Samaria i le Eleveita
Ata na tusia e Anna Godeassi
Ina ua tuu e se aiga i totonu o la’u uarota ata i luga o le Facebook e uiga i la latou aafiaga i le mau ai i totonu o se lifi mo le lua itula, sa le mafai ona ou fesootai malamalama i ai. O le mea lena sa i ai, seia oo ina ou mau foi a’u i se lifi.
Sa ou tuua la’u telefoni i le fale, o lea la sa ou tatu’i ai faitotoa o le lifi ma tauvalaau atu mo se fesoasoani. Sa ou tatalo foi. E lei umi, ae lagona mai a’u e ni alii talavou ma—e pei o ni Samaria agalelei—sa valaau atu mo auaunaga faafuasei. Ona latou fai mai lea latou te nonofo i le fale mautotogi numera 38 ma tala ula mai a faasaolotoina a’u, e mafai ona ou aumaia se meaai i lo latou fale e fai atu ai sa’u faafetai.
Sa o ese i latou, ma sa matua faigata ona ou toafilemu. E faapefea pe afai e le i taunuu mai le vaega o faalavelave faafuasei? Sa ou tatalo atili. Sa ou iloa o le a vave ona foi atu lo’u toalua i le fale mai le galuega ma o le a le iloa e ia le mea sa ou i ai.
Na toe amata ona ou tatu’i faitotoa. I le va o le tamai avanoa i faitotoa o le lifi, sa mafai ona ou iloa atu ai tagata o loo savali ane. Sa ou valaau atu ia i latou ma talosaga atu pe mafai ona latou valaau atu i lo’u toalua e ta’u atu ia te ia le tulaga o i ai a’u. Sa latou faia, ma sa mafai ai ona ou toafilemu. Ua iloa nei e lo’u toalua, ma o le a ia faamautinoa o le a ou le mau ai pea iina.
Sa ou nofo i totonu o le lifi pe tusa mo se itula. Mulimuli ane, sa oo mai se tagata faigaluega ma faasaolotoina a’u. Fai mai o ia sa mau le lifi, o lea sa tatau ai ia te ia ona a’e mai i luga o maea o le lifi ma toe faaola le lifi. Sa ou faafetai atu ia te ia mo lana fesoasoani.
Mulimuli ane i lena aso, sa ou alu ma faafetai i o’u tuaoi i le fale 38. Sa ou avatu se mea sa kukaina i le fale. Fai mai i latou sa latou tala ula mai e uiga i le meaai, ae sa ou fiafia e faafetai ia i latou. A o ou toe tomanatu i lenei aafiaga, ua ou iloa nei le mea sa oo i ai le aiga mai i la’u uarota, ma sa ou faafetai i tagata o e na le savavali pea ma faapasi a’u ae sa taofi ma fesaosoani mai.
Atonu latou te le iloaina, ae sa mulimuli i latou i le faataitaiga a le Faaola. Na ia le faapasi i tatou pe tuua foi i tatou. Sa Ia tuuina atu lona soifua ina ia mafai e i tatou ona faasaoina mai le oti faaletino ma le faaleagaga. Ona o lenei mea, o le a ou taumafai e mulimuli i Ana faataitaiga ma ou le savali pea ae faapasi se tasi o puapuaga. Ou te faafetai mo lenei aafiaga ua aumaia ia te a’u se talisapaia sili atu ou te le i mafaufauina mo Ia ma mo Ana faamanuiaga.