O le Leo Suamalie o le Talafaasolopito o Aiga
Ata na tusia e Carolyn Vibbert
I se asiasiga i lo’u afafine i Kenitaki, ISA, sa ou mauaina ai se laau fai musika tuai faaApaleisia e ta’ua o le mountain dulcimer (e pei o se kitara taatia). Sa ou aoaoina nisi o a’u fanau a fanau e taina musika ma iloa ai le faigofie ona aoao e ta pese faigofie i luga o le dulcimer mauga. O lenei laau fai uaua e mafai ona faatu i soo se mea ma teu faigofie, e mafai ona fai ai musika malie faaleaiga a o nofonofo faataamilo i le afi tolauapi po o le fale.
I se tasi aoauli sa ma o mai ma lo’u afafine e vaai pe mafai ona ma mauaina se tasi e iloa fau dulcimers. Sa ma mauaina se tagata matua lava lea sa nofo i se tamai fale i se aualā tua. Sa ia fausiaina dulcimer mauga ma sa iai le kitara taatia e talafeagai lelei mo a’u.
I le faasologa o nai tausaga sosoo ai, sa ou aoao ai e taina ma aoao atu foi nisi o fanau o a’u fanau e taina foi. Sa ou manao e tuuina atu i a’u fanau o fanau taitoatasi se dulcimer, ae o le faatau o le 17 e matuā taugata lava. O lea sa tonu ai ia te a’u o le a ou fausiaina lava e a’u.
Sa amata e ala i le suesueina o le talafaasolopito o lenei laau fai musika faapitoa lava i Amerika. Sa ou iloa ai o se laau e tai tutusa ma le dulcimer, e ta’ua o le scheitholt, sa atonu na aumaia i le Iunaite Sitete i le 1700 e tagata malaga mai Siamani poo Scandinavia. E tusa o le taimi lava lea e tasi, sa taina ai foi e tagata Scotch-Irish ia le scheitholt. A o faagasolo pea le taimi, sa amata ona fausia e tagata isi kopi ua suia o le scheitholt, lea na iu lava ina avea ma dulcimer mauga. Sa ou iloa ai foi o le igoa dulcimer e mafua mai i le faaLatina dolce melos, po o le “leo suamalie.”
Vaai la i lo’u faate’ia ina ua mulimuli ane, a o ou saunia tala faatalafaasolopito o aiga, sa ou iloa ai o nisi o tuaa o lo’u tina e matele lava i Siamani ma tuaa o lo’u tamā e Scotch-Irish sa latou taina le dulcimer mauga! Sa ou matuā maofa faapea, i le tele o tupulaga mulimuli ane, sa ou mauaina lea laau fai musika ma aoao ai fanau o a’u fanau e taina! Oka se matagofie o le sootaga faalemusika i le va o a’u ma o’u tuaa ma tupuaga! Ou te faafetai mo le galuega o le talafaasolopito o aiga, lea ua fesoasoani ia te a’u e talisapaia o’u tuaa ma lagona se sootaga ma i latou e ala i se leo suamalie o le dulcimer mauga.