa galala o latou agaga, ma iu lava ina oti ai faaleagaga.
E mafai faapefea ona tatou faamautinoa o loo fesootai i taimi uma o tatou a’a e fafagaina faaleagaga i tatou i le puna o le vai ola?
Amio Masani Manaomia
Sa faataatia mai e le Alii amio masani faaletagata lava ia faigofie ia e mafai ona tatou mauaa, tumau, ma fesootai ai ia te Ia. O nei amio masani, pe a faia ma le faamoemoe atoatoa o le loto, faamoemoe moni, e aunoa ma le pepelo ma le faa’ole’ole, e faatagaina i tatou e fai ma soo e le maluelue o le Alii o Iesu Keriso.
O nei amio masani manaomia e aofia ai mea ia e foliga e faafaigofie ona masee ese atu i le faanatinati o o tatou olaga pisi, e oo lava pe a tatou auai i mea lelei e pei o le faaauauina o aoaoga, galue e lagolago i se aiga, ma le auai i auaunaga faalenuu ma le Ekalesia.
O na mea e aofia ai le tatalo faamaoni i aso uma, anapogi ma le faatuatua, suesueina ma le mafaufau loloto e le aunoa i tusitusiga paia ma upu a perofeta soifua, faia o le aso Sapati ma se aso fiafia, ai ma inu i le faamanatuga ma le lotomaualalo ma manatua pea le Faaola, tapuai i le malumalu i le tele e mafai ai, ma, mulimuli, aapa atu i e ua le tagolima, matitiva, ma ua tuuatoatasi—ia i latou uma o e latalata ane ma i le salafa o le lalolagi.
A tuua e se tasi le faia o nei mea faigofie ae matuā taua, ua latou vavaeeseina i latou lava mai le puna o le vai ola ma faatagaina Satani e faaeleelea o latou manatu i lana vai eleelea taufaasese, lea e tapunia alatoto o le faatuatua ma faavaivaia le agaga i meaai taufaasese. O le agasala ma le nofosala e faanenefua le mafaufau—ma taitaia le toatele e faafitia musumusuga ma faaaliga ua mavae ma faatupuina ai se “toe-liliuese” mai i upumoni o le talalelei a Iesu Keriso.
O le mea e tasi e oo mai pea lava pea i lo’u mafaufau o le iloa lea o tagata taitoatasi o e e le tumau i le tulimatai i aoaoga faavae ma le talalelei faigofie a Iesu Keriso e iu lava ina faalogo i faiaoga pepelo ma perofeta e tofi lava e i latou latou ma talitonu i talitonuga o le lalolagi. O nei leo eseese e aofia ai:
Ata pue o se kata fai aitalafu mai le Getty Images
-
O le faaosoosoga o le tamaoaiga e faatupu ai le faamaualuga.
-
O le pulea e le manao o mea manaomia, lea e faateleina ai aitalafu faaletagata lava ia.
-
Taaloga ma faafiafiaga ia e mafai ona aveesea mai le lelei atoatoa o le talalelei.
-
Gaoioiga e taofia i tatou mai le faamamaluina o le aso Sapati.
-
O faasalalauga ma upega tafailagi ia e faatupuina fesili ma masalosaloga e aunoa ma le lava o le faamaoni faaleatamai e faailoa tonu ma faamaoni ai le finagalo o le Alii.
Fesoasoani i Isi ia Maua Tali
Se’i ou faamautinoa ua e malamalama i lenei mataupu taua. E matuā leai leai lava se mea e sese ai le faia o fesili pe suesueina lo tatou talafaasolopito, aoaoga faavae ma faiga masani. Sa amataina le Toefuataiga ina ua saili e Iosefa Samita se tali i sana fesili faamaoni.
O matua, taitai o ausilali, faiaoga o le Ekalesia (aofia ai faiaoga o le seminare ma le inisitituti), epikopo ma peresitene o siteki: A sau se tasi ia te oe ma se fesili po o se popolega, faamolemole aua le na ona faapasi ese o le fesili. Aua le fai atu ia te ia e aua le popole i le fesili. Faamolemole aua le masalosalo i le tuuto o le tagata i le Alii ma Lana galuega. Nai lo lena, fesoasoani i le tagata e maua tali i fesili.
Ou te popole pe a ou faaologo e uiga i tagata faamaoni o loo faia fesili faamaoni e uiga i lo tatou talafaasolopito, aoaoga faavae, ma faiga masani ona faia lea o i latou e pei i latou o ni tagata le faatuatua. E le o le ala lenei a le Alii. E pei ona fai mai Peteru, “Ia saunia pea lava outou e tali atu ia i latou uma o e fesili mai ia te outou i le uiga o le faamoemoe o loo ia te outou” (1 Peteru 3:15).
