Debbie Cole

Leinster, Aealani

Ata

Debbie Cole

O Debbie sa sauaina faalefeusuaiga i le 1989 i le 19 o ona tausaga. I lona finau ai ina ia le faaleagaina lona olaga e lenei aafiaga, sa faalagolago Debbie (o loo faaali mai ma lana tama teine) i lona faatuatua a o galue o ia o se volenitia e fesoasoani atu i isi tagata ua sauaina faalefeusuaiga ma talanoa atu faalauaitele mo le faatuina o ni tulafono faavae e fesoasoani e puipuia ai isi mai tagata solitulafono faalefeusuaiga.

Leslie Nilsson, tagata pueata

I le aso ina ua mavae le sauaina o a’u, sa fesili mai nisi o a’u uo pe ou te manao i se ava malosi e fesoasoani ia te a’u a o ou feagai ma lenei tulaga. Sa sili laitiiti atu i se tausaga talu ona avea a’u o se tagata o le Ekalesia, ma sa ou le toaga i le taimi lea. Ae sa i ai se mea i totonu ia te a’u na iloa afai ou te inuina soo se tele o le ava malosi, o le a ou faalagolago i ai.

Ina ua manino lo’u mafaufau i le mavae ai o ni nai aso, sa ou fuafua ai o lenei sauaga ua o se taimi itiiti i lo’u olaga, ae o le a le faaleagaina lo’u olaga atoa. Sa ou auai i le faamasinoga. Ou te manatuaina i le taimi puupuu lava a o lei lauina le iuga o le faamasinoga, sa ta’u mai e tagata ia te a’u o le tagata sa sauaina au o se tagata lelei mai se aiga faaaloalogia ma o lenei sauaga o se mea e le o sona uiga masani. Fai mai i latou sa ia faia se mea sese ona o le inu ava malosi ma sa ia matuā faanoanoa tele ua le mafai ona ia taliaina ia lava ona o le mea ua ia faia. Sa latou faatalitonuina a’u ou te talosaga atu i le faamasino e faamāmā lona faasalaga.

I le aso na lau ai le iuga o le faamasinoga, sa ou tuuina atu ai la’u faamatalaga faaletagata-aafia-i-sauaga ma ou ta’u atu i le faamasino sa faia e lenei tagata se mea sese ona sa faasua’avā ma sa ou manatu e manaomia e ia se fesoasoaniga faalemafaufau nai lo se taimi i le falepuipui. Sa faafetai mai le faamasino ia te a’u ma, talu ai ona o la’u faamatalaga, sa ia faasalaina ai le tagata lea i le na o le ono tausaga i le falepuipui. Ina ua mavae lenei mea, sa ou taumafai e agai i luma i lo’u olaga. Sa ou faaipoipo ma fai ni fanau.

I se taimi i le 1997 po o le 1998, sa ou maua ai se telefoni e ta’u mai ai ia te a’u ua toe iai foi le tagata lea i tala o le nusipepa. Sa tatalaina o ia i tua mai le falepuipui ma sa sauaina foi nisi tamaitai se toatolu. Sa ou toe manatuaina mea uma ona o lenei tala fou. Sa ou lagonaina o a’u ua mafua ai ona sa ou tu mo ia.

O lagona tuuaia sa ia te a’u na mafua ai ona ou pologa i le ma’i faanoanoa. O a’u o se tagata malosi o le Ekalesia i le taimi lena, ae sa matua faigata lava lea mea. Sa matua nunumi lo’u mafaufau ma sa tele lava ina le mafai ona ou lagonaina le leo itiiti ma le filemu. Sa fesoasoani faamanuiaga faaleperisitua ia te a’u aua sa mafai ai ona ou malamalama lelei i le mea sa finagalo lo’u Tama oi le Lagi ia ou iloa i lena taimi. Ou te iloa sa mafai ona ou faafoia lenei mea aua sa iai le talalelei i lo’u olaga.

I ni tausaga mulimuli ane, ina ua pule sa’u uo lelei lava i lona ola, sa ou fuafua ai e faia ni sailiga tupe mo se vaega faanoanoa i le pule i le ola. I se tasi aso sa ou maua ai se valaau i le telefoni mai se tasi o le au faamaopoopo a le vaega. Sa fai mai o ia o loo iai se isi avanoa volenitia ma ua le mafai lava ona alu ese lo’u igoa mai lona mafaufau.