Ua tatau ona lelei tele atu lo tatou faia o tali i fesili faamaoni. E ui lava atonu e le mafai ona tatou talia fesili uma e uiga i le atulaulau pe e uiga i lo tatou talafaasolopito, aoaoga faavae, ma faiga masani, e mafai ona tatou tuuina atu le tele o tali ia i latou o e faamaoni. Pe a tatou le iloa le tali, e mafai ona tatou sailia faatasi tali—o se sailiiliga fai faatasi e mafai ona aumaia vavalalata atili i tatou o le tasi i le isi ma vavalalata atili foi i le Atua. E moni, atonu e le mafai i taimi uma ona tatou maua tali faamalieina ia tatou fesili. I taimi faapena, e lelei le manatua pea o loo i ai lava se nofoaga i le lotu mo le faatuatua. I nisi taimi e mafai ona tatou aoao ma suesue ma iloa, ma i nisi taimi e ao ona tatou talitonu ma faatuatuaina ma faamoemoe.
Fesoasoani ia i latou e i ai fesili ia iloa e le manaomia e le Alii Lana Au Paia ia i ai ni tikeri maualuluga i le talafaasolopito po o aoaoga faavae. O le mea lea, e le tatau ai ona tatou manatu o le a i ai tali uma i matua, taitai, ma faiaoga mo fesili taitasi. E oo lava i totonu o le Au Peresitene Sili ma le Korama a Aposetolo e Toasefululua, e i ai i latou o e matuā eseese lava o latou talaaga ma aoaoga lea e aumaia ai se faasoaga o aafiaga e matuā lautele ma eseese i taimi o a matou talanoaga ma feutanaiga.
A i ai sa’u fesili e le mafai ona ou talia, e masani ona ou liliu atu ia i latou o e e mafai ona fesoasoani mai ia te a’u. Ua faamanuiaina le Ekalesia i le i ai o tagata atamamai ma i latou o e ua tuuto atu i se olaga o suesuega, o e ua oo ina iloa lelei lo tatou talafaasolopito faapea tusitusiga paia. O nei alii ma tamaitai magafagafa ua saunia le talaaga ma le talafaasolopito ina ia mafai ai ona tatou malamalama lelei i lo tatou taimi paia ua tuanai ma a tatou faiga masani o le taimi nei. I lo’u faamanuiaina ai i nei faamatalaga ua latou saunia, ua sili atu ai lo’u saunia e saili i le taitaiga a le Agaga Paia.
Ua tuutō atu le Ekalesia i mea manino ma ua lomiaina ai ni punaoa taua e aumai ai manatu fou ma aumaia foi talaaga faaopoopo atili mai i le tala o le Toefuataiga e ala mai i le upega tafailagi a Joseph Smith Papers ma tusitusiga i Gospel Topics i le ChurchofJesusChrist.org. O se taimi ofoofogia lenei e suesue ai le talafaasolopito ma aoaoga faavae, a ua i ai le tele o punaoa ma tagata atamamai ua saunia talaaga aogā ma malamalamaaga o lo tatou taimi ua tuanai. Ia tatalo faifaipea ma mulimuli i musumusuga a le Agaga Paia, o lē faaalia mai upu moni faaleagaga.
Ola i Mea ua e Mauaina
O loo ou popole o loo i ai nisi o tagata o le Ekalesia o loo ola i tua atu o le mea latou te maua a o latou taumafai e ola tutusa ma o latou tuaoi. Ua tatou faia se mea sese ogaoga pe a tatou faatusatusa o tatou olaga ia i latou o e e i ai le oa tele, ma galo ai o le toatele lava o i tatou ua uma lava ona faamanuiaina i tatou i le fanua. Faamolemole ia faamalieina ma fiafia i faamanuiaga ua uma ona outou mauaina nai lo le avea ma pologa i le faaaogaina sese o le aitalafu faaletagata faatau. Aua, aua lava nei lē totogiina lau sefuluai, ma ia ofoina atu ni taulaga limafoai e fesoasoani i e matitiva.
Fiafia Le Tasi I Le Isi
O nisi o outou atonu ua ova faapolokalamaina i le tele o gaoioiga, e aofia ai gaoioiga lelei. Faamolemole e faaeteete ia aua le ova faapolokalamaina a outou fanau. Tapē faasalalauga faaleagafesootai ma isi mea faalavelave mai fafo mai i lea taimi i lea taimi ina ia outou nofonofo ai ma talatalanoa ma fiafia le tasi i le isi E pei ona ou aoao atu i se taimi lata mai i le konafesi aoao, ia faifaipea aufono faaleaiga (tagai i le “Aufono Faaleaiga,” Liahona, Me 2016, 63–65).
Ia manatua, sa fautua mai i tatou e le Alii e “ina soia, ma ia outou iloa o a’u lava o le Atua” (Salamo 46:10; tagai foi i le Mataupu Faavae ma Feagaiga 101:16).
Ina ia faatumauina le pisi o tagata o le aiga ma toesea ai mai mea sili atu ona taua, e i ai lava se tagata i taimi uma o loo faatupuina se mea fou—o se polokalama poo se taaloga fou, mo se faataitaiga, lea e faaosofia ai tagata talavou e tilotilo i lalo ia latou telefoni nai lo le tilotilo i luga e vaavaai i foafoaga matagofie o le lalolagi ofoofogia a le Atua poo se tasi foi atonu latou te mananao e feiloai, tafafao, pe faaipoipo i ai ma se e mafai ona la faia se sootaga faalelalolagi-moni lea e taunuu i faamanuiaga e faavavau.
Alofa i Lou Tuaoi
Ou te ofoina atu sina upu e uiga ia tatou uo, tuaoi, ma paaga i le aoga ma galuega o e e le o ni tagata o le Ekalesia. E ui lava tatou te matua manatu mamafa i le valaauga ma le tofiga mai le Alii, “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga paia” (Mataio 28:19), tatou te faamamaluina ma faaaloalogia pea le saolotoga o tagata uma e mafaufau ai ma talitonu—pe lē talitonu—e pei ona latou filifilia.
Afai e le fia gauai mai se tuaoi, se paaga faigaluega, po o se uo a’oga e suesue le talalelei, e tatau lava ona tatou faaauau pea ona faaloaloa atu le lima o le faauooga. E le tatau ona faatapulaa lo tatou alofa mo i latou; e tatau ona faamaoni ma aunoa ma ni manoa e saisaitia ai.
E sili atu le aoaoina o a tatou fanau e ala i faataitaiga a matua ma ta’ita’i. Ia tatou faaeteete e faatatau i mea tatou te tautala ai e uiga i isi ma le auala tatou te faia ai o tatou uso a tagata. Ma ia manatua, ua ia te i tatou le aia tatau e feeseese ai, ae e le tatau lava ona tatou lē fiafia.
Sa aoao mai Iesu, “Ma ia e alofa atu i lē lua te tuaoi, ia pei o oe lava ia te oe” (Mataio 19:19). Afai o tatou o Ona soo, e tatau ona tatou ola i le amiolelei ma le agalelei faaKerisiano faatasi ma tagata uma lava tatou te feiloai i ai, e aofia ai i latou o e ua filifili e vavaeeseina i latou lava mai le Ekalesia.
Ia tatou uulima ma tagata agalelei uma i mafuaaga lelei uma ma faaaofia i latou i a tatou li’o faaleuo ma faapaaga. Ia tatou matuā taliaina i latou i o tatou falelotu ma gaoioiga faaleuarota.
O le Filemu ma Fautuaga Faaperofeta
O la’u tusi faaaposetolo ia te outou e faaiu i la’u molimau atu faapea afai o le a outou mafaufau ma le faaeteete i apoapoaiga faaperofeta, o le a outou maua a outou a’a e faafagaina faaleagaga [outou] o loo fesootai atu i le “vaipuna, e puna i luga i le ola e faavavau” (Ioane 4:14). O le a outou le oti faaleagaga e pei o le laau matagofie o le sekoia; nai lo lena, ou te molimau atu ia te outou o le a sili atu lo outou filemu, olioli, ma le fiafia i o outou olaga e ala i le taliaina o Iesu Keriso ma auauna ua Ia valaauina faapea ma le mulimuli ai i le fuafuaga o Lana talalelei. Sei vagana ai e toe liliu atu loto o tagata o atunuu i le Atua ma Ana aoaoga ma fuafuaga, o le a mautinoa lava lo tatou feagai ma faasalaga o loo faaali mai i tusitusiga paia.
O’u uso e ma tuafafine pelē, ua tofia i tatou e saunia le Ekalesia ma i tatou lava mo na aso o le a mautinoa lava le taunuu mai pe afai o le a faaauau pea e tagata o le lalolagi ona lē amanaiaina ma lē faatauaina le Atua lo tatou Tama Faalelagi ma Lona Alo Pele, le Alii o Iesu Keriso. O loo manino mai tusitusiga paia e uiga i faasalaga o le liliuese mai i le Atua.
Matou te alolofa ia te outou. O lo’u avanoa lenei e valaauliaina ai lo tatou Tama Faalelagi e faamanuia ia te outou. Ia outou maua le filemu. Ia outou maua le olioli i o outou loto. Ia outou maua le lototele e salamo ai pe afai o loo outou manaomiaina. Afai o loo i ai se mea o loo tupu i o outou olaga e lē lelei, ia faamanuia outou e le Alii i le lototele e salamo ai ma suia, amata atu i le asō. Ia auina atu e le Alii ia te outou le malosi e liliu atu ai o outou loto ia te Ia, ia alofa ia te Ia, ma auauna atu ia te Ia ina ia outou faaauau saogalemu pea i le olaga faitino, ao sauni atu mo lena aso e fusia ai i tatou i aao o lo tatou Tama i le Lagi ma Lona Alo Peleina.
I le avea ai o se molimau faapitoa o Keriso, ou te molimau atu ia te outou ou te iloa o Iesu o le Keriso. O Ia o le Alo o le Atua. O nei mea ua ou fai atu ai e moni, ma ou te faamoemoe o le a outou taliaina la’u tusi i le agaga ua ou tautala atu ai. Ou te molimau atu o le Ekalesia lenei a Iesu Keriso.
Ia faamanuia outou e le Atua, o’u uso ma tuafāfine pelē, a o tatou faia mea uma tatou te mafai e saunia ai mo lena aso pe a toe afio mai foi le Faaola ma le Togiola o le lalolagi o lo tatou Alii ma lo tatou Tupu.