Sa fesili mai o ia pe ou te fia volenitia o se tagata galue lagolago mo se fale tutotonu mo faalavelave tau sauaga faalefeusuai. I le avea o se tagata galue lagolago, ou te feiloai ma tagata ua sauaina, faatalatalanoa i latou e uiga i mea o le a tutupu, ma ta’u atu ia i latou le taua o le fautuaina. Ma o le a avea foi a’u o se lagolago ia i latou ma o latou aiga. Sa ou ta’u atu i lea tamaitai sa ou lagona o le mafuaaga na oo mai ai pea lo’u igoa i lona mafaufau ona o le mea sa ou oo i ai. Sa ou maua le aoaoga ma galue ai o se volenitia faigaluega lagolago mo ni tausaga se lua.

O lenei aafiaga o se faamanuiaga tele mo a’u. I taimi taitasi e valaau mai ai a’u ou te alu i le fale tutotonu o faalavelave, e faia lava sa’u tatalo. Ou te faapea atu, “Tama Faalelagi, E te silafia lenei tagata, E te silafia le mea ua oo i ai o ia, ma E te silafia le mea e manaomia ona ia faalogo i ai. Faamolemole ia avea a’u ma meafaigaluega i Ou aao e fesoasoani ia i latou e faalogo i le mea e manaomia ona latou faalogo i ai.”

A o ou fesoasoani i e ua sauaina e galulue agai i le toe faaleleia, ou te ta’u atu ia i latou e i ai sa latou filifiliga. Ou te faapea atu, “E te fia tumau o se tagata sauaina pe fia avea oe o se toa? O nisi aso e te lagona ai ua aveesea se mana mai ia te oe, peitai e mafai ona e toe avea lava e oe le mana ma le puleaina e ala lea i lou le faatagaina o le manatu i le mea na tupu e faatoilaloina lou tagata. O le auala lea e avea ai oe o se toa.”

O nisi taimi e le saunia ai tagata ua sauaina mo se taimi umi lava e o atu ai mo fautuaga, ae ou te faamalosiauina lava i latou ma ta’u atu ia i latou e matua taua tele le o atu pe a ua saunia i latou. Ou te taumafai lava i taimi uma e faamautinoa o se tagata sa savali mai i totonu o se tagata ua sauaina o le a savali atu i fafo o se toa. I le ala agai i le fale, ou te faafetai i taimi uma lava i le Tama Faalelagi mo le faatagaina o a’u e avea ma fesoasoani itiiti i isi. O lenei mea ua aumaia ia te a’u le malosi e agai ai i luma i lo’u lava olaga.

Ina ua mavae sina taimi, sa ou faalogo ai o le tagata sa sauaina a’u ua toe tatalaina foi mai le falepuipui ma ua toe sauaina foi se isi tamaitai. Sa ou manatu, “E le mafai ona faifai pea lenei mea.” Sa ou fuafua ai ou te taumafai e suia le tulafono ina ia matua mamafa atu faasalaga mo le au solitulafono faalefeusuaiga faifai pea. Sa ou saunia se talosaga mo le minisita o faamasinoga a Aealani ina ia faaaogaina. Sa teena e taitai o le ofisa o le minisita la’u talosaga. Sa fai mai i latou ua lava ma talafeagai tulafono ua iai i lea taimi.

Sa ou fuafua ai e amata se faalauiloa i luga o upega tafailagi ina ia maua ai le lagolago mo la’u talosaga. Ou te faafetai mo le 30 tausaga ua mavae i le avea ai o a’u ma tagata o le Ekalesia aua ua ou tuuina atu le tele o lauga ma lesona, ia na aumaia ia te a’u tomai mo le tautala faalauaitele ma le lototele e tusitusi ai i imeli, faia o fesootaiga i le telefoni, ma tu’itu’i i faitotoa mo le faalauiloa. Sa matou galulue ai ma tusitala i le televise, leitio, ma nusipepa. Sa maoae i latou. Sa latou faalauiloa pea lava pea le tala i se tulaga faamalieina. Sa faamaoni i latou i le tala ma faamaoni i le faalauiloa, ma o le mea lea sa vaai pea lava pea i ai tagata lautele.

Sa ma galulue foi ma se faipule sa fesoasoani ia te a’u e faatulaga se isi foi talosaga lea na maua atoa ai le lagolago. Ina ua maea le tele o galuega, sa iu lava ina pasia le pili i le aso 16 o Ianuari, 2019.

A o ou galue pea i le faia o le faalauiloa mo lenei tulafono fou, sa ou matua vaivai lava faalelagona i nisi taimi. Sa matuā tele tele taimi sa faamatalaina ai la’u tala ma sa ou taumafai pea e faato’ato’a lelei i taimi o faatalatalanoaga i le TV, leitio, ma le nusipepa. Sa matuā faatigainaina a’u, ma sa ou lagonaina i isi taimi le mamafa o mea uma lava i o’u luga. Sa ou lagonaina se pogisa o siomiaina a’u ma sa oo mai manatu leaga i lo’u mafaufau. Sa ou lagonaina o le a le mafai ona ou faia se eseesega ma sa ou fesiligia a’u lava pe aisea sa ou taumafai ai fua. I taimi na, o le tatalo, faitauina o tusitusiga paia, ma le auaunaga e tuuina atu i isi sa matuā fesoasoani tele ia te a’u. Ua ia te a’u se molimau malosi e aoga le tatalo. Ana leai le tatalo, semanū ua leva ona faaletonu lo’u mafaufau i la tausaga ua te’a. Sa ou alu atu foi i lo’u peresitene o le paranesi mo faamanuiaga faaleperisitua. Ou te matuai faafetai lava i le Tama Faalelagi mo le tuuina o tagata sa’o i lo’u ala e fesoasoani ia te a’u.

Ua ou maua foi le faamafanafanaga maoae i le auai atu i le malumalu ma le avea ai o se tagata faigaluega i sauniga. E fesoasoani lenei mea ia te a’u e lagonaina le alofa lea e lagonaina e lo tatou Faaola mo Lana Au Paia i itu uma e lua o le veli. I tausaga e valu ua mavae, ua ou aoaoina ai foi a oo ina e mauaina se musumusuga, e te le faatalitali e faatino. O se mau ua sili ona fesoasoani ia te a’u i le tele o lo’u olaga o le 1 Nifae 3:7: “O le a ou alu ma fai mea ua poloaiina e le Alii …” Ua matua faamanuiaina lo’u olaga e ala i le usiusitai i lenei mataupu faavae.

O le a taumafai le tiapolo e faatalitonuina i tatou e le lava lo tatou lelei pe le lava lo tatou poto, ae faatasi ai ma le fesoasoani a lo tatou Tama i le Lagi alofa, ua lava lo tatou lelei, ua lava lo tatou poto. Ou te iloa poo le a lava se mea e feagai ma a’u, o le a La’ua le tuua lava a’u ou te tauivi na o a’u.

E matuā faigata lava le taumafai e faamalamalama ia lagona o le aafia i sauaga faalefeusuaiga i se tasi e le i oo i ai i lena mafatiaga. O se aafiaga faapea e tumau ia te oe i taimi uma—o le a le alu ese lava. O le a i ai aso pe a i ai se mea e faaosofia ai lou manatuaina o lea aafiaga ma o le a e lagona ai ua aveesea mai ia te oe lou mana, lou talitonu ia te oe lava, ma lou saogalemu.

I taimi na, na o le pau lava le mea e mafai ona ou faia o le tootuli ifo i o’u tulivae ma talanoa atu i lo’u Tama Faalelagi. Ou te iloa e aunoa ma se masalosalo e faafofoga mai o Ia ma tali mai i a’u tatalo. E i ai so’u tupuaga faalelagi, ma o lea mea ua aumaia ia te a’u le malosi e faaauau ai pea pe a oo ina faigata le olaga.

Aemaise, o lo’u iloa e alofa lo’u Faaola ia te a’u e aumaia ia te a’u le faamoemoe ma le taulaiga. Ou te fiafia tele i le saunoaga a Elder Jeffrey R. Holland o le Korama a Aposetolo e Toasefululua: “E le mafai e oe ona magoto i lalo ifo o le mea e susulu ai le malamalama e le i’u o le Togiola a Keriso” (“O le Au Faigaluega i le Tovine,” Liahona, Me 2012, 33). E mafai ona fesoasoani le Faaola ia i tatou e tusa lava po o fea le mea o loo i ai i tatou po o le a foi le mea o loo feagai ma i tatou. Ou te vaai atu ia te Ia mo se faataitaiga o le mea e fai i taimi faigata.

E tele naua galuega e faia e agai ai i luma i le mavae ai o se mea faigata, ae e matuā mafai lava ona o Iesu Keriso. Ma ou te faafetai ai mo Ia ma Lana talalelei. E tele naua auala ua faamanuiaina ai lo’u olaga.